34
Egvu, Dévidi deru teke ọ wataru ome l'ọ bụ onye ọgvu l'ifu Abímẹleku; Abímẹleku achịfu iya
1 Mu a-nọdu ekutse Ojejoje tekenteke.
Tekenteke bẹ mu a-nọdu aja iya ajaja.
2 Ọ bụ Ojejoje; bẹ mu gude eku onwomu.
Tẹ ndu aakpa ẹhu nụa ya;
k'ọphu ẹhu a-tsọ ẹphe ẹna.
3 Bya tẹ ayi chịko tụa ọnu ẹge
Ojejoje habe nshinu;
bya t'ayi chịko kutsee ya.
4 Mu rakuru Ojejoje;
yọ za mu; bya emee;
mu atsụ-buhu egvu.
5 Ndu ele ẹnya iya amụje
ọnu-ọchi;
ọphu o nwedu l'iphere emee ẹphe.
6 Mụbe onye ẹta dụdu ẹge
ọ haru mu chiru mkpu;
Ojejoje azaa mu;
bya adzọfutakota mu
l'iphe-ẹhuka, mu eje l'ọ ha.
7 Ojozi-imigwe Ojejoje
anọ-pheje ndu atsụ
Ojejoje egvu mgburumgburu.
Ọonoduje adzọ ẹphe tekenteke.
8 Unu datadụduphu Ojejoje;
unu aphụ l'ọ dụ mma.
Ọnu-ọma b'a gọru nụ ndu
gbabaru iya l'ẹka je ezeeru ndzụ.
9 Unu tsụje Ojejoje egvu;
unubẹ ndu nsọ Ojejoje;
kẹle ndu atsụ iya egvu
ta dụkwa iphe ụko iya adụjeru ẹphe.
10 Ụnwu agụ; bẹ mkpa akpajẹ;
ẹgu l'eme ẹphe.
Obenu lẹ ndu achọ
Ojejoje;
bẹ ụko iphe-ọma ta akọdu.
11 Unu byadụduphu;
unubẹ ụnwegirima.
Unu bya angabẹ nchị;
tẹ mu zia unu iphe ọ bụ;
mbụ ọtsu Ojejoje egvu.
12 ?Nanụ onye ndzụ atsọ ẹna;
yọ dụ iya tọ kaa nka;
mbọku-mbọku abụru iya k'ọma.
13 T'onye ono wofukwa ọnu
l'ẹjo iphe; yọ haa ẹjo-ire.
14 Gbakutaru iphe dụ ẹji azụ;
watachia ome iphe dụ mma.
Kebe ẹhu chọjee iphe e-me tẹ nchị dụ ndoo;
ba atụ-gbekwa iya ẹka.
15 Ojejoje bẹ ẹnya iya
anọjekwa l'ẹke ndu doberu ẹka ndoo nọ.
Ọongabejekwa nchị teke
ẹphe ara araku iya.
16 Obenu lẹ ndu eme iphe dụ ẹji;
b'ẹ too lejedu ẹnya ọma;
k'ọphu ẹpha ẹphe a-chịhu lẹ mgboko.
17 Ndu doberu ẹka ndoo abụje;
ẹphe -raku Ojejoje;
yọ za ẹphe;
bya anafụta ẹphe
l'iphe-ẹhuka, ẹphe eje l'ọ ha.
18 Ojejoje anọnyabeje ndu ụzo chiru.
Ọodzofutaje ndu ẹta
amahẹdu ẹge ẹphe e-me iya.
19 Iphe-ẹhuka onye doberu ẹka
ndoo adụje l'igwe;
obenu lẹ Ojejoje
anafụtakotaje iya l'iphe-ẹhuka ono l'ọ ha.
20 Ọkpu, nọ iya l'ẹhu bẹ ooletaje ẹnya.
Ẹ tọ dụdu ọkpu, nọ iya l'ẹhu m'ọ nanụ,
a bya l'akukwo akukwo.
21 Obenu l'ẹjo madzụ bụ
ẹjo iphe iya ono e-gbu iya.
Ndu kpọru ndu doberu
ẹka ndoo ashị; bẹ aa-nma ikpe.
22 Ojejoje adzọjekwa ndu ejeru iya ozi.
Ẹ to nwedu m'ọo onye lanụ,
gbabaru l'ime iya je ozeru
ndzụ, a bya anma ikpe.