32
No Balitok a Sinan Orbon a Bāka
(Deot. 9:6-29)
1 Do nakaboya daw sya no tawotawo saw a nahay danas Moyses a dya minosok a yapo do tokonaw, naychichipeh sa do yananaw ni Aaron, as nakabata da sya dya a kon da, “Ngay, pamarin pa yamen so dyos sa a mangidaōlo dyamen, ta chapatak namen pabayaw naparin do dawri a Moyses a nangikaro dyaten a yapo do Egipto.”
2 Do dāwri, binata ni Aaron dyira a kāna, “Sigi, pakarohen nyo saw balitok a arītos dan babbaket nyo saya, anak nyo saya mahahakay kan anak nyo saya mababakes, as kaiyangay nyo sira dyaken.”
3 Dawa, pinakaro da tabo no tawotawo balitok a aritos da do tadyinya da, as nakaiyangay da sira di Aaron.
4 Rinawat san Aaron balitok da saw, nakalōnag na sira, as nakapōtar na sya a sinan orbon a bāka.
Do dāwri, binata dan tawotawo, “O Israel, cha dyaw dyos mo a nangikaro dyimo a yapo do Egipto!”
5 Do nakaboyaw syay ni Aaron, namarin so altar do salapenaw no sinan orbonaw, as nakaiwaragāwag na sya a kāna, “Anchan delak, pistaan tanchi si ĀPO.”
6 Dawa, do somaronwaw a araw, minhep saw tawotawo saw a nangidāton siras dāton a masosohan, kan nangiyangay sa pa siras dāton a pachikapya. Katayokan nya, nagragragsak sa komninan kan naychaynoynom, as nakapayoyoknod dan mahahakay kan mababakes.
7 Do dāwri, binata ni ĀPO di Moyses a kāna, “Mosok ka, ta siraw tawotawo mo saya a inkaro mo a yapo do tana Egipto, ki naydyīdo dana sa.
8 Malisto saya tomadyichokod do inbilin ko dyira. Pinamarin dayaw inawan da so sinan orbon a bāka a yapo do nalōnag a balitok. Nagdāyaw kan nangidāton sa dya, as kaibahey da sya, ‘Siraw nyaw dyos nyo a Israel a nangikaro dyinyo a yapo do Egipto!’ ”
9 Binata pa ni ĀPO di Moyses a kāna, “Naboya ko sayaw nya tawotawo, ki matwaw oho da.
10 Dawa, nolay mo pa yaken, ta pabtaken ko soli ko dyira tan tomawos sa. Ki imo, pakayapohen konchi dyimo kan dyirad kapotōtan mo rakoh a nasyon.”
11 Ki nangdaw so parabor si Moyses di ĀPO a Dyos na, kan binata na a kāna, “O ĀPO, āngo ta taywara mo sa isoliw tawotawo mwaya a inkaro mo do tana a Egipto a yapo do rakoh a bīleg kan panakabalin mo?
12 Aysa, palobōsan mo sabaw taga Egiptwaw a makabata anchi sya a kon da, ‘In-gagāra na sa a inkaro do Egiptwaya tan dimanen na sa do katokotokonanaw kan abohen na sad tanaya.’ Dawa, isoli mo pa saba ibabāwi mo naw in-inpen mo saw dyirad tawotawo mo saya.
13 Kanakmen mo saw pachirawatan mwaw a sa simna Abraham, Isaak, kan si Israel. Insapata mo a mismo dyira a kon mo, ‘Payparinen konchiw kapotōtan nyo a akmas kāro dan bitohen do hanyit. On, itoroh konchi dyirad kapotōtan nyo tabo nya tana a inkari ko dyira, as dyira danchi a abos pandan.’ ”
14 Do dāwri, inbabāwi ni ĀPO marahetaw a pinanggep na a parinen dyirad tawotawo naw.
15 As si Moyses, ki minosok a yapo do tokonaw, kan sinahabit na saw dadwaw a matatāpi a bato a nakaitolasan dan bilbilin a maybīt.
16 Siraw matatāpyaw a bato, ki pinarin sa no Dyos. Siraw naitolasaw, ki tolas sa no Dyos a naikitikit do bato saw a matatāpi.
17 Do nakadngeyaw ni Joswe so tagari daw no tawotawo do kapangngēngey daw, binata na di Moyses a kāna, “Akmay ōni no gobat do kampo.”
18 Ki tominbay si Moyses a kāna, “Ōni abaya no kapangābak, mana ōni abaya no kaābak. Ōni naya no kapagkankanta iyaw madngey kwaya.”
19 Do nakapaypasngen ni Moyses do kampo, naboya naw sinan orbonaw a bāka kan kapaychatatāda daw, oltimo a soli na. Pinagsid naw inigpet na saw a matatāpi a bato, kan inapsapsa na sa do tokaranaw no tokon.
20 Inhap naw sinan orbonaw a bāka, as nakapayongeb na sya do apoy. Sinpangan na, hinomehomek na a akmay kolbos, as nakaipayokpok na sya do ranomaw, as nakaipaynom na sya dyirad Israelita saw.
21 Binata ni Moyses di Aaron a kāna, “Āngo pinarin da dyimo no nya saya tawotawo a indaōlwan mo sa namarin so nya marahmet a gatos?”
22 Tominbay si Aaron di Moyses a kāna, “Dyi ka pakono a makasoli dyaken mo āpo ko, ta chapatak mo na sīgod an māngo pinanggep no nya saya tawo a mamarin so marahet.
23 Binata daw ngamin dyaken a kon da, ‘Ngay, pamarin mo yamen siras dyos namen a mangidaōlo dyamen, ta chapatak namen pabayaw naparin do dawri a Moyses a nangikaro dyaten a yapo do Egipto.’
24 Ki no binata ko dyira a kon ko, ‘Tabo myan saw so balitok, ki pakarohen nyo sa.’ Dawa, intoroh da sa dyaken, kan pinayongeb ko sa, as tori minohtot nya orbon a bāka!”
25 Do nakaboyaw sya ni Moyses a pinalōbosan ni Aaron saw tawotawowaw a mamarin so chakey da, as kan nayparin nya a nakamimyengan da dyirad kabōsor da saw,
26 naytēnek do rowaganaw no kampo, kan binata na dyira a kāna, “An sino makey di ĀPO, mangay dyaken.” Ki tabo Lebita, naypasngen sa dya.
27 Do dāwri, binata na dyira a kāna, “Nyaw binata ni ĀPO a DYOS no Israel, ‘Kāda asa dyinyo a mahahakay, ki manghap so ispāda na kan bidibidihen naw intīro a kampo yapo do dya rowangan a manda do bīt, kan dimanen na sa tabo aran kakteh na, sīt na, mana karoba na.’ ”
28 Siraw Lebitaw, pinarin da akmas inbilinaw ni Moyses, kan sigōro tatdo a rībo tawotawo a nadiman do dāwri a araw.
29 Sinpangan na, binata ni Moyses a kāna, “Napatarek kamo a para di ĀPO sichangori, ta kinontra nyo saw bōkod nyo sa anak kan kakakteh, kan binindisyonan naynyo sichangori a araw.”
30 Do somaronwaw a araw, binata ni Moyses dyirad tawotawo saw a kāna, “Nakagatos kamo na so marahmet. Changori, somonget ako do yanan ni ĀPO, ta ara koynyo a maipakawan dya.”
31 Dawa, naybidi si Moyses di ĀPO, kan binata na dya a kāna, “Taywarayaw no karahmet no gatos dan nyaya tawotawo. Pinamarin daw mismo da a inawan so dyos da a balitok.
32 Ki sichangori, machikakaāsi ako a pakawanen mo sa pakono do gatos da. Amnan dyi mo sa mapakawan, aran yaken, ki ponasen mo naw ngaran ko do libro mo a intolas mo.”
33 Tinbay ni ĀPO si Moyses a kāna, “Aran sino a nakagatos dyaken, ki ponasen konchi so ngaran do libro ko.
34 Changori, yangay mo sa idaōlwan tawotawowaya a komwan do yananaw a ibahey ko, as iyanchiw anghil kwaw, ki manmanma kan inyo. Aran komwan, anchan marapit chimpo a kadōsa ko sira, dosāen ko sanchi maynamot do gatos da.”
35 As si ĀPO, pinisti na saw tawotawo saw maynamot do sinan orbonaw a inpaparin da di Aaron.