23
Okfu ikperazụ, shi Dévidi ọnu
1 Ọwaa bụ okfu ikperazụ, Dévidi:
“Ọwaa bụ olu Dévidi Jesi;
nwoke, Nchileke woliru eli;
onye Nchileke kẹ Jékọpu
teru manụ t'ọ bụru eze.
Ọ bụ iya agụjeru ndu
Ízurẹlu egvu-ọma.
2 Ume Ojejoje shi mu l'ọnu ekfu.
Okfu iya degeru mu
edegeru l'ọnu.
3 Nchileke kẹ Ízurẹlu kfuwaru.
Agbara-Mkpuma kẹ ndu Ízurẹlu;
bẹ sụru mu:
‘Teke madzụ achị l'ụzo,
vudo nhamụnha; gude
ọtsu-egvu Nchileke l'achị
4 bẹ ọoduje l'ọbu iphoro
nchi-abọhu teke ẹnyanwu
ahata ahata; m'ọ bụ teke
ẹnya buru igwe kọroro.
Ọoduje l'ọ bụ anwụ,
emeje t'ẹswa, kpofuta l'alị
teke mini chịtsuaru.’
5 ?Tọ bụdu ẹge ono
bẹ ndibe mu nọ;
ẹphe lẹ Nchileke tọo?
Kẹ l'o meru; mu l'iya agbaa ndzụ,
a-nọdu jeye lẹ tutu yoyo.
O meru iya; yọ ngụru angụru
l'iphemiphe ọbule;
bya emee ya t'ẹ b'ọ dụ iphe,
e-mebyi iya nụ.
Nchileke e-me tẹ
ndzọfuta mu dzua oke;
iphemiphe ọbule, agụ mu nụ
bẹ oo-meru mu.
6 Obenu lẹ 'ọ-ga-lẹ-mkpa phẹ
bẹ ee-tufatsua etufa l'ọbu
onye tufaru ogvu;
kẹ l'ẹ to gudejedu
ẹka achịta ẹphe.
7 Onye edenyi ẹka l'ogvu ono
gudefutaje iphe ígwè
m'ọ bụ oshi arwa;
gude kpota iya je akpọo ọku.”
Ndu kẹ Dévidi, ike ka l'ọgu
(1 Iphe 11:10-19)
8 Ọwaa bụ ẹpha ndu sọja Dévidu, bụ ike-ka-l'ọgu phẹ: Ishubelu onye Hakumonu. Ọ bụ iya shi bụru onye ishi l'ụmadzu ẹto phụ. Ọ bụ yẹbedua egudeje arwa jekfu ụnu ndu sọja labụ ọgu; gbushikota ẹphe l'ugbo lanụ.
9 Onye k'ẹbo, etsota iya nụ bụ Eliyéza Dodo kẹ Ahohi. Yẹbedua yịkwaphu l'ụmadzu ẹto phụ, bụ ndu ike-ka-l'ọgu phụ. O tso Dévidi mebyishia ndu Filisutayịnu teke ẹphe dzukoberu k'ọgu. Ndu Ízurẹlu atsụlaa azụ.
10 Obenu l'ọ vudoshiru ike gbua ndu Filisutayịnu jeye ẹka atsụshia iya ụme; kụpyabetsua ya akụpyabe l'ogu-mbeke, ọ pa. Ojejoje emee ya; yọ kpaa ike, dụ egvu mbọku ono. E metsua; ndu ọphu awụ-phu azụ; yọ bụwarua t'ẹphe chịta ngwa-ọgu kẹ ndu ọphu laru l'ọgu; bẹ ẹphe daphuru azụ.
11 Onye k'ẹto, etsota iya nụ bụ Shama Agee; onye Hararu. Ujiku lanụ bẹ ndu Filisutayịnu dzukojeru k'ọgu lẹ Lehi. Yo nweru ẹgu ẹke, a kọru azamu l'ẹke ono. Ndu sọja ndu Ízurẹlu eye ọkpa l'ọso gbalashịa.
12 Obenu lẹ Shama vudoshilerua ike l'echi-ẹgu ono; tso ndu Filisutayịnu ọgu; gbushia ẹphe. Ojejoje emee; ndu Ízurẹlu emekputa ẹphe ọhuma ọhuma.
13 Yo be teke aakpata iphe l'alị; ụmadzu ẹto l'ime ụkporo ụmadzu l'ụmadzu iri, bụgbaa ndu ishi ọgu ono awụru wụ-kfu Dévidi l'ọgba, nọ lẹ Adulámu. Teke ono bẹ igweligwe ndu Filisutayịnu wụfutaru bya adọru lẹ nsụda Réfa.
14 Teke ono bẹ Dévidi nọ l'ime ẹke ọ kpụru; yo shihu ike. Ndu sọja ndu Filisutayịnu adọru lẹ Bẹ́tulehemu.
15 Mini awata ọgu Dévidi. Yọ sụ: “Haa! Ndẹge o -nwekwanuru onye e-kutaru iya mini lẹ wẹlu, nọnyabe ọnu ẹke eeshije abahụ lẹ Bẹ́tulehemu tẹ ya ngụa!”
16 Unwoke ẹto ono, bụ ike-ka-l'ọgu phẹ ono akpata ụzo; swee ndu sọja Filisutayịnu l'ẹke ono, ẹphe dọru ono; je ekuta mini lẹ wẹlu ono, nọ-nyabe ẹke ono, eeshije abahụ Bẹ́tulehemu ono; wotaru Dévidi. E metsua; Dévidi ta ngụhe mini ono; yọ wụshiaru iya Ojejoje;
17 bya asụ: “E phokwa iya rụ ephopho; Ojejoje; kẹ tẹ ya ngụa mini ọwaa. ?Tọ bụdu ndzụ ndu-a; bẹ ẹphe jeru je etube lẹ mgbashị ẹge ee-shi t'e kuta iya?” Yo mee; tọ ngụhe mini ono. Ono bụ iphe ike, unwoke ẹto phụ, bụ ike-ka-l'ọgu phụ meru ndono.
18 Ọ bụ Abishayi yẹle Jóabu Zeruya bụ nwunne bụ onye ishi ụkporo unwoke l'unwoke iri ono, bụ ndu ishi ọgu ono. Abishayi bẹ gudeje arwa iya jekfu ụkporo madzụ l'ụmadzu iri l'ise ọgu; gbushikota ẹphe. E shiwaru ẹge ono; maru ẹpha iya l'ọbu k'ụmadzu ẹto ọphu.
19 Ọ bụ yẹbedua b'a katsụa ọkwabe ugvu l'ụkporo madzụ l'ụmadzu iri ono. Yọ bụru yẹbedua bụ onye ishi ẹphe; l'ẹbe ọbu l'a gụru iya ye l'ụmadzu ẹto phụ.
20 Benáya Jehoyada bụ ọ-ka-ike l'ọgu. Ẹke o shi bụ Kabuzelu. Ọ kparụ ike, dụ egvu. Ọ bụ yẹbedua gburu unwoke Móabu labụ ono, bụ ndu ike ono; bụru iya jejeru je egbua agụ l'ime iduma mbọku, mini suno jiru alị ono.
21 Benáya gbukwaruphu oke mkparawa onye Íjiputu, pa arwa byakfuta iya ọgu. Iphe, yẹbedua gude bakfuta iya bụ mgbọro; bya anata nwoke Íjiputu ono arwa ono, o gude ono; gude nmagbua ya.
22 Ono bụ ike, Benáya Jehoyada kparụ ndono. Yẹbedua b'a makwarụphu ẹpha iya ẹge a maru k'ụmadzu ẹto phụ, bụ ike-ka-l'ọgu phụ.
23 A -bya l'ụkporo madzụ l'ụmadzu iri phụ; b'o tso l'onye a kwata akwabẹ ugvu. Ọbu l'ẹ t'a gụkobekwa iya l'ụmadzu ẹto phụ. Tọ dụ iya bụ; Dévidi emee ya onye ishi lẹ ndu sọja, eche iya nche.
24 Ásahẹlu, bụ nwunne Jóabu tso l'ụkporo madzụ l'ụmadzu iri ono. Ndu ọdo bụ Ẹluhananu Dodo kẹ Bẹ́tulehemu;
25 Shama kẹ Harọdu; Elika kẹ Harọdu;
26 Helẹzu kẹ Paliti; Ira, bụ nwatibe Ikeshi ọphu Tékowa;
27 Abiyéza kẹ Anatọtu; Mebunayi kẹ Husha;
28 Zalụmonu k'eri Ahohi; Maharayi kẹ Netofa;
29 Helẹbu Bena kẹ Netofa; Itayi Ribayi kẹ Gíbiya l'alị ndu Bénjaminu;
30 Benáya kẹ Piratonu; Hidayi kẹ ụzo nggele Gaashị;
31 Abiyalụbonu kẹ Araba; Azụmavetu kẹ Bahurimu;
32 Ẹliyahuba kẹ Shalụbonu; mẹ ụnwu Jashẹnu; mẹ Jonátanu;
33 Shama kẹ Hararu; Ahiyamu Shararu kẹ Hararu;
34 Elifẹletu Ahasụbayi kẹ Maaka; Eliyamu Ahitofẹlu kẹ Gilo;
35 Hezuro kẹ Kamẹlu; Parayi kẹ Arabu;
36 Igalu Nétanu kẹ Zóba; Bani k'ikfu Gádu;
37 Zelẹku, bụ onye Amọnu; Naharayi kẹ Berọtu, bụ onye achịjeru Jóabu Zeruya ngwa-ọgu;
38 Ira kẹ Itiru; Garẹbu kẹ Itiru kwaphụ;
39 mẹfua Uráya, bụ onye Hetu. Iphe ẹphe tụkoru dụ bụ ụkporo madzụ l'ụmadzu iri l'ẹsaa.