147
1 Unu jaa Ojejoje ajaja.
Ọ dụ mma t'a gụje egvu
gude jaa Nchileke ajaja.
Ọ bụ iphe ẹhu-ọtso-ẹna;
bụru iphe ruberu iya nụ t'aajaje ya ajaja!
2 Ọ bụ Ojejoje gude ẹka iya akpụ Jerúsalemu.
Ọochikobewa ndu Ízurẹlu,
a kpụru lẹ ndzụ l'achịlata azụ.
3 Oomeje tẹ ndu obu tọfuru
atọfu shihu ike;
l'asajẹ ẹphe ọnya l'ẹke
e mekaru ẹphe iphe.
4 Ọ bụ iya agụje mkpọ-kpodo ọgu;
maru ole, ọo-dụ.
Tẹmanu; yọ bya agụkota
iya ẹpha l'ẹhu l'ẹhu.
5 Ojejoje nk'ayi ha nshinu;
ike iya abụru ike, nyịberu ayịbe.
Iphe-odo-ẹnya nk'iya ta
dụdu onye atụ-ghe ọnu ẹge ọ habe nshinu.
6 Ọ bụ Ojejoje gude ndzụ ndu
wozitaru onwẹphe alị.
Obenu lẹ ndu akirishi;
bẹ ọochitaje tụa l'alị.
7 Unu gụa egvu gude kele Ojejoje ekele.
Unu gudenu une kụaru
Nchileke ayi nkwa.
8 Ọo ya gude urukpu kwechia
akpamigwe l'ọ ha.
Ọochijeru eliphe mini;
l'emeje t'ẹswa fushia l'eli ugvu.
9 Ọ bụ iya anụje elu nri;
bụru iya anụje ụnwu
ọphegu nri m'ọ -raa ọra iya.
10 Ẹ tọ bụdu agburu-ẹhu,
nọ l'ịnya emeje t'ẹhu tsọo Ojejoje ẹna;
ọphu ọ bụdu apata-ọkpa
madzụ emeje t'ẹhu tsọ iya ẹna.
11 Ndu emeje t'ẹhu tsọo Ojejoje
ẹna kwa ndu, atsụ iya egvu;
mbụ ndu, bụ ẹke ẹnya ẹphe
anọje bụ lẹ n-yemobu kẹ Nchileke.
12 Nggụbe Jerúsalemu; kutsenua Ojejoje.
Janụa Nchileke ngu ajaja; nggụbe Záyọnu;
13 kẹ l'ọo Ojejoje bụ onye
emeje t'iphe iigudeje tụ-chia
ọnu-nggamgbo ngu shihu ike;
bụru iya agọjeru ụnwu ngu ọnu.
14 Oomeje tẹ nchị dụ ndo
l'oke-alị ngu l'ọha;
l'egudeje ọkpobe witu azụ-ji ngu ẹpho.
15 Ọo iphe ọ sụru t'o mee
l'eliphe bẹ emeje nụ.
Okfu iya abụje;
ọ -kpụkwaduru iya-a l'ọnu ekfu;
yọ tụko mgboko l'ọ ha ngakọta.
16 Ọ bụ onye ewojeru mini suno
phụshia l'ọ bụ onye phụshiru ukpo;
bya eworu iji phekaa;
yo dzuru ẹkemeke ọbule
l'ọ bụ onye wụshiru ntụ.
17 Ookpotaje aka-mini ghaa l'ọ
bụ onye gharu ẹja.
?Bụ onye a-dụ ike nọdu
t'oyi aka-mini ono tsụa ya?
18 Ọle ọobuje; o -kfua okfu;
aka-mini ono adazehu.
Oomeje tẹ phẹrephere wata ephephe.
Phẹrephere -phedelephu;
aka-mini adazehu wata ọtso atsọtso.
19 Okfu iya b'o kpuhawaru koshi Jékọpu;
mbụ l'ikpe, o kperu yẹle
iphe ọ tọru ọkpa iya;
sụ t'e tsoje b'o kpuhawaru koshi Ízurẹlu.
20 Ẹ tọ dụdu ọhodo,
o mejewaru ẹge ono.
Ndu onanu ta madu kẹ
ekemu, ọ tụhawaru dobe.
Unu jaa Ojejoje ajaja.