3
1 Do chapapito naw a kabohan, do nakayan daranaw no Israelita saw do idiidi da, ki naychichipeh sa a nāsa so panggep tawotawo do Jerosalem.
2 Do dāwri, sa Joswe a pōtot ni Josadak kan siraw kapayngay na saw a papādi, kan sa Serobbabel a pōtot ni Salatiel kontodo kakabagyan na saw, ki pinirwa darana pinatnek altaraw no Dyos no Israel tan maparin sa mirwa a maysosoh so dāton a akmas intolasaw ni Moyses a tawo no Dyos do Linteg na.
3 Aran chinamo dan naybidi saw a Israelita siraw omidyaw a omdibon do dawri, ki alit na napatnek sa so altar do gagāngayaw a yanan na, as kan naysosoh sa so dāton da di ĀPO do mabēbekas kan kāda ahep.
4 Sinpangan na, sinilibrar daw no Pista no Kapaychabengbengbeng a akmas naitolasaw do Linteg, as kan indāton daw masosohan saw a dāton do kararaw sigon do naikeddengaw do dāwri a araw.
5 Tayokaw nawri, indāton daw no gagāngay saw a dāton da a masosohan a simememeh. Masaw dāton saw do Lenned a Bohan kan tabo no naikeddeng saw a pista ni ĀPO, kan tabo nainpapōswanaw saw a dāton a naitoroh di ĀPO.
6 Do manōma a araw do chapapito naw a bohan, inrogi daw mangidāton so masosohan saw a dāton da di ĀPO. Ki no pondasyonaw no timplowaw ni ĀPO, ki ari pa dya mapangay.
No Kairogi Da a Mapatnek so Timplo ni ĀPO
7 Do dāwri, intoroh daw bāyad para dyirad mayatoy saw kan karpintīro saw, as kan inpaw-it daw kanen, inomen, kan lana no olibo dyirad taga Sidon kan taga Tiro tan mangyosok sa siras toroso a sidro a yapo do tokotokon do Lebanon do aptanaw do Joppa a idi do Israel a akmas inpalōbosaw ni Syros a impirador do Persya.
8 Dawa, do chadadwa naw a kabohan no chadadwa naw a katawen, do kawara daw do yananaw no timplo no Dyos do Jerosalem, ki inrogi darana patneken da Serobbabel a potōt ni Salatiel, Joswe a pōtot ni Josadak, kan tabo saw kakabagyan da kontodo siraw papādyaw kan siraw Lebita kan siraw tabo naakawaw a tawo a naybidi do Jerosalem iyaw timplowaw. Tinongdo da saw Lebitaw a yapo do dadwa poho so tawen a maypakarang a manyidechideb so tarabākwaya a kapamatnek so timplo ni ĀPO.
9 As dawa, si Joswe kan siraw pōtot naw a mahahakay, siraw kakabagyan naw, as kan si Kadmiel kan siraw pōtot naw a mahahakay a kapotōtan ni Hodabyah, ki naysisidong sa a manyidechideb so tarabākwaya a kapamatnek so timplo no Dyos. Somnidong pa saw pōtotaw a mahahakay ni Henadad kan siraw Lebitaw kontodo pōtot da saw a mahahakay, kan siraw kakabagyan daw.
10 Sinpangan na, do nakapangay daw so pondasyonaw no timplo ni ĀPO, ki siraw papādyaw a nakalaylay so laylay no pādi a nakatrompīta, as kan siraw Lebitaw (a siraw kapotōtanaw ni Asap) a myan so pyangpyang, naytēnek sa do naikeddengaw a yanan da a magdaydāyaw di ĀPO, sigon do inbaheyaw ni simna Āri Dabid a āri do Israel do kaychowa pa.
11 Naysin-at-atbay saw dadwaw a gropo a magkanta so kapagdaydāyaw kan kapagyamyāman da di ĀPO a kon da,
“Si ĀPO, ki maganay.
Abos pandan no kadaw na dyirad tawotawo no Israel.”
Do dāwri, tabo no tawotawo do omdibon, ki inngēngey daw malyak a kapagdāyaw da di ĀPO a maynamot do nakapangayaw no pondasyonaw no timplo ni ĀPO.
12 Ki myan daw āro saw a mangalkem a papādi, Lebita, kan pangpangōlo no partīdos a nagboyboya so kapintas no dāmwaw a timplo, ki tomnanyis sa so malyak do nakaboya daw so pondasyonaw a madama a mapatnek do salapen da. Ki aran komwan, myan paw kadwan a nangēngengey do ragsak da do kaboya daw sya.
13 Mapaytarek pabaw ragsak kan tanyis a maynamot do oltimwaw so kalyak a kapangēngey da, kan maparin a madngey do mabawa a logar iyaw ringgor daw.