„Ágúst, þurftir þú ekki að vinna nein heimaverkefni?“ spurði Kolbrún, kærastan mín. Inni í herbergi hafði ég verið að lesa Biblíuna hennar í á aðra klukkustund. Kolbrún var ekki alveg viss um hvað henni fyndist um þetta. Hún hafði vanist því að Biblían væri spari eða við „Brjótið glerið í neyð“ aðstæður. Núna var ég að lesa Biblíuna hennar af áfergju og hún óttaðist að ég myndi beygla blaðsíðurnar.

Nokkrum dögum áður hafði ég gefist Kristi og strax vaknaði löngun til að lesa Biblíuna. Ég hafði reynt að lesa hana áður en það gekk illa. Núna, eftir að hafa eignast lifandi trú á Jesú, vaknaði þorsti eftir orði Guðs og ég fann hvernig lesturinn nærði nýtt líf sem hafði kviknað innra með mér.

Marteinn Lúther sagði: „Ég myndi ekki ráðleggja engum að senda barn sitt þangað sem Heilög ritning er ekki í öndvegi. Sérhver stofnun þar sem karlar og konur fást ekki stöðugt við orð Guðs hlýtur að spillast.“

Marteinn og fleiri siðbótarmenn vissu að ef strákar og stelpur gætu lesið Biblíuna á eigin spýtur myndi heimurinn breytast, og þeir höfðu rétt fyrir sér. Sagan sýnir að fátt hefur haft meiri áhrif heldur en einmitt þessi sannfæring þeirra og hvernig þeir fylgdu því eftir með því að þýða og gera Biblíuna aðgengilega fyrir alla.

Þessi tilraunaútgáfa af Markúsarguðspjalli hefur þann megintilgang að auðvelda ungu fólki á Íslandi að lesa og skilja orð Guðs á sínu móðurmáli. Ef vel tekst til viljum við þýða fleiri bækur og halda þannig áfram eins og Guð gefur okkur náð til.

Við vildum einnig gefa út texta sem leyfir öðrum að afrita og dreifa efninu á hvaða sniði eða miðli sem er í hvaða tilgangi sem er, jafnvel gegn gjaldi. Sjá nánar https://creativecommons.org/licenses/by-sa/4.0/deed.is

Til þess að við upplifum máttinn af orði Guðs er mikilvægt að við ekki aðeins lesum Biblíuna, heldur hugleiðum og notum einnig það sem við lesum. Við getum notað þessi 4 þrep til þess:

a. Veldu bók í Biblíunni til þess að byrja að lesa, helst í Nýja testamentinu. Ef þú þekkir Biblíuna lítið er gott að byrja á Markúsarguðspjalli.

b. Ekki lesa textann tilviljunarkennt heldur skipulega til þess að þú skiljir samhengi versanna og fáir góða og jafna næringu. Lestu hluta af textanum á hverjum degi og haltu áfram næsta dag þar sem frá var horfið.

c. Það er gott að lesa stóra texta úr Biblíunni, en það er mun betri langtímaaðferð að gefa sér tíma til þess að hugleiða nokkur vers í senn og nota þau.

a. Til hvaða manneskju er það skrifað? Af hverju? Um hvað snýst það?

b. Hvað held ég að það merki? Hvernig myndi ég útskýra það með mínum eigin orðum?

c. Hvað læri ég um Guð, loforð hans og eiginleika?

d. Hvað læri ég um hvernig ég eigi að lifa lífinu? Hvaða boð eða dæmi eru til að fylgja?

e. Hvaða sannindi finnast mér standa upp úr og hvernig styrkist trú mín með þessum texta?

a. Hvernig tengist þessi texti lífi mínu núna?

b. Hvað kenna þessi sannindi mér, hvaða synd finn ég Guð kalla mig til þess að iðrast fyrir og hvaða skref þarf ég að taka til þess að hlýða sannleikanum í þessum texta?

c. Hvað ætla ég að byrja að gera og hverju ætla ég að hætta til þess að nota þennan texta í lífi mínu?

a. Talaðu við Guð um það sem þú hefur lesið. Biddu hann um visku til þess að hjálpa þér að skilja og um styrk og hugrekki til þess að lifa sannleikann út með lífi þínu.

b. Notaðu það sem sem þú hefur lesið til þess að biðja fyrir þér, fjölskyldu þinni, kirkjunni, fólki sem þekkir Jesú ekki ennþá og heiminum.

Til þess að fá sem mest út úr tíma þínum er gott að taka frá svipaðan tíma á hverjum degi. Þar getur þú verið með glósubók og penna til þess að skrifa niður hvað sem er hjálplegt að muna og hugleiða: lykilvers, hugleiðingar, hugsanir fyrir daginn, hvatningar Heilags anda eða markmið.

Að taka frá tíma til að lesa og hugleiða nokkur vers í einu er best. En hluti af því getur verið að lesa oft yfir daginn, hvar og hvenær sem er. Sem dæmi: í bílnum, í strætó, lesa fyrir vin sinn, á kvöldin, á morgnanna, í hádeginu. Notaðu lausar stundir til að lesa því þannig fyllir þú líf þitt af orði Guðs og það mun hafa áhrif í lífi þínu.

Verkefnið er á vegum Every Nation Ísland, sjá www.everynation.is

Vefsvæði verkefnisins er 316.is/biblian

Öll aðstoð við rýni, ábendingar og endurgjöf á textanum er vel þegin. Textinn verður aðgengilegur á ebible.org jafnóðum og hann er þýddur. Hver sem er getur skráð sig á póstlistann á vefsvæði verkefnisins til að fá fréttir af verkefninu, eins og hvaða kaflar eru tilbúnir til yfirlestrar, og sent svo inn endurgjöf.

Þýtt var úr Scriveners Textus Receptus 1894.

Þóra Ingvarsdóttir leiddi vinnu við þýðingu en Ágúst Valgarð Ólafsson sá um verkefnisstjórn. Þeir sem sendu inn endurgjöf og rýni fá þakkir. Sérstakar þakkir fær Michael Johnson frá ebible.org fyrir ómetanlega aðstoð.

Þeim sem vilja vita meira um verkefnið, eins og hvaða þýðingarstíll var hafður að leiðarljósi, er bent á að hafa samband á vefsvæði verkefnisins.