79
Egvu-ọma, Ásafu deru
1 Nggụbe Nchileke;
phụwaru lẹ ndu ọhodo
nwubataakwaru l'alị-a,
bụ òkè-iphe ngu-wa.
Ẹphe farụshiakwaru
eze-ụlo ngu ono, dụ nsọ ono;
bya emewaa Jerúsalemu;
yọ bụru ikpọzu.
2 Odzu ndu ejeru ngu ozi;
bẹ ẹphe tọgbogbaaru
ụnwenu, ephe l'eli t'o ria;
mbụ l'odzu ndu nsọ ngu;
bẹ ẹphe wowaru tụaru
anụ-ẹgu-ẹgbudu t'ẹphe ria.
3 Jerúsalemu mgburumgburu;
bẹ ẹphe wụaru mee madzụ l'ọ bụ mini.
Ẹ to nwehekwa onye,
phọduru nụ, e-li ndu ono,
e gbushiru ono.
4 Ndu obutobu ayi phẹ;
mẹ ndu bupheru ayi mgburumgburu
tụkowa azụru ayi ukwe; l'achị ayi ọchi.
5 ?Bụ teke ole bẹ ẹhu
e-ghubebe ngu eghughu;
nggụbe Ojejoje?
Ẹhu; ?oo-ghuwa ngu rụ jeyewaru tọo.
?Bụ teke ole bẹ oke
ẹhu-eghughu ngu
e-nwubebe l'ọ bụ ọku jeye?
6 Wonuru ẹhu-eghughu
ngu tukoshi ndu ọhodo ono,
ẹ ta madu ngu nụ ono!
Tukoshikwa iya phụ alị-eze ono,
ẹ-te ekujedu ẹpha ngu ono;
7 kẹ l'ẹphe gbuwaru ndu eri Jékọpu pyaapyaa;
bya emebyishiwa ufu iya.
8 Be emekwa t'ayi nwụa ọnwu
iphe dụ ẹji,
nna ayi oche phẹ meru!
Phụnuaru ayi imiko ẹgwegwa;
kẹ l'ayi ta mahẹdu ụzo ayi e-shi iya.
9 Yeru ayi ẹka
nggụbe Nchileke,
bụ onye ndzọfuta ayi;
k'ọphu ee-shi ẹge ono
kwabẹ ẹpha ngu ugvu.
Guderu k'ẹpha ngu nafụta ayi;
nggu agụaru ayi nvụ
l'iphe dụ ẹji ayi meshiru.
10 ?Bụ ngụnu meru iphe
iphe bụ mbakeshi ajị ẹke Nchileke ayi nọ?
Nọdunu ayi l'ifu mee t'iphe
bụ mbakeshi maru
l'ị gwataru ụgwo ọchi mee
ndu ono, ejeru ngu ozi,
ẹphe gbushiru ono.
11 Tẹ ude, ndu nọ l'ọka mkpọro
atsụ runua ngu l'ẹhu!
Gudenu agburu-ẹhu ngu
mee tẹ ndu e kperu
nkfugbu nweru onwẹphe.
12 Kfụa ndu obutobu ayi phẹ
ụgwo iphe dụ ẹji,
ẹphe meru ngu ugbo ẹsaa;
mbụ iphe-iphere, ẹphe
mekotaru kpua
nggụbe Ojejoje;
13 k'ọphu ayịbe ndibe ngu;
mbụ ayịbe atụru ono,
iiche nche ono etua ngu ẹpha
jeye lẹ tutu yoyo;
mbụ l'ayi e-tu ngu ẹpha
shita l'ọgbo sweru ọgbo.