92
Egvu-ọma mbọku ọtu-ume
1 Ọ dụ mma t'a jajẹ Ojejoje ajaja;
t'e gudeje egvu tua nggụbe
Ọkaribe-Kakọta-Nụ ẹpha;
2 mbụ t'e gbeshije l'ụtsu;
raaru iya ndiphe arara l'i yeru ẹphe obu.
Teke o beru l'ẹnyashi;
e kfuaru ẹphe l'ị bụ
o-me-g'o-kfuru.
3 Ọo-nọdu ada l'egvu l'ọ bụ
une, e gude ụdo iri kpaa;
mẹ ogele, ada gengugengu;
4 kẹle nggụbe Ojejoje
gudewa iphe dụ mma;
mee t'ẹhu tsọje mu ẹna.
Mu agụje egvu
ẹhu-ọtso-ẹna
k'iphemiphe ọbule,
i gude ẹka ngu emee.
5 Nggụbe Ojejoje; lewaru ẹge
iphe iimeshi habe nshinu.
Ẹge ono; bẹ ọriri ngu
dụkwaphu ogvu.
6 Onye ẹ te nwedu
egomunggo ta madu
ẹge ọ dụ;
ọphu oo-dokwa nụ onye eswe ẹnya;
7 A makwarụa lẹ ndu akirishi
anọduje arịshi l'ọ bụ ẹta;
iphe bụ iphe ndu eme ẹji
byiru ẹka; yọ bụru ụpete.
Ọbule ẹphe emekochaa
bụru kpurupyata gbururu jeye.
8 Obenu lẹ nggụbe Ojejoje
a-nọdu ede ude jeye lẹ tutu yoyo.
9 Ndu ọhogu ngu; nggụbe Ojejoje;
ndu ọhogu ngu a-bụru kpurupyata.
Achịkashia ndu akirishi
l'ẹphe ha; ẹphe agbaa nanụ nanụ.
10 Obenu l'i mewaru
t'agburu-ẹhu mu dụ l'ọ bụ k'atsụ.
Nggu abya eworu manụ,
eshi kwẹkwekwe wụa mu l'ishi.
11 Mu gudewa ẹnya mu
phụ lẹ ndu ọhogu mu phẹ
b'e mekputawaru.
Mu gudewa nchị mu nụa
lẹ ndu nọru mu l'ẹjo oshi; b'a vụwaru l'ọgvu.
12 Ndu doberu ẹka ndoo
a-nọdu aja ajaja l'ọ bụ nkfụ.
Ẹphe a-nọdu evu l'ọ bụ
oshi sida k'ugvu ugvu Lébanọnu,
13 e yeru l'ime ụlo kẹ Ojejoje.
Ẹphe a-nọdu l'ogbodufu
Nchileke ayi aja rikarika.
14 Ẹphe -kahụkpoonu
m'ọo akahụ; bẹ ẹphe
a-nọdu amịle-e nebyi.
Ẹphe adụle-ẹ
nongini-nongini; shihu ike;
15 k'ọphu ẹphe e-shi ẹge ono
koshi lẹ Ojejoje bụ onye doberu ẹka ndoo;
bụru Agbara-Mkpuma nke mu;
to nwe iphe ẹ te vudodu
nhamụnha, ooyeje ẹka.