19
Egvu-ọma, Dévidi deru nụ onye ishi egvu
1 Igwe l'ọ ha bẹ atụ ọnu
ọdu-biribiri Nchileke.
Akpamigwe ekoshi
ẹge oometabe nka.
2 Iphe bụ mbọku, mụtaru
amụta anọduje atụ ọnu iya.
Iphe bụ ẹnyashi, sweru
esweswe eme t'a kabaa ya amaru.
3 Ẹ taa nụdu ẹphe olu;
taa nụ iphe ẹphe ekfu.
4 Obenu l'olu ẹphe tụko eliphe ngaa.
Ozi, ẹphe ezi atụko mgboko dzuru.
Ọ bụ Nchileke meru ụlo
doberu ẹnyanwu l'imigwe.
5 Ẹnyanwu eshije l'ụlo iya
kpufuta l'ọ bụ nwoke,
lụru nwanyi k'ọphungu.
Ẹhu anọduje atsọ iya l'ọ bụ
mkparawa, eje ọma ọso.
6 Ọowafutaje l'akpamigwe ishi lanụ;
yo jee jeye l'ishi iya ọphu.
To nwe iphe a-sụ lẹ ya
nọ l'ẹke okpomọku iya te erudu iya ẹhu.
7 Ekemu Ojejoje dụkota mma;
oomeje tẹ obu shihu madzụ ike.
Nsọ, Ojejoje doberu
ta angajẹdu anganga.
Oomeje tẹ onye mmamiphe pehuru maru iphe.
8 Iphe Ojejoje tọru ọkpa iya kfụru akfụru.
Oomeje t'obu atsọ madzụ ẹna.
Ekemu Ojejoje; bẹ ẹkworo ta anọdu.
Oomeje t'ẹnya rua madzụ alị.
9 Ọ dụ mma t'a tsụje Ojejoje egvu;
kẹ l'ọo-dụgburu ẹge ono tụgburu.
Iphe Ojejoje tụru l'iwu;
b'ẹ ta atụngadu atụnga.
Ọonguru angụru.
10 Ọ ka mkpọla-ododo ore ire;
mbụ ọkpobe
mkpọla-ododo;
ka manụ-ẹngu ọtso ẹna;
mbụ manụ-ẹngu,
shi l'ẹbaku-ẹngu.
11 Ọonoduje alọ mụbe
nwozi ngu ẹka lẹ nchị.
Obunggo bụ kẹ onye eme iphe o kfuru.
12 Ọlobu; ?bụ onye amajẹ teke ya eme ẹji?
Byiko; safụkwa mu ẹjo iphe,
mu meru l'amaga ama.
13 Yetaru mụbe nwozi ngu ẹka;
tẹ mu ba akwabẹ ẹnya mee ẹjo iphe.
Be ekwekwa t'ẹjo iphe kpụa mu lẹ ndzụ;
k'ọphu ụta ẹ-ta dụduru mu;
a haaru mu enge; l'ẹka mu ta dụdu lẹ njọ.
14 Tẹ okfu, shi mu l'ọnu;
mẹ iphe mu arị l'obu mu
dụjekwa ngu mma;
kẹ l'ọ bụ nggu bụ oke mkpuma mu;
bụru nggu bụ onye agbafụtaje mu nụ.