66
Egvu-ọma, e deru nụ onye ishi egvu
1 Unubẹ ndiphe l'unu ha;
unu tụaru Nchileke ụzu ẹhu-ọtso-ẹna!
2 Unu gụa egvu gude tushi iya ẹpha!
Unu tushi iya ẹpha; jaa ya ajaja!
3 Unu sụ Nchileke:
“L'iphe bụ iphe ọonoduje
eme dụkwa biribiri!
Ike Nchileke hatabe nshinu;
k'ọphu bụ lẹ ndu ọhogu iya
adaje iya pẹe l'ifu;
l'ẹke ẹphe atsụ iya egvu.
4 Iphe bụ ndiphe adaje iya
pẹe l'ifu; baaru iya ẹja;
gụa egvu nụ iya.
Mbụ l'ẹphe agụje egvu gude jaa ya ajaja.”
5 Unu bya aphụ ozi, Nchileke jeru!
Nchileke dụkwa biribiri
l'iphe oomeru ụnwu eliphe.
6 O meru ẹnyimu; yọ bụru alị, kpọhuru nkụ.
Ẹphe egude ọkpa wụ-swee ya.
Ẹhu atsọo ayi ẹna l'ẹke ono; kẹ iphe o meru.
7 O gude ike nk'iya bụru eze gbururu jeye.
Ẹnya iya aphụkotaje iphe bụ mbakeshi!
Ọo ya bụ t'ẹ b'ọ dụkwa ndu
ono, kwefuru íkè ono,
e-je iya otso ọgu!
8 Unu tua Nchileke ayi ẹpha; unubẹ ndiphe!
T'a nụnua ajaja, unu aja iya!
9 Ọ bụ iya doberu ayi ndzụ;
bya emee tẹ ẹturu be échi ayi.
10 Ishi iya abụru lẹ nggụbe
Nchileke dataru ayi;
bya emee ayi; ayi adụ mma
l'ọ bụ mkpọla-ọcha, a hụru l'ọku.
11 I dutaru ayi ye l'ọnya;
bya eworu oke ivu tukobe
ayi l'okpurukpu-azụ.
12 I meru t'ụnwu eliphe wee ayi ishi kperekpere.
Ayi jeru iphe anwụ chiru ayi;
mini anmaa ayi.
Obenu l'i metsuaru;
duta ayi dobe l'ẹke ayi tụsaru ẹhu.
13 Mu e-gude ngwẹja-ukfuru bya l'ụlo ngu;
mekotaru ngu iphe mu
riburu lẹ mu e-meru ngu.
14 Mu e-me iphe mu gude ọnu
mu kfua lẹ mu e-meru ngu;
teke mu shi eje iphe-ẹhuka.
15 Mu a-kpụta ebyila, ẹba nọ;
gude gwooru ngu
ngwẹja-ukfuru.
Mu e-gbushiru ngu
oke-eswi; gbushiaru eghu.
16 Iphe bụ unubẹ ndu atsụ Nchileke egvu;
unu byakpọduaphu bya angabe nchị;
tẹ mu kọoru unu iphe o meru lẹ ndzụ mu.
17 Mu rakuru iya t'ọ gbaaru mu mkpu;
bya egude ọnu mu gụa egvu; jaa ya ajaja.
18 Ndẹge ọ -bụru l'o nweru
ẹjo iphe, mu meru;
woru iya domia l'obu mu;
mẹ Nnajiufu ta ga
angabẹkwa nchị; nụa olu mu.
19 Obenu l'ọ ngabẹru nchị;
nụa olu mu teke mu kfuru nụ iya.
20 T'ajaja bụkwaru kẹ Nchileke;
mbụ onye ẹ ta ajịkadu ekfukfu,
mu kfuru nụ iya;
ọphu ọ budu l'ọ jịkajeru lẹ
ya te eyeheduru mu obu.