84
Egvu-ọma, e deru nụ onye ishi egvu t'ụnwu Kora gụa; t'e gude ngwo egvu gítitu gụa ya
1 Iphe ẹke i bu amakwanụ;
nggụbe Ojejoje, bụ Ọkaribe-Kakọta-Ike.
2 Ọogushi mu ẹgu ike; meji l'atọfu mu atọfu;
tẹ mu nọdu l'eze-ụlo Nchileke.
Obu mu; mẹ ẹhu mu l'ọ ha
ara l'araku Nchileke ono, nọ ndzụ ono.
3 Ọkpaleboku nwetsuaru ẹke
oobugbaa l'eze-ụlo ngu ono;
ẹsa enwekwaruphu ẹke
ọokpaje ẹkfuna; nọdu zụshia ụnwu.
Ẹke ono bụ l'iku
ẹnya-ngwẹja
nggụbe Ojejoje,
bụ Ọkaribe-Kakọta-Ike;
mbụ nggụbe Eze mu, bụ Nchileke mu.
4 Ọnu-ọma bụ ndu bu ebubu l'eze-ụlo ngu;
kẹ l'ẹphe anọduje etu ngu ẹpha tekenteke.
5 Ọnu-ọma bụ kẹ ndu bụ nggu
bụ agbaru-ike ẹphe;
mbụ ndu bụ ẹge ẹphe e-me
jerua Ugvu Záyọnu bụ iphe
uche iya echije ẹphe ẹhu.
6 Ọobuje; teke ẹphe esweta
lẹ nsụda nsụda Baka;
yọ dụ ẹphe l'ọ bụ ẹke mini awụ;
dụkwaphu ẹphe l'ọ bụ ẹke
mini udzu-mini chishiru ike;
ẹkemeke abụru okpuru.
7 Ẹphe anọduje aka oshihu ike l'eje;
gbururu jeye teke ẹphe
e-jekfu Nchileke lẹ
Ugvu Záyọnu.
8 Nggụbe Ojejoje;
nggụbe Nchileke,
bụ Ọkaribe-Kakọta-Ike;
nụnua iphe mu ekfu anụ ngu!
Ngabẹru mu nchị;
nggụbe Nchileke kẹ Jékọpu!
9 Ọ bụ nggu bụ onye ono,
egbochitaje ayi ono
nggụbe Nchileke!
Lenua onye ono, ị wụru
manụ l'ishi ono ẹnya t'ọ baa ngu l'obu.
10 Onye nọru ujiku lanụ
l'eze-ụlo ngu kakwa
onye nọru ụnu afa labụ
l'ụkporo afa iri l'ẹke ọdo mma.
Ọ kakwa mu mma tẹ mu
bụru onye nche l'ọnu-ụzo
ụlo Nchileke; karia lẹ mu
bu l'ụlo ẹjo madzụ;
11 kẹle Ojejoje, bụ Nchileke
dụ l'ọ bụ ẹnyanwu;
bụru onye egbochitaje ayi.
Ọ bụ Ojejoje emejeru
ndiphe eze-iphe-ọma;
l'emeje t'a kwabẹ madzụ ugvu.
Ẹ tọ dụdu iphe dụ mma,
o kejeru ẹka ngvu l'ẹ tọo
nụdu iya ndu ụta ẹ-ta nọdu lẹ ndzụ ẹphe.
12 Nggụbe Ojejoje,
bụ Ọkaribe-Kakọta-Ike;
ọnu-ọma bụ k'onye bụ nggu b'ọ dakoberu.