17
Ekfufu, Dévidi kfuru nụ Nchileke
1 Nggụbe Ojejoje; ngabẹ nchị!
Nụaru olu, mụbe onye doberu ẹka ndoo!
Gebe nchị nụa mkpu,
mu echiku ngu!
Gebe nchị nụa ekfukfu, mu ekfu anụ ngu;
kẹ l'ẹ t'ọ bụdu ẹjo-ire;
bẹ mu adzụru ngu.
2 Byiko; byaru bya ahaaru mu enge!
Byaru bya elee ya ẹnya;
maru onye iswi dụ mma!
3 Ọ -bụru l'i nyocharu mu obu;
lelee mu l'ẹnyashi;
mbụ; ọ -bụru l'ị -bya
egbua mu igo ọkpobe egbugbu;
b'ẹ to nwekwa iphe dụ ẹji,
ị phụ mu l'ẹhu;
kẹle mu kfuwaru iya kepyia ya akụ;
l'ẹ tọ dụdu ẹjo okfu,
e-shi mu l'ọnu lụfuta.
4 A -bya l'iphe ndiphe emeshi;
bẹ mu mekwaruphu iphe i kfuru;
buru ụba yeru ndu akirishi.
5 Ọ bụ ọkpa, ị tọru;
bẹ mu etso;
ọphu o nwekwanu
teke ọkpa chifujewaru mu.
6 Iphe mu gude ekfu anụ ngu
Nchileke kwaa l'iigebejeru mu nchị.
Gebenu nchị; nụa olu mu!
7 Byiko; menua tẹ mu phụ
n-yemobu ngu ono,
dụ biribiri ono;
nggụbe onye egudeje
ike ngu dzọfuta ndu
gbabaru ngu l'ẹka t'ẹphe zeeru ndzụ; tẹ ndu
ọhogu ẹphe be egbu ẹphe.
8 Dobe nụ mu lẹ̀ mù bụ
nwandodo-ẹnya ngu;
t'ẹnya ngu nọdu l'ẹke mu nọ.
Gudenu ẹ́bà ngu kpuchita mu;
9 t'ẹka ndu ẹjo iya ono;
be eru mu l'ẹhu;
mbụ ndu ọhogu ono, tupheru mu
mgburumgburu;
l'eme t'ẹphe gbua mu ono.
10 Imiko madzụ ta adụjedu ẹphe;
ẹphe ekfu iphe ka ọnu ẹphe.
11 Nta-a abụje; iphe bụ ẹke,
mu shiru; ẹphe etsoru mu;
gbaphee mu mgburumgburu;
kwabẹ t'ẹphe nwutsua mu.
12 Ẹphe dụ l'ọ bụ agụ,
ẹgu guderu;
yọ kwabẹru anụ, oo-gbu;
mbụ l'ọ bụ ẹjo agụ,
nmakpuru anmakpuru
kwabẹru iphe e-shita iya ifu.
13 Gbeshinu nggụbe Ojejoje;
fụaru ẹphe; mekputa ẹphe;
nggu egude ogu-mbeke ngu
dzọfuta mu l'ẹka ndu akirishi ono!
14 Gudenu ike nke ngu dzọo
mu l'ẹka ndu ono;
mbụ l'ẹka ndu ono,
bụ iphe kẹ mgboko-a bụ mkpa ẹphe ono;
mbụ ndu ono, ị nụru ẹku;
nụ iya ẹphe k'anyịnyi;
k'ọphu ụnwu ẹphe;
mẹ ụnwunwa ẹphe e-nwe;
nwee k'etsutsu iya.
15 Obenu lẹ mbẹdua e-gude
kẹle mu doberu ẹka ndoo phụ ngu ifu.
Mu -tehulephu;
bẹ ẹhu a-tsọ mu ẹna;
kẹle mu a-phụ ẹge ị gbaru.