145
Egvu-ekele, Dévidi deru
1 Mu a-nọdu ekutse nggụbe
Nchileke mu, bụ eze.
Mu a-nọdu aja ngu ajaja jeye lẹ tutu yoyo.
2 Mu a-nọdu aja ngu ajaja mbọku-mbọku;
l'ekutse ẹpha ngu jeye lẹ tutu yoyo.
3 Ojejoje ha nshinu;
bụru iya gbaru t'a kagee ya ọja ajaja.
Ẹge nshinu iya habe;
ta dụkwa onye a-dụ ike amakọtaru iya.
4 Iphe bụ ọgbo, nọnu a-nọduje
atụru ọgbo ọphu etso iya nụ
ọnu iphemiphe ọbule, iime.
Ẹphe a-nọdu akọru ẹphe
iphe dụgbaa biribiri, ịinoduje eme.
5 Ẹphe a-nọdu atụ ọnu ẹge
iigbutabe nwịinwii;
mẹ ẹge ọkwabe ugvu ngu habe nshinu.
Mbẹdua a-nọdu nwa nggujingguji;
rịa ẹge iphe iime dụ-bebe biribiri.
6 Ẹphe a-nọdu atụ ọnu ẹge ike
ngu dubebe l'ozi, dụ egvu, iije.
Iphe, iime, dụ egvu; bẹ mu a-ra arara.
7 Ẹphe l'ẹphe ha ekfukashia
ẹge ụdu ngu habe nshinu.
Ẹphe egude ẹhu-ọtso-ẹna
gụa odobe-ẹka-ndoo ngu l'egvu.
8 Ojejoje bụ onye emeje
eze-iphe-ọma; bya abụru onye
aphụjeru madzụ imiko.
Ẹhu te eghujedu iya eghu ẹgwegwa;
ọle n-yemobu iya bẹ ooyeje yee k'etsutsu iya.
9 Ojejoje mụberu onyemonye ọbule ẹnya.
Iphemiphe ọbule, o keru
ekeke bẹ ọophujeru imiko.
10 Iphemiphe ọbule, i keru
ekeke a-nọdu aja ngu ajaja; nggụbe Ojejoje.
Ndu yeru ngu obu a-nọdu ekutse ngu ekutse.
11 Ẹphe a-tụ ọnu ẹge ẹke ị bụ
eze dụ-bebe biribiri;
bya atụa ọnu ẹge
agburu-ẹhu ngu habebe nshinu;
12 k'ọphu onyemonye ọbule
a-makọtaru iphe ha nshinu, iimeje;
makwarụphu ẹge ẹke,
ị bụ eze dụ-be akpabiri.
13 Ịi-bụru eze jeye lẹ tutu yoyo;
bya achịa tsube l'ọgbo sweru ọgbo.
Iphe bụ iphe Ojejoje kweru
ụkwa; bẹ oomeje.
Ọ kwaphu ẹge ono;
b'o yeru iphemiphe ọbule,
o keru ekeke obu.
14 Iphe bụ ndu daru iko;
bẹ Ojejoje abụjeru agbarike;
l'apalije ndu e wozitaru alị.
15 Onyemonye ọbule achịkoje ele ngu ẹnya l'ẹka;
nggụbedua l'anụjekwanu ẹphe nri l'oge iya.
16 Ịimusaje ẹka ngu;
mee t'ẹpho ji iphemiphe ọbule, nọ ndzụ.
17 Ojejoje bụ onye doberu ẹka
ndoo l'iphemiphe ọbule oome;
bụkwaruphu onye yeru
iphemiphe ọbule, o keru ekeke obu.
18 Ojejoje anọduje iphe bụ
ndu rakuru iya nụ ntse;
mbụ ndu gude ire-lanụ raku iya.
19 Ndu atsụ iya egvu;
bẹ oomejeru iphe agụ ẹphe.
Ọonuje mkpu, ẹphe echi;
je adzọfuta ẹphe.
20 Onyemonye ọbule,
yeru Ojejoje obu;
bẹ ọonoduje eche nche.
Obenu lẹ ndu akirishi;
bẹ oo-me t'ẹphe bụru kpurupyata.
21 Mu a-nọduje aja Ojejoje ajaja tekenteke.
Tẹ iphemiphe ọbule,
o keru dobe lẹ mgboko
jajẹkwa ẹpha iya ono,
dụ nsọ ono jeye lẹ tutu yoyo.