88
Egvu-ọma; ẹ́vù, Hemanu, bụ o-shi-l'eri Zera raru nụ onye ishi egvu tẹ Ụnwu Kora gụa. T'e gude olu-aphụ gụa ya
1 Nggụbe Ojejoje,
bụ Nchileke, adzọje mu nụ;
mu anọduje ngu l'ifu;
eswe l'ẹnyashi;
l'akwa ẹkwa onwomu.
2 Tẹ ekfukfu, mu ekfu anụ ngu ruaru ẹke ị nọ.
Ngabẹnu nchị l'ẹkwa,
mu akwa;
3 kẹle ndzụ mu l'ọ ha;
bẹ iphe-ẹhuka jiru iya;
oge ọnwu mu atụwa kperere-kperere.
4 A gụwaru mu lẹ ndu
aabyawa okpochi ẹja.
Mu dụwa l'ọ bụ nwoke,
ike gvụru.
5 E wowaru mu nwuhaaru ndu nwụhuru anwụhu.
Mu dụwa l'ọ bụ onye
e gburu tọgbo l'ime ili;
mbụ l'ọ bụ ndu ono,
ẹ tịi nyatahẹdu ono;
mbụ ndu ono, unu l'ẹphe bukahuru;
ọphu iiletahẹedu ẹphe ẹnya ono.
6 I chewaru mu l'ili, katsụkpo ogvu;
bụru iya kakọta ọgba ọchi.
7 I wowaru oke ẹhu-eghughu ngu byabẹ mu.
I gudewa akpara-mini
nke ngu nwuru mu ye l'ime mini.
8 Ị natawaru mu ndu mu l'ẹphe
shi eshi ọkpobe ọ̀nyà.
I mewaru; ẹphe anọduje
ebu ụbara eyeru mu.
I gubudowaru mu l'ẹke
mu ta alụfuta-ghehedu.
9 Mu jewaru iphe-ẹhuka jeye
ẹnya agbahu mu ọchi.
Mbọku-mbọku;
bẹ mu anọduje eku
nggụbe Ojejoje.
Lekwa ẹka mu ẹbo-ẹbo ẹge
mu chiliru ngu iya.
10 ?Iimeje iphe dụ biribiri
koshi ndu nwụhuwaru anwụhu tọo?
Ndu nwụhuru anwụhu;
?ẹphe e-gbeshi jaa ngu ajaja tọo?
11 ?Aanọduje l'ime ili atụ ọnu
ẹge i yeberu madzụ obu tọo?
?T'aanọduje l'ẹke eegwe
madzụ ụrekfu kfua l'ị bụ
o-me-g'o-kfuru?
12 ?Bụ l'ẹke gbaru ọchi;
bẹ aanọduje amaru iphe dụ biribiri, iimeebe?
T'aanọduje l'alị ẹke ẹ ta nyatajẹdu
onye laru iya nụ;
kfua ẹge ị bụta-be onye
doberu ẹka ndoo?
13 Obenu lẹ mu araku
nggụbe Ojejoje
t'ị bya agbaaru mu mkpu.
Iphe bụ ụtsu, sweru esweswe;
bẹ mu ekfukotaje anụ ngu.
14 ?Bụ ngụnu kparu iphe
ị jịkaru mu
nggụbe Ojejoje?
?Bụ ngụnu kparu iphe
i sweru mu ẹnya tengu?
15 Eshinu mu bụ nwata;
b'e shi kpata mu ẹhu;
k'ọphu mu nọwaa
dzẹe dzẹe ndzụ.
Ị kpawaru mu ẹhu;
ike agvụwa mu;
mu ta amahẹ ụzo,
mu e-shi iya.
16 Oke ẹhu-eghughu ngu
dzuwaru mu ẹhu.
I yetawaru mu egvu;
k'ọphu bụ lẹ mu bụwa
iphe mmanu.
17 Mbọku-mbọku;
bẹ ẹphe ekephetaje mu
l'ọ bụ onye utso ribudoru.
Ẹphe rikputawaru mu erikputa.
18 Ị nafụwaru mu ndu mu
l'ẹphe shi ayị;
mẹ ndu yeru mu obu.
Nta-a bụwa ẹkpuru-ọchi
bụ ẹgiri ọnya mu.