2
1 ?Bụ ngụnu meru iphe
iphe bụ mbakeshi achị
ẹjo idzu kẹ okwefuru Ojejoje íkè?
?Bụ ngụnu meru iphe ndiphe
achị idzu ìphòró?
2 Ndu eze, achị mgboko
ajịkobe onwẹphe k'ọgu;
ndu ishi l'edzukobe;
t'ẹphe tso Ojejoje ọgu;
tsokwaphu onye ono,
ọ fọtaru t'ọ bụru eze ono ọgu.
3 Ẹphe sụru: “Unu t'ayi
lọ-bushia mkpa ono,
ẹphe gude tụgbabe ayi ono!
Unu t'ayi gbabushia ẹgbirigba ono,
ẹphe gude kee ayi ono.”
4 Ọ bụ ọchi bẹ onye ono,
nọ l'aba-eze l'imigwe ono achị ẹphe;
mbụ l'ọo ọchi; bẹ oozi Nnajiufu.
5 Oo-gude iphe-eghughu
baaru ẹpha mba;
gude oke ẹhu-eghughu yee ẹphe egvu.
6 Nchileke asụ ẹphe lẹ
ya fọfutawaru eze;
dobe iche lẹ Ugvu Záyọnu,
bụ ugvu ono, ya doberu nsọ ono.
7 Onye ono, ọ fọtaru ono asụ
lẹ: “Ekemu Ojejoje;
bẹ ya a-ra tororo;
kẹle Ojejoje sụru iya:
‘L'ọo ya bụ Nwatibe iya kẹ nwoke.
Dụbe ntanụ;
bẹ ya bụakwa Nna iya.
8 Ya e-woru iphe bụ mbakeshi
nụ iya t'ọ bụru òkè-iphe iya;
woru mgboko
mgburumgburu nụ iya
t'ọ bụru iya iphe-enweru;
m'ọ -bụru lẹ ya rọru iya ẹya.
9 Yọ bụru ẹka-ike;
bẹ mu e-gude achị ẹphe;
gude iya kụa ẹphe
yọgiriyogiri l'ọ bụ ite-ụra.’ ”
10 Ọo ya bụ; unubẹ ndu eze;
unu kwakwaa ẹnya!
Unubẹ ndu ishi kẹ mgboko-a;
unu ngabẹkwa nchị l'ọkwa
ono, aanmaru unu ono!
11 Unu gude ọtsu egvu;
mẹ ẹhu-anmanma ejeru Ojejoje ozi!
12 Unu tsuta Nwa iya nwoke
ọnu l'ọkpa; e menyaa;
ẹhu awata iya oghu
eghughu; yo mee;
unu abụru kpurupyata lẹ mbadụzo;
kẹ l'ọ kwa nwiphe, ẹ-ta badụ ishi;
akpatsuje iya iwe.
Ọnu-ọma bụ kẹ ndu gbakfuru
iya nụ t'ẹphe zeeru ndzụ.