6
1 As dawa, maynamot ta machipaytarabāko kami di Āpo Dyos, ki pachikakaāsi namen dyinyo a dyi nyo a ipalōbos a mayparin a abos sinpaspangan iyaw rinawat nyowaw a parābor no Dyos.
2 Ta binata no Dyos do Masantwan a Tolas a kāna,
“Inadngey ko dasal nyo do chimpwaw a naikeddeng ko
tan paraboran koynyo, as kan sinidongan koynyo
do kostwaw a araw tan maisalākan koynyo.”
Dawa, kadngeyen nyo a maganay ah, ta changori danaw naikeddengaw a araw no kasidong no Dyos, kan changori danaw arawaw no kaisalakānan nyo.
No Lidyat Do Byay Da Pablo
3 Ipasnek namen a dyi kami a mamarin so pakachichadan dan aran sino a tawotawo tan abwa polos pakapilāwan no maynamot do kapagsīrbi namenaya di Āpo Dyos,
4 basbāli a ipaboya namen do tabo a kaparin namen a yamen tobotoboyen no Dyos. Siaānos kami a mangibtor so tabo a pakariribokan namen kan pakalidyatan, masaw pakaidadanesan namen.
5 On, inanōsan namen nababaotan, nabahod, kan nariribok. Nahopahopag kami pa, kan napadāsan namen paw dya nakaycheh kan dya komninan.
6 Naipaboya pa a yamen, ki tobotoboyen ni Āpo Dyos a maynamot do madalos saw a kaparin namen, kan kapapatak namen so oyod, kaānos, kan kayan kāsi namen. On, naipaboya pa a yamen, ki tobotoboyen no Dyos a maynamot do panakabalin no Ispirito Santo a myan dyamen, iyaw oyod a adaw namen dyirad tawotawo,
7 iyaw kaoyodaya no chirin namen, as kan iyaw bīleg no Dyos a inpaboya na a maynamot dyamen. As myan pa dyamen iyaw kinalinteg a intoroh ni Āpo Dyos dyamen a mayarig a armas namen a pachilaban kan pagsarāpa namen do gobat.
8 Do kapagsirsīrbi namenaya di Āpo, pasaray inanyib da yamen tawotawo, ki an kadwan, abaw anyib da dyamen. On, oyawen da yamen kadwan, as kan myan saw kadwan a mangidāyaw dyamen. Batahen dan kadwan a bayataw kami, ki aran komwan batahen da, ichirin namen lang iyaw oyod.
9 Batahen dan kadwan a dyi da yamen a chapapatak, ki alit na magdindināmag kami. Do pangarkolwan no kadwan, ki akma kami naw nadiman, ki ari kami pa a sibibyay. Masaw a aran nadōsa kami, ki naiparawat kami aba a madiman.
10 On, aran pagmamayohen da yamen kadwan, ki nāw namen a masoyot. Akma kamiw mapobri, ki āro a tawotawo pinabaknang namen do naispiritwan a bindisyon. Akma kamiw abos warawara do lōbongaya, ki aran āngo a dyiran Āpo Dyos, ki para dyamen.
11 Ayket na! Inyo a mapateg a sīt namen do Korinto, aba polos intayo namen dyinyo do nakapaytolas namenaya. Taywara a dya matokod adaw namen dyinyo.
12 On, inanban namen abaw kapangtokto namen dyinyo, basbāli a inyo nangneb so kapangtokto nyo dyamen.
13 Dawa, sichangori, inyo a ibidang ko a anak ko, bayaten nyo pakono adaw namenaya a inpaboya namen dyinyo ah!
No Ballāag a Maynamot do Kapachikasmang Dyirad Dya Manganohed
14 Sichangori, kakakteh, machasa mana machikasmang kamo aba dyirad dyi pa saw a manganohed. Ta maparinori a mayrayay matalineng kan dyīdo? Mana maypāngo kapaysagel no sēdang kan sari?
15 Ta māngo paro a magtōnos si Kristo kan Sairo? Polos! Masaw magtōnos abaw kapangtokto da no manganohed kan dya manganohed.
16 Maypāngo a maysagel kapagdāyaw do Dyos kan kapagdāyaw do didyosen? Polos! Dawa, aran yaten, ta mismo ta na timplo a pagyanan no sibibyay a Dyos a akmas inpaitolas no Dyos do Masantwan a Tolas a kāna,
“Omyan akonchi dyira, as nāw ko nanchi a machikāmang dyira.
Yaken anchiw Dyos da, as siranchiw tawotawo ko.”
17 As myan paw matarek a inpaitolas ni Āpo a kāna,
“Karwan nyo sa, kan machisyay kamo dyira.
Saliden nyo sabaw nachilabay danaya do marahet
tan rawaten konchinyo.
18 Yaken anchiw Āmang nyo, as inyonchiw anak ko.”
On, nyayaw binata ni Āpo a Manakabalin do Tābo.