5
Kẹ nwoke asụ:
1 Nwunne mu; mbụ
nggụbe nwamgbọko mu.
Mu bataakwaru lẹ mgbabu mu.
Mu chịkookwaru mẹeru mu;
yẹle ụnwu oshi ọdo,
eshigbaa kwẹkwekwe.
Mu riakwaru ẹbaku-ẹngu mu
yẹle manụ-ẹngu mu;
ngụwa mẹe mu;
mẹ mini ẹra-eswi mu.
Ndu ọ̀nyà mu; unu ria;
unu angụa
jeye teke n-yemobu a-wata unu ome l'ẹnya!
Kẹ nwanyi asụ:
2 Mu eku mgbẹnya; obu mu amụru ẹnya.
Ngabeduduphu!
Ọ kwa nwoke ono akụ ẹka l'ibo.
Yọ sụ mu:
“Nwanyi mbeke; nwunne mu:
Gụhaaru mu ụzo;
gụhaaru mu ụzo nggụbe ndo;
nggụbe onye nk'iya, ẹ te nwedu ẹkworo!
Kẹ l'ishi bụkotawa iya iji.
Ẹgbushi, nọ iya l'ishi;
bẹ iji ẹnyashi dajikwaru adaji.”
3 Mu yefuakwaru uwe mu.
?Bụ tẹ mu yee ya ọdo tọo?
Mu gudeekwa mini kwọo onwomu ọkpa.
?Bụ tẹ mu bya adzọo ya l'alị ọdo tọo?
4 Nwoke ono epyo ẹka lẹ mgbaku ibo;
ẹhu ayẹshihu mu l'ẹke ọ nọ.
5 Mu ezilihu tẹ mu gụhaaru iya ụlo.
Ẹka mu angụguhu lẹ manụ mẹeru;
mkpụshi-ẹka mu l'ọ ha amụkota fọrifori;
l'iphe e gude agụha ibo.
6 Mu abya agụhaaru nwoke ono ụlo;
a ma l'ẹ t'ọ nọhedu iya; l'ọ tụgbuwaru.
Atụgbu iya ono emee; meji atọfu mu.
Mu achọo ya nta;
chọo ya imo; mu ta phụ iya.
Mu ekua ya nta;
kua ya imo; tọ za.
7 Ndu nche aphụa mu teke
ẹphe tso l'ejephe lẹ mkpụkpu.
Ẹphe egude mu;
chia mu iphe; chifu mu ọnya;
bya eyeta mu uwe eli-ẹhu mu;
mbụ ndu nche ono,
eche ọnu-ụzo mkpụkpu ono.
8 Unubẹ ụnwanyi Jerúsalemu;
mu kfuru unu ẹge-a:
Teke unu phụru nwoke ono;
?bụ ngụnu bẹ unu e-kfuru iya.
Unu kfuru iya-a l'obu iya
egbu mu egbugbu!
Ụnwanyi Jerúsalemu asụ:
9 Nwanyi mbeke;
kanụru ayi ẹge a -phụ mini;
e -me ẹkfu ngu ono gude ka ndu ọdo mma!
?Nanụ ẹge a -phụ mini;
e -me ẹkfu ngu ono gude ka ndu ọdo mma
kparu iphe iizi ayi ẹge ono?
Kẹ nwanyi asụ:
10 Nwoke ono! Ọocha ụcha; nwua zịi.
E -dzua gidimu gadamu;
b'o sefujelephu iche.
11 Ishi iya dụ l'ọ bụ ọkpobe mkpọla-ododo;
ẹgbushi ya atụko wụzita l'ọ bụ nza ịnya;
kpee nụu l'ọ bụ ọphegu.
12 Ẹnya iya dụ l'ọ bụ kẹ ndo,
beru l'iku nggele,
e gude mini ẹra-eswi saa;
woru gvube l'ọ bụ ọjaja.
13 Ishi agbagba-nchị iya ẹphe
ẹbo dụ ùgvù l'ọ bụ igbo,
a dzashịru iphe eshi kwẹkwekwe.
Okfu, shi iya l'ọnu adụ mma
l'ọ bụ okfukfulike, alashị mẹeru mini.
14 Oshi-ẹka iya dụ l'ọ bụ
mgbọro mkpọla-ododo,
e gude kìrị́sòlàyìtù mee.
Ẹhu iya kwọru bụrukutu
l'ọ bụ ọdu-enyi, e fucharu efucha;
bya egude sáfàyà memaa ya emema.
15 Ọkpa iya kfụru kẹ
gborokoto l'ọ bụ itso,
e gude mkpuma ẹgiri mee;
ọphu a tụ-koberu lẹ ntọ-l'alị, bụ mkpọla-ododo b'e gude tọo ya.
L'ụgbugba ẹhu iya b'ọ kfụru gbororo l'ọ bụ
oshi sida ugvu ugvu Lébanọnu.
16 Olu okfu iya atsọje l'ọ bụ manụ-ẹngu.
Ọ bụlephu l'ọ ma mma l'amashi iya ike.
Unubẹ ụnwanyi Jerúsalemu;
onye ono bụ onye nọ mu l'obu;
bụru ọnya mu.