77
Egvu-ọma, Ásafu deru nụ onye ishi egvu, bụ Jedutunu
1 Mu rakuru Nchileke
t'ọ gbaaru mu mkpu.
Mu araku Nchileke
t'ọ nụa olu mu.
Yọ nụa ya.
2 Teke mu nọ l'iphe-ẹhuka;
bẹ mu chọru Nnajiufu.
Ẹnyashi mgburumgburu;
bẹ mu chilikotaru ẹka;
ekfu anụ Nchileke.
Ọphu ọkpoma egvuduru mu egvuru.
3 Ọobuje; mu rịta
nggụbe Nchileke;
mu azụa ume.
Mu gbawaru
mgbamuche; ike agvụ mu.
4 I meru; mgbẹnya agbalaa mu l'ẹnya.
Iphe ono tsụta-beru mu l'ẹhu;
k'ọphu bụ l'ọ kpọru mu okfu.
5 Mu bya egude egomunggo;
lee ẹnya lẹ teke ndiche;
mbụ teke ọhazu.
6 Mu abya anyata egbe egvu,
mu shi anọduje agụ l'ẹnyashi.
Mu bya awata ọori
ẹge iphe shi dụ teke ono.
A nọnyaa; mu ajịa onwomu; sụ:
7 “Nnajiufu; ?ọo-jịkawaru ayi
jeye lẹ gbururu tọo.
?To nwedu teke
ọo-nọnyaa; ghakwadụaru ayi ẹnya ọdo tọo?
8 N-yemobu iya ono,
ẹ ta gvụjedu agvụgvu ono;
?too ruhedu ayi ẹka ọdo tọo?
?Ọ bụ l'ẹ too mehedu iphe ono,
o kweru ayi ụkwa iya ono tọo?
9 Nchileke; ?ọ zahawaru
obu-imiko iya ono tọo?
?O gudewa ẹhu-eghughu
zahaa obu-imiko iya ono tọo?”
10 Ya ndono; mu asụ: “L'ọphu,
kakwa mu ọtsu l'ẹhu;
bụ lẹ Ọkaribe-Kakọta-Nụ;
bẹ ike ta dụhedu.”
11 Mu ta azahadụ
iphe-kpangangangu, Ojejoje shi emeje.
Mu a-nyatakọta iphe
biribiri, o shi emeje.
12 Mu a-nọdu rịa ọriri
kẹ iphe ono, i mekotaru ono;
mbụ eze iphe ono, i shi emeshije ono.
13 Nggụbe Nchileke;
ụzo ngu dụ nsọ!
?Nanụ agwa, aa-tụru yeru Nchileke ayi?
14 Ọ bụ nggu bụ Nchileke,
emeje iphe-ọphulenya.
Iimeje tẹ ndiphe phụa
ẹge ike ngu habe.
15 I gude ike ngu gbafụta ndibe ngu;
mbụ ụnwu Jékọpu;
mẹ únwu Jósẹfu.
16 Mini phụru
nggụbe Nchileke;
tsụa egvu;
ebo mini awata ọnma jijiji.
17 Igwe ruru eruru chịa mini;
igwe agbalahaa agbagba;
ebemu-igwe ekulahaa ikufu.
18 A nụru ọda egbe-igwe,
ị tụ l'echi oke phẹrephere.
Ebemu, iiku kẹ
mẹremu mẹremu abụru
iphoro, e gude aphụ ụzo lẹ mgboko.
Alị atsụlahaa egvu; wata ọnma jijiji.
19 Ị tọru ụzo ngu l'echi eze ẹnyimu.
I shijaru eze echi-ẹnyimu,
ha nshinu sweta;
ọphu o nwedu ẹke a phụru apata-ọkpa ngu.
20 Ị shi l'ẹka Mósisu yẹle Érọnu
dua ndibe ngu l'ọ bụ onye edu atụru.