27
No Altar a Paysosohan so Dāton
(Eks. 38:1-7)
1 Binata pa ni ĀPO di Moyses a kāna, “Mapaparin ka pa so altar a yapo do kayo a akasya. Makwadrado so papito kan godwa a kadapan so kanaro kan kawbong. Apat kan godwa a kadapan, iyaw kakarang na.
2 Mapaparin ka pa so sinan olong a malogag do apat saw a sōli na tan tabo, ki mayparin a asa kapidāso, as mapakalopkopan so tombāga.
3 Mapaparin ka pa so tabo longlongan na do tombāga a akmas timba saw a panahodan so ahbek, kan siraw pāla na, siraw palanggana a para panakoy, siraw panodok so karni, kan siraw pangayan so inmaya.
4 Mapaparin ka pa so tombāga a rarātag, kan apat a tombāga a sinan singsing a pamaosōkan so iisiw saw do apataw a sōli no rarātagaw a tombāga.
5 Mapadātok nyaya do ahbwaw no baha no altar tan rapiten naw godwa naw no katohos no altar.
6 Mapaparin ka pa siras iisiw a yapo do kayo a akasya, as mapakalopkopan so tombāga,
7 as kapaōsok sira do sinan singsing saw do maybītaw no altar a pangisiwan.
8 Mapakahon ka so altar a tappi. Mapaparin ka so akmas inpaboya kwaw dyimo do tokon.”
No Atat no Tabirnakolo
(Eks. 38:9-20)
9 “Mapaparin ka pa so atat no tabirnakolwaw. Do mangketaw do abagātan, mapapalōdyit ka siras kortina a maparin do mapīno a tela a dadima poho a kayarda so kananaro.
10 Myan dadwa poho a tombāga a parey na kan dadwa poho a tombāga a pangsapatos siras pareyaw, as kan myan saw sasadyit da kan kabli da a makalopkopan do pirak.
11 Komwan maparin do mangketaw do ammyānan a atat na.
12 “Do mangketaw do lāod no atat naw, siraw kortinaw, ki dadwa poho kan dadima a kayarda so kananaro, kan asa poho so parey kan asa poho so pangsapatos.
13 Do mangketaw do dāya a somalap do dadan a asdepan, iyaw atat naw, ki dadwa poho kan dadima pa a kayarda so kananaro.
14-15 Do maybītaw do asdepanaw, papito kan godwa kayarda iyaw kortinaw, kan tatdo so parey, as kan tatdo so pangsapatos.
16 “Do asdepanaw no atat, myan kortina a asa poho a kayarda so kananaro a maparin do mabondal a bolabola a matatarek so kīta a asol, obi kan mabaya, kan mapīno a tela, kan mabordaan do rinayit no rayem, as kan malōdyit do apat a parey do apat a pangsapatos.
17 Tabo dan parey saw do omdibon naw no atat, ki magkakāmang sa do kabli a pirak. Siraw sasadyit na saw, ki maparin do pirak, kan no pangsapatos daw, ki tombāga.
18 Iyaw irahem naw no atataw, ki dadima poho a kayarda so kananaro, dadwa poho kan dadima kayarda so kawobong, kan dadwa kan godwa kayarda so kakakarang. Siraw kortinaw, ki maparin do mapīno a tela, kan no pangsapatos saw, ki tombāga.
19 Tabo a rimīnta no tabirnakolwaw a maosar sigon do kāda sīrbi na, kan tabo pāsok saw a para do toldaw kan para do atataw, ki naparin do tombāga.”
No Lana Para do Paysohwan
(Leb. 24:1-4)
20 “Ibilin mo dyirad Israelitaw a iyangayan da imo so pōro a lana no olibo a malebbek a kanen sohwaw tan nāw na somdeb.
21 Do irahem no Toldaw a Pachibayabayatan di ĀPO, do gaganaw no kortina a salapen no Lakāsanaw no Tōlag, sa Aaron kan siraw pōtot naw a mahahakay, machita a nāw da pasdeban sohwaw do salapen ni ĀPO a maychararakan. Machita a tongpalen dan Israelitaw nya manayon a pangeddeng a aran siraw īto a kapotōtan.”