24
No Kapachitōlag ni ĀPO dyirad Israelita
1 Sinpangan na, binata ni ĀPO di Moyses a kāna, “Tomaraya ka dya do yanan kwaya a ĀPO, as pachirayay mo sa Aaron, Nadab, Abiho, kan papito saw a poho dyirad panglakayen saw no Israel, as makateng kamo a magdaydāyaw dyaken.
2 Imo lang, mo Moyses, maypasngen dyaken a ĀPO. Siraw kadwanaya, ki machita a dyi sa maypasngen. As siraw tawotawo saya, ki machita a dyi sa polos a machangay dyimo a somonget do tokonaya.”
3 Do nakangayaw ni Moyses a nangibahey so tabo saw a chirin kan linteg saw ni ĀPO dyirad tawotawo saw, nāsa sa a nangatbay sya a kon da, “Tabo a binata ni ĀPO, parinen namen.”
4 Do dāwri, intolas a tabo ni Moyses binata saw ni ĀPO.
As do somaronwaw a mabekas, nakasāpa si Moyses a naybangon, as nakapamarin na so altar do tokaranaw no tokon. Nakapamatnek na pa so asa poho kan dadwa a posti a bato a pinakainawan dan asa poho saw kan dadwa a trībo no Israel.
5 Sinpangan na, nanoboy so babbaro a Israelita a mangisagāna siras binyay a idāton da, as kan indaōlwan na sa a mangsosoh so dāton saw. Indāton da pa saw orbonaw a tōro a bāka a pachikapya da di ĀPO.
6 Inhap ni Moyses godwaw no raya, as nakapangay na sya do palanggana saw. As iyaw godwa naw, inwarsi na do altaraw.
7 Sinpangan na, inhap naw librowaw no tōlag, as nakaibāsa na sya dyirad tawotawo saw. Ki tominbay saw tawotawo saw, kan binata da a kon da, “Tabo a binata ni ĀPO, parinen namen, as kan tongpalen namen.”
8 Do dāwri, nanghap si Moyses so rayaw a myan do palanggana saw, as nakaiwarsi na sya dyirad tawotawo saw, as kan nakabata na sya a kāna, “Iyaw nya rayaw, mangisigorādo so kapachitōlag dyinyo ni ĀPO do nakaitoroh naw so tabo bilbilin na.”
9 Sinpangan na, somnonget sa Moyses kan Aaron, Nadab kan Abiho, as kan siraw papito saw a poho dyirad panglakayen saw no Israel,
10 as kan naboya daw Dyos no Israel. Do tokaran naw, ki akmay napalitāda no sappiro a mangīna a bato a matnaw a asol a akmay hanyit.
11 Ki diniman na saba ni Āpo Dyos nya sa pangpangōlo no Israelita. Naboya da si Āpo Dyos, as kan komninan kan mininom sa do salapen na.
Si Moyses do Tokon a Sinai
12 Sinpangan na, binata ni ĀPO di Moyses a kāna, “Tomaraya ka do yanan kwaya do tokonaya kan nāw mo dya, as kan itoroh konchi dyimo matatāpi saw a bato a nakaitolasan dan linteg kan bilbilin a intolas ko a para do kapangnanawo mo siras tawotawo saw.”
13 Do dāwri, nagrobwat sa Moyses kan Joswe a kasidong na, as nakataraya ni Moyses do tokonaw ni Āpo Dyos.
14 Ki sakbay a kinarwan na saw panglakayenaw, binata na dyira a kāna, “Panayahen nyo yamen dya ah, mandad kapaybidi namen dyinyo a mirwa. Sa Aaron kan Hor, matokos sa dyinyo, as an myan saw myan so parikot, siraw ngayan da.”
15 Sinpangan na, somnonget si Moyses, kan pinongosan demdemaw tokonaw.
16 Iyaw ranyag no dayag ni Āpo Dyos, ki dominna do Tokonaw a Sinai. Do irahem no anem a karaw, pinongosan demdemaw tokonaw. As do chapapito naw a karaw, tinawagan ĀPO si Moyses a yapo do irahemaw no demdem.
17 Iyaw ranyag no dayag naw ni ĀPO, ki akmay apoy a gomilgilāyab do tōtokaw no tokon do kaboya dan Israelita saw.
18 Sinpangan na, somindep si Moyses do demdemaw do katongtong naw a somnonget do tokonaw, as kan minyan daw so apat a poho a karaw kan apat a poho a kahep.