94
1 Nggụbe Ojejoje,
bụ Nchileke,
agwatajẹ ụgwo iphe!
Nggụbe Nchileke,
a gwatajẹ ụgwo iphe;
nwunua phoo l'ọ bụ ọku.
2 Gbalihunu nggụbe onye
ekpeje mgboko ikpe;
kfụa ndu eku onwẹphe
ekuku ụgwo iphe ruberu ẹphe.
3 Nggụbe Ojejoje;
?bụ teke ole bẹ ndu
akirishi a-ha ọtu
okokooko-o, ẹphe atụ-a?
4 Ndu eme ẹjo iphe anọduje
atụ ọnu onwẹphe ẹge ẹphe ẹ ta ahadu.
Ẹphe ekfunukaje okporokpo okfu;
l'asaphe oke nsasa.
5 Ndibe nggụbe Ojejoje;
bẹ ẹphe egweje ogwe uri.
Ndu ono, bụ òkè-iphe ngu ono;
bẹ ẹphe anọduje akpapyashị ishi.
6 Ẹphe egbushije ụnwanyi, maa tụfuru;
mẹ ụnwegirima,
a tọru ogbee;
l'egbushikwaphu ndu mbyamụmbya.
7 Ẹphe -nọdu; ẹphe asụ:
“Lẹ Ojejoje ta dụkwa iphe ọophuje;
lẹ Nchileke kẹ Jékọpu ta
dụkwa iphe ọokpaje ishi iya.”
8 T'ọwaa dokwaa unu ẹnya;
unubẹ ndu ono,
egomunggo swehuru l'ẹke, madzụ nọ ono;
mbụ unubẹ ndu ono, eme eswe ono;
?bụ teke ole bẹ unu
a-makpọoru iphe.
9 Onye ono, bụ iya
kfụberu madzụ nchị ono;
?ọoda nkịchi tọo.
Tọo onye ono, bụ iya
moberu madzụ ẹnya ono;
?tọo phụdu ụzo tọo.
10 Tọo onye ono, bụ iya
ahụ̀je iphe bụ mbakeshi àhụ̀hù ono;
?tọo hụ̀du unubẹdua tọo?
Mbụ; onye ono, bụ iya
anọduje ezi madzụ mmamiphe ono;
?bụ yẹbedua te gbe madu iphe tọo.
11 Ojejoje makọtaru iphe madzụ arị.
Ọ maru l'ọriri ẹphe bụkota mkpọkoro ọriri.
12 Ọnu-ọma bụ k'onye
nggụbe Ojejoje ahụ̀je àhụ̀hù;
mbụ onye iigudeje ekemu ngu ezi iphe.
13 Onye ono bẹ ịinuje ike,
oo-gude tagbua iphe-ẹhuka lẹ nshi;
jeye teke ee-gwu nsụ tẹ ndu akirishi nwulahu.
14 Kẹle Ojejoje ta ahadu ndu nk'iya.
Ẹ tọo gbadodu ndu,
bụ òkè-iphe iya.
15 Kẹle ndu ikpe a-wata okpe
ikpe, dụ maa.
Yọ bụleruphu ndu obu
gụru iphoro bụ ndu
a-dụ ike tsokota ikpe ono.
16 ?Bụ onye e-gbeshi je alụaru mu ndu akirishi?
?Bụ onye e-vudo l'ẹkiya
nke mu; je alụaru mu ndu ẹjo iya ono?
17 Ndẹge Ojejoje ta gbaru mu mkpu;
m'a ga azahawa mu rụ teke teru etete.
18 Teke mu chiru mkpu lẹ mu adaakwa;
bẹ nggụbe Ojejoje gude kẹ
l'i yeru mu obu wọta mu.
19 Teke mu wataru ọri oke ọriri;
b'ị dụru mu ike; mee;
ẹhu atsọlahaa mu ẹna.
20 ?Ii-kwe tẹ nggu lẹ ndu ishi,
ẹ tẹ emedu iphe vudo nhamụnha
emegba iphe tọo;
mbụ ndu ono, egudeje
ekemu l'emegbu ndu
ẹphe achị emegbu ono?
21 Ẹphe edzukobeje;
chịa idzu ẹge ẹphe e-shi
kpapyaa ndu doberu ẹka ndoo ishi.
Ẹphe ekpee kpee onye
ẹ ta dụdu iphe o meru nkfugbu.
22 Obenu l'ọ bụ Ojejoje bụ
egbochitaje mu nụ.
Ọo Nchileke bụ
Agbara-mkpuma ono,
mu agbabajẹ;
je edomia onwomu ono.
23 Ọo ya a-kfụ ẹphe ụgwo
iphe dụ ẹji, ẹphe eme;
mee t'ẹphe bụru kpurupyata
k'ẹjo iphe ono, ẹphe eme ono.
Ọo Ojejoje, bụ Nchileke
ayi e-me t'ẹphe bụru kpurupyata.