36
1 Sa Besalel, Oholiab, kan sira tabo tinorohanaw ni ĀPO so kabaelan kan kapakatoneng a nasanay so tabo a tarabāko do kapatnek daw so masantwan a tolda, ki machita maytarabāko sa sigon do tabo inbilinaw ni ĀPO.
No Kapagor-or Dan Tawotawo
2 Sinpangan na, tinawagan sa ni Moyses sa Besalel kan Oholiab, kan tabo masiglat a tinorohan ni ĀPO so kabaelan a nasalid so pōso a nangay a maytarabāko.
3 Rinawat da di Moyses tabo or-or a inyangay dan Israelita saw a para do kapatnekaw so masantwan a tolda. As siraw tawotawo, ki tinongtong daw mangyangangay so nainpapōswan a or-or da do kāda mabekas.
4 Dawa, siraw tabo a nasanay a maytarabāko, ki kinarwan daw madamaw a tarabāko da,
5 kan binata da di Moyses a kon da, “Arwaro danayaw iyangay dan tawotawo saya a pamarin so tarabākwaya kan machitaw do inbilinaya ni ĀPO a maparin.”
6 Do dāwri, nanoroh si Moyses so bilin kan inwaras da do intīro a kampo a makabata a kāna, “Isardeng nyo naw magor-or para do masantwanaya tolda.” Dawa, nangyangay sa pabaw tawotawo saw
7 maynamot ta sobsobra dana a pamatayoka so tabo tarabākwaw.
No Kapamarin so Tabirnakolo
(Eks. 26:1-37)
8 Tabo dan nasanay saw dyirad maytarabākwaw, pinarin daw toldaw ni ĀPO. Pinarin da do asa poho a kortina a mapino a tela a naabel do mabondal a bolabola a matatarek so kīta a asol, obi kan mabaya. Pinabordaan da sa so naypanyid sa a sinan parswa dyirad sanay saw.
9 Tabo dan kortinaw, ki paripariho rokod da. Asa poho kan apat a kayarda so kananaro kan dadwa kayarda so kawobong.
10 Pinagsasāip daw dadimaw a kortina a pinayparin a asa manaro a kapidāso. As komwan met pinarin da do dadimaw a kortina.
11 Somarono, namarin sa pa so pamaosōkan saw a asol a tela a pinaonor da do kāda pidāso do payis naw do mangket do gagan. As komwan met pinarin dad asaw a pidāso.
12 Namarin sa pa so dadima poho a pamaosōkan a para do asaw a kapidāso a kortina. As komwan met do somaronwaw a pidāso, as kan pinaysalap da saw pamaosōkanaw.
13 Namarin sa pa so dadima poho a sasadyit a balitok, kan inosar da sa a pinamaytatapang so dadwaya napagsasāip a kortina a nanglikmot so tabirnakolwaya a napayparin sya a asa.
14 Namarin sa pa sa Besalel so asa poho kan asa panalob a kortina so tabirnakolwaw a naparin do boboh no kalding.
15 Kāda asa dyirad dyaya onsi, ki paripariho rokod da. On, kāda asa, ki asa poho kan dadima kayarda so kananaro kan dadwa a kayarda so kawobong.
16 Pinagsasāip da saw dadimaw a kortina a pinayparin a asa manaro a kapidāso. As komwan met do anemaw a pinayparin da asa a kapidāso.
17 Sinpangan na, namarin sa pa so dadima poho a pamaosōkan a pinaonor da do payisaw no tobwan no nasāipaw a kortina do manōmaw a pidāso. As komwan met do asaw a pidāso.
18 Namarin sa pa so dadima poho a sasadyit a tombāga, as pinaosok da do pamaosōkan saw tan maytapang saw dadwaya pidāso a nayparin a asa.
19 Namarin sa pa so dadwa a panalob so tabirnakolwaya a yapo do lālat saw no malloko a karniro a napanyibaya, kan napakatayhapotan so lālat saw no lombalomba.
20 Namarin sa pa sa Besalel so parey sa a yapo do kayo a akasya a napatnek a para do tabirnakolwaw.
21 Kāda porma, ki asa poho kan dadima kadapan so kananaro, kan dadwa poho kan papito a kapolgada so kawobong,
22 as kan myan dadwa nayengay a kokod na do kāda parey tan maimoha sa dyirad pangsapatos saw a napaytatapang sira. Komwan met pinarin da do tabo kadwan saw a porma.
23 Namarin sa so dadwa poho a parey do mangketaw do abagātan no tabirnakolo,
24 kan apat a poho a pirak a pangsapatos siras pareyaw. Taydodwa pangsapatos do kāda parey tan igpet naw dadwaw a kokod na.
25 Do bīt naw do mangket do ammyānan no tabirnakolo, namarin sa so dadwa poho a parey,
26 kan apat a poho a pirak a pangsapatos. Dadwa pangsapatos do kāda parey.
27 Namarin sa pa so anem a parey do dichodan naw do mangket do lāod no tabirnakolwaw,
28 kan namarin sa pa so dadwa parey para do dadwaw a panōli na do dichodan.
29 Siraw nya dadwa parey do sōli, ki nagdobli sa do ibaba a maypatohos, as naikapet a maganay do tohos a maynamot do asa sinan singsing. Siraw nya dadwa a parey do panōli, ki komwan nakaparinan da.
30 Dawa, myan wawaho a parey kontodo asa poho kan anem a pirak a pangsapatos. Bāli, taydodwa pangsapatos do kāda parey.
31 Namarin sa pa sa Besalel so asa poho kan dadima sintas a yapo do kayo a akasya. No dadimaw, ki para dyirad pareyaw do asaw a bīt na no tabirnakolo.
32 No dadimaw, ki para do bīt naw, as kan dadimaw do mamanlāodaw do dichod no tabirnakolwaw.
33 Namarin sa pa so sintas do hobok dan parey a nagderecho a manda do tobwanaw.
34 Pinakalopkopan da sas balitok parey saw, kan pinamarin da sa so sinan singsing a balitok a nakaikaptan dan sintas saw. Aran siraw sintas saw, ki napakalopkopan sa so balitok.
35 Namarin sa pa so kortina a naparin do mabondal a bolabola a matatarek so kīta a asol, obi kan mabaya, as kan mapīno a tela. Napabordaan sa so sinan parswa a naypanyid dyirad sanay saw.
36 Namarin sa pa so apat a parey a naparin do kayo a akasya a pakalōdyitan kortinaw. Kinalopkopan da sa so balitok, kan inkapet da do kortinaw do sasadyit saw a balitok. Namarin sa pa so apat a pirak a pangsapatos siras pareyaya.
37 Do asdepanaw no tabirnakolo, namarin sa pa so kortina a naparin do mabondal a bolabola a matatarek so kīta a asol, obi kan mabaya, kan mapino a tela, as kan nabordaan do rinayit no rayem.
38 Namarin sa pa so para do nya kortina so dadima parey a naparin do kayo a akasya a napakalopkopan so balitok, kan napangayan so balitok a sasadyit. Namarin sa pa so dadima tombāga a pangsapatos siras nya parey.