16
No Māna kan Siraw Pogo a Manomanok
1 Siraw tabo tawotawo no Israel, nagrobwat sa a komnaro do Elim, kan kominwan sa do let-ang a mayngaran so Sin a iyaw payawanaw no Elim kan Sinai. Nakarapit sa daw do chaasa poho naw kan dadima a karaw, do somaronwaw a bohan katayoka no nakahtot daw do Egipto.
2 Do kayan daw do let-ang, naydabadabay sa tabo tawotawo no Israel a maikontra da Moyses kan Aaron.
3 Binata dan Israelitaw dyira a kon da, “Maganaganay pa āno an nadiman ta do tanoro ni ĀPO do tana a Egipto? Dawri a nakahanghangan ta so linaneg a karni kan tināpay a mandad nakabsoy ta. Ki sichangori, inyangay nyowaya tabo nya saya tawotawo do dya let-ang a dimanen do kapteng.”
4 Sinpangan na, binata ni ĀPO di Moyses a kāna, “Mapachimoy akonchi so tināpay a yapo do hanyit a para dyinyo. Do kāda araw, machita a mohtot sanchiw tawotawo do kampo da a mangpeh so manawob a mākan da do dāwri a araw. Maynamot do dyaya, soōten ko sa, ta chiban ko an onotan daw ibilin ko.
5 Do chanem naw anchi a karaw, paypirwahen daw kāro no akmas kārowaw no akpekpehen da do kararaw, as kaisagāna da sya.”
6 Dawa, binata ni Moyses kan Aaron dyirad tabo Israelitaw a kon da, “Sichahep, matonngan nyonchi a si ĀPO iyaw nangikaro dyinyo do Egipto.
7 As anchan mabekas, maboya nyonchiw ranyag no dayag ni ĀPO, ta nadngey naw dinabadabay nyowaw a maikontra dya. Sino kami ta dawa a maydabadabay kamo so maikontra dyamen?”
8 Tinongtong ni Moyses a binata a kāna, “Mapatakan nyonchi a si ĀPO manoroh dyinyo so karni a kanen nyo sichahep, kan tināpay a chabsoy nyo anchan mabekas, ta nadngey naw dinabadabay nyowaw a maikontra dya. Sino kami? Taywaran yamen dinabadabay nyowaw an dya si ĀPO!”
9 Do dāwri, binata ni Moyses di Aaron a kāna, “Ibahey mo dyirad tabo tawotawo no Israel a kon mo, ‘May kamo a maytēnek do salapen ni ĀPO, ta nadngey naw dinabadabay nyowaya.’ ”
10 Do kayan naw ni Aaron a maychiychirin dyirad tabo tawotawo no Israel, minidit sa do mangket do let-angaw, kan nagparang iyaw ranyag no dayag ni ĀPO do demdemaw.
11 Binata ni ĀPO di Moyses a kāna,
12 “Nadngey ko dinabadabay daya no Israelita. Ibahey mo dyira a kon mo, ‘Anchan maysarisari, koman kamonchi so karni, as anchan mabekas, mabsoy kamonchi so tināpay. Do dāwri, matonngan nyonchi a yaken si ĀPO.’ ”
13 Do dāwri a mahep, domnahepdep pangen no pogo, kan inapno daw kampo daw. As do kamabekas naw, myan nabolay a apon do omdibonaw no kampo.
14 As do nakabo danaw no aponaw, myan matataripis a mapīno a akmay naypatwa a ranom a nagparang do hapotaw no let-ang.
15 Do nakaboya daw sya no Israelitaw so nawri, binata da do katakatayisa dyira a kon da, “Āngo paro nya?” ta chapatak daba an āngo.
Ki binata ni Moyses dyira a kāna, “Iyaw nyaw tināpayaw a intoroh dyinyo ni ĀPO a kanen nyo.
16 Nyaw inbilin ni ĀPO a kāna, ‘Kāda asa, ki mangpeh so manawob a kanen na. Manghap so asa karokod a omer para do kāda tawo do tolda nyo.’ ”
17 Pinarin dan Israelitaw akmas naibaheyaw dyira. Kadwan dyira, ki chinpeh daw āro. As no kadwan, ki chinpeh daw dēkey.
18 As do nakarokod daw so chinpeh daw do rokod a omer, siraw nangpeh saw so āro, nagsorok aba. As siraw nangpehaw so dēkey, nagkōrang aba. Kāda asa, ki nangpeh so koskosto a machita na.
19 Sinpangan na, binata ni Moyses dyira a kāna, “Abaw mangapya so panda na a mandan mabekas.”
20 Ki myan saw kadwan a dya nangikaskāso di Moyses, kan nangapya sa so kadwan a mandan mabekas. Do kamabekasanaw, inohed kan nabongtot kinapya daw. Dawa, nakasoli si Moyses dyira.
21 Kāda mabekas, nangpeh sa so kosto sigon do machita no kāda tawo. As do nakapaypakohat danaw no araw, nalonag saw dyi daw a nakpeh.
22 Do chanem naranaw a karaw, nangpeh sa so dobli a kāro. On, dadwa omer para do kāda asa tawo. As siraw tabo pangpangōlo dan tabo tawotawo, yangay da inbahey di Moyses.
23 Do dāwri, binata ni Moyses dyira a kāna, “Nyaw inbilin ni ĀPO, ‘Anchan delak, ki araw no kapaynaynahah a iyaw masantwan a araw a para do kapagdaydāyaw di ĀPO. As dawa, sicharaw hotohen nyo chakey nyo, kan isohad nyo chakey nyo. Kapyahen nyo panda nyowaw a para anchan delak.’ ”
24 Dawa, kinapya daw panda daw manda do kamabekas a akmas inbilin naw ni Moyses, as kan nabongtot aba kan inohed aba.
25 Do kamabekasan naranaw, binata ni Moyses dyira a kāna, “Kanen nyo na sichangori. Ta sicharaw, ki araw no kapaynaynahah a para di ĀPO. Abaw machichwasan nyo changori do tanaya.
26 Anem a karaw a akpekpehen nyo, ki do chapapito naw a karaw a Araw a Kapaynaynahah, aba polos machichwasan nyo.”
27 Aran komwan, myan saw kadwan a tawotawo a minohtot do chapapito naw a araw a mangay a mangpeh, ki aba polos nachichwasan da.
28 Sinpangan na, binata ni ĀPO di Moyses a kāna, “Anchan āngo kapachipanda nyo a mangsōkir so bilbilin kan linlinteg ko?
29 Iktokto nyo a si ĀPO, ki nanoroh dyinyo so Araw a Kapaynaynahah. As dawa, do chanem naw a araw, tinorohan naynyo so tināpay a manawob do dadwa karaw. Kāda asa, ki machita a nāw na do yanan naw do chapapito naw a karaw, kan abaw mohbot.”
30 As dawa, naynahah saw tawotawo saw do chapapito naw a karaw.
31 Siraw tawotawo saw no Israel, pinangaranan daw tināpayaw so māna. Akmay dēkey a botoh a mayngaran so “coriander,” kan maydak so kīta. As no taham na, ki akmas matataripisaw a tināpay a naparin do tagapolot no yokan.
32 Do dāwri, binata dana ni Moyses a kāna, “Nyaw inbilin ni ĀPO a kāna, ‘Mangapya kamo so asa kaomer a māna a para dyirad īto saw a kapotōtan nyo tan maboya danchi iyaw nya a tināpay a intoroh ko a kanen nyo do let-ang do nakaikaro kwaw dyinyo a yapo do Egipto.’ ”
33 Binata pa ni Moyses di Aaron a kāna, “Manghap ka pas pangayan, kan poskan mo so asa kaomer a māna. Kapadisna mo sya do salapenaya ni ĀPO tan makapya a para dyirad īto a kapotōtan ta.”
34 Akmas inbilinaw ni ĀPO di Moyses, pinangay ni Aaron mānaw do salapenaw no Lakāsan no Tōlag tan makapya.
35 Siraw Israelita, ki komninan sa so māna do apat a poho a katawen a nandad nakapakarapit da do pachipandan no tana a Kanaan a dawriw niyanan da.
36 Iyaw pangrokodan da a asa omer, ki apagkapollo no pangrokodan a asa epah.