99
1 Ọ kwa Ojejoje bụ eze;
tẹ ndiphe nmahụkwa jijiji.
Ọ nọ l'aba-eze iya l'eli cherobimu.
Tẹ mgboko mgburumgburu
nmahụkwa kpakpakpa.
2 Ojejoje hakwa nshinu;
mbụ onye ono, bu lẹ Záyọnu ono.
E woliru iya; yọ ka
iphe bụ mbakeshi nshinu.
3 T'ẹphe jaa ẹpha ngu,
ha nshinu ajaja;
mbụ ẹpha ngu ono,
ndiphe atsụ egvu ono.
Ọ dụ nsọ.
4 Eze ọbu ha nshinu.
Iphe adụje iya mma bụ ikpe,
vudo nhamụnha.
Ome iphe t'ọ vudo
nhamụnha b'i meru;
yọ ngụru angụru.
L'ẹhu ụnwu Jékọpu b'i
meru iphe vudo nhamụnha;
bụru iphe dụ mma.
5 Unu mejee tẹ Ojejoje,
bụ Nchileke ayi dee ude.
Unu nọdu iya l'iku ọkpa; baaru iya ẹja.
Ọ dụ nsọ.
6 Mósisu mẹ Érọnu shi
tsoru lẹ ndu achịjeru Nchileke ẹja.
Sámẹlu eshi tsoru lẹ ndu shi
akpọ-kuje ẹpha iya.
O shi abụje; ẹphe -kpọ-ku
ẹpha Ojejoje; yọ za ẹphe.
7 O shi anọduje l'urukpu,
kpụru rogbodongu kfuru yeru ẹphe.
Ẹphe eshi edobeje ekemu iya;
l'eme iphe ọ tọru ẹphe ọkpa iya.
8 Nggụbe Ojejoje,
bụ Nchileke ayi;
i shi azajẹ ẹphe teke ẹphe kpọ-kuru ngu.
I shi ahụ̀je ndu Ízurẹlu
àhụ̀hù teke ẹphe shisweru ụzo ngu.
Obenu l'i shi bụru ẹphe Nchileke,
agụjeru onye meru ẹji nvụ.
9 Unu mejee tẹ Ojejoje,
bụ Nchileke ayi dee ude.
Unu nọdu l'ugvu iya,
dụ nsọ; baaru iya ẹja;
kẹle Ojejoje, bụ Nchileke ayi dụ nsọ.