5
No Tolas ni Tattenai di Impirador Daryos
1 Do dāwri, siraw propīta saw a sa Haggeo kan Sakaryas a apoko ni Iddo, nangipadto sa dyirad Jodyo saw a omyan do Joda kan do Jerosalem. Nangipadto sa do ngaran no Dyos no Israel a mangitoray dyirad tawotawo na.
2 Do nakadngey daw da Serobbabel a pōtot ni Saltiel kan Jeswa a pōtot ni Josadak so inpadto daw, insiknan da mirwa a patneken timplowaw do Jerosalem. Siraw dadwaw a propītaw somnidong dyira.
3 Do dāwri, si Tattenai a gobirnador do probinsya a Laōden no Oksong a Oprates kan si Setar-bosenai kan siraw rārayay daw, nangay sa dyira do Jerosalem, kan inyahes da a kon da, “Sino nanoroh dyinyo so pangeddeng a mapatnek kan mapatayoka so nya bahay?”
4 Inyahes da pa a kon da, “Āngo saw ngarangaran dan mangpatnekaya so nya bahay?”
5 Ki no kapangaywan no Dyos da, ki myan dyirad panglakayenaw no Jodyo. Siraw opisyalis saw, napenpen da saba a mapatnek a manda do kapakarapit no ipaw-it daw a tolas di Impirador Daryos, as kan makarawat so atbay na.
6 Nyaw kopya no tolasaw a inpaw-it da di impirador da Tattenai a gobirnador no probinsya a Laōden no Oksong a Oprates kan Setar-bosenai kan siraw rārayay daw a opisyalis no probinsya a Laōden no Oksong a Oprates.
7 Iyaw tolas a inpaw-it da dya, komwan nakaitolas na:
“Dyimom Āpo Impirador Daryos: Kablāawan namen imo.
8 “Chakey namen a mapatakan mom Āpo Impirador a nangay kami do probinsya a Joda do yanan timplo no mabīleg a Dyos. Siraw tawotawowaw, ki ari dana sa madama a mapatnek so rarakoh saw a bato, kan mapangay so parey do ahad saw. Sipapasnek sa a maytarabāko, kan maypaypalisto sa.
9 “Inyahes namen dyirad panglakayen a kon namen, ‘Sino nanoroh dyinyo so pangeddeng a mapatnek kan mapatayoka so nya bahay?’
10 Inakdaw namen pa dyiraw ngarangaran daw tan maitolas namen ngarangaran dan pangpangōlo da saw dyimo.
11 “As nyaw atbay da dyamen: ‘Yamen, ki pachirawatan no Dyos do hanyit kan tanaya, as kan mirwa kami a mapatnek so bahayaw a napatnek do kaychowa a pinatnek kan pinatayoka no asaw a mabīleg a āri no Israel.
12 Ki maynamot ta pinasoli dan aāmang namen Dyos do hanyit, inparawat na sa di Nebokadnessar a āri do Babilonya a nangrārayaw so nya bahay kan inakaw na saw tawotawo do Babilonya.
13 Aran komwan, do manōma a tawen do nakapagāri ni Syros a impirador do Babilonya, inkeddeng ni Impirador Syros a mirwa mapatnek nya bahay no Dyos.
14 Siraw balitokaw kan pirak a warawara a dyira no bahayaw no Dyos a pinakaro ni simna Nebokadnessar do timplo a myan do Jerosalem kan inyangay na do timplo do Babilonya, pinahtot sa ni Impirador Syros do timplo do Babilonya. Sinpangan na, inparawat na sa do tawowaw a mayngaran so Ses-bassar a pinatnek na a gobirnador,
15 kan inbahey na dya a kāna, “Hapen mo saw nya warawara, kan posken mo do timplo do Jerosalem, kan palobōsan mo kapatnek no bahay no Dyos a mirwa do yanan naw.”
16 Do dāwri, nya tawo a Ses-bassar, ki nangay kan napangay so pondasyonaw no bahay no Dyos do Jerosalem. Yapo do dāwri a mandas changori, matongtongtong a mapatnek, as kan ari pad tayoka.’
17 “As dawa, an maganay dyimo mo āpo āri, palobōsan mo a myan mangchichwas do Babilonya do pangapyanaw siras nahonaw a tolas a nakaitolasan dan napariparin saw do pagāryan tan mapatakan an oyod a inkeddeng ni Impirador Syros a mirwa mapatnek bahayaw no Dyos do Jerosalem mana engga. Tan komwan, ipaw-it mo pakono dyamen mo Āpo Impirador iyaw disisyon mo a maynamot do dyaya.”