86
Dévidi ekfu anụ Nchileke
1 Ngabẹnu nchị;
nggụbe Ojejoje; za mu oku;
kẹle mu bụ onye ụkpa,
ẹ te nwedu ẹge ọ haru iya.
2 Letanu mu ẹnya;
kẹle mu yeru ngu obu.
Ọ bụ nggu bụ Nchileke mu;
dzọfutanu mụbe nwozi ngu,
dakoberu ngu nụ.
3 Phụnuaru mu imiko;
nggụbe Nnajiufu;
kẹ l'ọ bụ nggu;
bẹ mu anọduje
akpọ-ku mkpụrumkpuru.
4 Menua t'ẹhu tsọo mụbe nwozi ngu ẹna;
kẹ l'ọ bụ nggụbe Nnajiufu;
bẹ obu mu kpamukpamu akpọ-ku.
5 Nggụbe Nnajiufu;
ị bụ onye ọma; bya abụru
onye agụjeru madzụ nvụ.
Iphe bụ ndu arakuje ngu nụ;
bẹ iiyejeru obu nshinu.
6 Ngabẹ nchị; nụaru iphe
mu ekfu anụ ngu;
nggụbe Ojejoje!
Ngabẹnu nchị;
nụa mkpu, mu echiku ngu
t'i meeru mu eze-iphe-ọma!
7 Teke iphe atsụ mu l'ẹhu;
bẹ mu akpọ-kuje ngu;
kẹle mu maru l'ịi-nụ-a olu mu.
8 A -bya l'iphe bụ agwa;
b'ẹ t'o nwedu ọphu dụ
l'ọ bụ nggụbe Nnajiufu;
ọphu ọ dụdu iphe ẹphe eme,
aa-tụru yeru ọphu iime.
9 Iphe bụ mbakeshi ono,
bụ nggu gude ẹka ngu
mee ẹphe ono
e-mekochaa bya abaaru
nggụbe Nnajiufu ẹja;
jaa ngu ajaja.
10 Onanu abụru kẹ l'ị ha nshinu;
l'anọduje eme iphe,
dụ biribiri.
Ọ bụ nggụbedua
nwẹnkinyi ngu bụ
Nchileke.
11 Nggụbe Ojejoje;
kpọ-ziaru mu ụzo ngu;
k'ọphu mu a-nọdu etso
ụzo ire-lanụ ngu ono.
Menua t'ọriri mu bụru nanụ l'ẹke ị nọ;
k'ọphu mu a-nọdu atsụ ẹpha ngu egvu.
12 Mu e-gude obu mu l'ọ ha
kele ngu ekele;
nggụbe Nnajiufu,
bụ Nchileke mu.
Mu a-nọdu aja ngu ajaja jeye lẹ tutu yoyo;
13 kẹ l'i yenukaru mu obu eyenuka;
bya anafụtawa ndzụ mu l'alị maa.
14 Nggụbe Nchileke;
ndu eku onwẹphe ekuku
wụ-lihuakwaru bya etso mu okfu.
Ndu ẹ ta phụjeduru madzụ
imiko edzukobe l'achị nta ishi mu;
mbụ ndu ono, ẹ te nwedu
iphe ẹphe gụberu nggụbe Nchileke ono.
15 Obenu lẹ nggụbe Nnajiufu,
bụ Nchileke aphụjeru madzụ imiko;
l'emejeru madzụ
eze-iphe-ọma.
Ẹhu te eghujedu ngu
eghughu ẹgwegwa.
N-yemobu ngu;
bẹ iiyeje yee ya k'etsutu iya.
Ị bụkwaphu
o-me-g'o-kfuru.
16 Ghanuaru mu ifu;
phụa mu rụ imiko!
Menua tẹ ike nọdu mụbe
nwozi ngu l'ẹhu!
Dzọnua mụbe nwatibe,
nwanyi ono,
ejeru ngu ozi ono!
17 Koshinu mu iphe-ọhubama,
e-me tẹ mu maru l'ị dụ
mma; k'ọphu bụ;
ndu ọhogu mu -phụa ya;
iphere egude ẹphe;
kẹle nggụbe Ojejoje
gbawaru mu mkpu bya adụa mu obu.