56
Egvu-ọma, Dévidi deru nụ onye ishi egvu; t'e gude olu-egvu “Ndo Beru lẹ Achi, nọ ote-ẹnya” gụa ya
Teke o deru iya bụ teke ndu Filísutiya guderu iya lẹ Gatụ
1 Nggụbe Nchileke;
phụaru mu rụ imiko;
lẹ ndiphe achịkwa mu kẹ kpabẹ-kpabẹ.
Mbọku-mbọku, mụtaru amụta;
bẹ ndu ọhogu mu akabajẹ mu rụ ọkpa ẹhu.
2 Mbọku-mbọku, mụtaru amụta;
bẹ ndu ọhogu mu anọduje achị nta mu.
Ẹphe dụ l'igwe; mbụ ndu achọ ishi mu.
3 Teke mu atsụ egvu bụ nggu bẹ mu dakoberu.
4 Ọ bụ Nchileke ono,
mu anọduje aja okfu iya ajaja ono;
bẹ mu dakoberu.
Mu ta atsụdu egvu.
?Bụ ngụnu bẹ madzụ mmanu e-me mu.
5 Tekenteke; bẹ ẹphe ewojeru
okfu mu ghaa ịgharafu.
Iphe ẹphe anọduje arị abụleruphu
ẹge ẹphe e-shi mebata mu.
6 Ẹphe edzukobeje;
domishia onwẹphe;
l'ege ẹke mu dzọru ọkpa;
k'ọphu ẹphe e-me mu iphe.
7 Nggụbe Nchileke;
be ekwekwa t'ẹphe nahụ.
Gudenu oke ẹhu-eghughu
ngu chitsushia ndu ono l'ẹphe ha.
8 Ị mawaru ẹge iphe ono
atsụ-be mu l'ẹhu.
Ị mawaru ẹge ọotsu-be mu l'ẹhu.
?I deshiwaru iphe ono l'ẹkwo ngu?
9 Mu -rakule ngu phụ;
bẹ ndu ọhogu mu a-gha ifu; laphu azụ.
Ọphu doru mu ẹnya
bụ lẹ Nchileke nọ l'ẹka iya nke mu.
10 Ọ bụ Nchileke ono,
mu anọduje aja okfu iya ajaja ono;
mbụ Ojejoje ono,
mu anọduje aja okfu iya ajaja ono;
11 ọ bụ Nchileke ono; bẹ mu dakoberu.
Mu ta atsụdu egvu.
?Bụ ngụnu bẹ madzụ mmanu e-me mu?
12 Nggụbe Nchileke;
iphe mu riburu lẹ mu e-meru ngu
bụkwa mu b'ọ tụkoru l'ishi.
Mu a-bya egworu
ngwẹja-ekele nụ ngu.
13 Ishi iya abụru l'ị nafụtawaru mu l'ẹka ọnwu;
mekwaaphu tẹ mu ba akpakota iphe daa;
k'ọphu mu a-dzọ ije l'ifu
Nchileke l'ẹke iphoro nọru ndu nọ ndzụ.