119
1 Ọnu-ọma bụ kẹ ndu ẹ-te
emejedu iphe aa-ta ẹphe ụta;
ndu etsolephu ekemu, Ojejoje tụru.
2 Ọnu-ọma bụ kẹ ndu
etso iphe ọ tụru l'ekemu;
bya egude obu ẹphe
l'ọ ha achọ iya l'achọshi iya ike.
3 Ndu, dụ ẹge ono;
te eyejedu ẹka l'iphe dụ ẹji.
Ọ bụlephu ụzo, Ojejoje
tọru bẹ ẹphe anọduje etso.
4 Ị kawaru ayi iphe ị sụru
t'e meje merua l'ishi.
5 Ọ dụ mu t'asụ lẹ mu
evudoshije ike l'ome iphe
ono, ị tụru ekemu; sụ
t'e emeje ono;
6 k'ọphu ẹ to nwedu
iphe-iphere iya bya eme mu;
kẹle mu lezitaru ẹnya
l'iphemiphe ọbule ị sụru t'e meje.
7 Mu e-gude obu, gụru iphoro jaa ngu ajaja;
keshinu ọphu mu amụ
ịkpe ngu ono, vudo
nhamụnha ono amụmu.
8 Mu a-nọdu etso iphe
ị tọru ọkpa iya sụ t'e tsoje.
Byiko ba agbadokwa mu.
9 ?Nanụkpoo ẹge nwokorọbya
e-shi mee ndzụ iya t'ẹ b'o nwe ntụpo?
Ọ bụ l'ome iphe e deru l'okfu ngu.
10 Mu gude obu mu l'ọ ha achọ ngu.
Be ekwekwa tẹ mu dakaa ekemu ngu.
11 Okfu ngu bẹ mu domiwaru l'ime obu mu;
k'ọphu mu te emedu iphe dụ ẹji kpua ngu.
12 T'ajaja bụru nke ngu nggụbe Ojejoje.
Byiko; zinua mu ekemu
ngu t'o doo mu ẹnya.
13 Ekemu ngu l'ọ ha; bẹ mu vukwa l'ishi;
gude ọnu mu l'asa iya.
14 Ẹhu anọduje atsọ mu ẹna
teke mu eme iphe ị tụru l'ekemu
ẹge ono, ọotsoje onye
kparu ẹku nshinu ono.
15 Mu atọje nwẹhu l'arị
iphe ị sụru t'e mee arịri.
Mu adabẹkwaphu ẹnya
l'ụzo, ị tọru t'e shije.
16 Ekemu, ị tụru tẹ emeje dụ mu mma;
ọphu 'onwedu lẹ mu azahaa okfu ngu.
17 Menuaru mubẹ nwozi ngu iphe dụ mma;
k'ọphu mu e-shi ẹge ono
nọdu ndzụ meje okfu ngu.
18 Menua tẹ ẹnya mu kpuhaa;
k'ọphu mu a-phụje iphe
dụ biribiri, nọ l'ekemu ngu.
19 Mu bụkwa onye laru alala lẹ mgboko-a.
Ba adụkwa iphe bụ iphe
ị sụru t'e meje ọphu
ii-domiru mu edomi.
20 Ọogushi mu ẹgu ike
tẹ mu majẹru iphe bụ
ekemu ngu tekenteke.
21 Ndu etu onwẹphe oke ẹpha;
bụru ndu a tụru ọnu;
bẹ ịibajeru mba;
mbụ ndu ono, ahaje iphe
ị sụru t'e meje ono; l'eme iphe ọdo.
22 Menua t'ẹ b'a ajahẹ mu ewena;
l'adzọ mu ọkpa l'ishi;
kẹ l'ọ kwa iphe bụ iphe,
ị tụru l'ekemu ngu;
bẹ mu anọduje eme.
23 A makwaru-a lẹ ndu ishi
edzukobeje achịru mu ẹjo idzu.
Obenu l'iphe mụbe nwozi ngu
anọduje arị bụ ẹge mu e-me
mee iphe bụ iphe ị tụru
l'ekemu ngu; sụ t'e meje.
24 Ọonoduje atsọ mu ẹna ome
iphe ị tụru l'ekemu ngu.
Ọ bụ iya anọduje akpọ-ziru
mu ụzo iphe mu e-me.
25 E mewaru mu; ishi erua mu
alị ọkpobe eruru.
Gudenu kẹ okfu ono,
shi ngu l'ọnu ono;
mee tẹ ndzụ dzua mu.
26 Mu wotaru ẹge ụzo mu dụ dooru ngu;
nggu angabẹru mu nchị.
Zinua mu iphe ị tọru ọkpa iya; sụ t'e tsoje.
27 Menua t'o doo mu ẹnya;
mbụ ekemu, ị tụru t'e meje;
k'ọphu mu a-tọ nwẹhu;
rịa k'iphe dụ biribiri, iimeshi.
28 Mu gụwaru aphụ jeye
t'o nwehe ụvo, nọ mu nụ.
Byiko menua t'ike dụ mu
ẹge ono, i kfuru ono.
29 Be ekwekwa tẹ mu ye ọkpa l'ụzo ẹregede.
Menuaru mu eze-iphe-ọma;
zia mu ekemu ngu.
30 Mu hatawaru ome ire-lanụ;
wowaru ekemu ngu dobe
onwomu l'ọkpoma.
31 Iphe mu anọduje eme
l'emeshi iya ike bụ iphe
nggụbe Ojejoje tụru l'ekemu.
Be ekwekwa t'e mee mu iphe-iphere.
32 Ụzo, mu a-nọdu etso bụ ụzo
k'ome iphe ị sụru t'e meje;
kẹ l'ii-me tẹ iphe ka mu odo ẹnya.
33 Nggụbe Ojejoje;
zinua mu ẹge mu e-shije
eme iphe ị tọru ọkpa iya; sụ t'e tsoje;
k'ọphu mu a-nọdu eme iya jeye l'ikperazụ.
34 Menua t'iphe dojee mu ẹnya;
k'ọphu mu ee-dobeje ekemu ngu ono;
gude obu mu l'ọ ha l'eme iya ememe.
35 Koshi mu ụzo, mu e-shije eme
iphe ị sụru t'e meje;
kẹ l'ọ bụ iya bụ iphe
atsọje mu ẹna ememe.
36 Swị-zia obu mu;
t'ẹ b'ọ gha ifu l'ụzo rita-rita;
t'o ghachia ifu l'ome iphe
ị tụru l'ekemu.
37 Mee tẹ mu be eworu ẹnya
chabẹ l'iphe-mmanu.
Gudenu kẹ okfu ono,
shi ngu l'ọnu ono;
mee tẹ ndzụ dzua mu.
38 Menuaru mu iphe i kweru
ụkwa l'ii-meru mụbe nwozi ngu;
k'ọphu aa-wata ngu ọtsu egvu.
39 Wofunuru mu iphe-iphere ono,
mu atsụ egvu iya ono;
kẹ l'ekemu ngu dụ mma.
40 Iphe ị sụru t'e meje agụ mu agụgu ememe.
Gudenu kẹ odobe-ẹka-ndoo nke ngu;
mee tẹ ndzụ dzua mu.
41 Koshinu mu n-yemobu ngu nggụbe Ojejoje.
Dzọfutanu mu; kẹ l'ọ bụ
iphe i kweru ụkwa l'ii-meru mu.
42 Ọo ya bụ ẹge mu amaru
iphe mu a-saru ndu aja mu ewena;
kẹ l'ọ bụ okfu ngu bẹ mu dakoberu.
43 Ba anafụkwa mu ire-lanụ,
nọ mu l'ọnu;
kẹ l'ọ bụ l'ekemu ngu;
bẹ mu chịru ẹnya dobe.
44 Ọ bụ iphe ekemu ngu kfuru;
bẹ mu a-nọdu eme jeye lẹ tutu yoyo.
45 Mu a-tụsakpooru ẹhu;
l'eje ẹge ẹhu dụ mu;
kẹ l'ọo iphe ị sụru t'e mee;
bẹ mu anọduje eme.
46 Mu e-vudo l'ifu ndu eze
kfua kẹ ekemu ngu;
iphere ta adụ mu.
47 Iphe adụje mu mma bụ ome
iphe ị sụru t'e meje;
kẹle mu yeru iya obu.
48 Mu achilije ẹka mu ẹbo ẹbo
nabata ekemu ngu;
kẹ l'ọ dụ mu mma nshinu.
Mu atọje nwẹhu l'arị
iphe ị sụru t'e mee arịri.
49 Nyatakwa iphe i kfuru mụbe nwozi ngu;
kẹ l'i mewaru; mu elelahaa ẹnya iphe.
50 Iphe adụje mu ike teke mu
eje iphe-ẹhuka bụ ụkwa,
i kweru mu l'ii-dobe mu ndzụ.
51 Ndu eku onwẹphe; anọduje achị mu ọchi.
Ọle ẹ too mejedu mu tẹ mu
haa ome iphe ekemu ngu kfuru.
52 Nggụbe Ojejoje; ọobuje;
mu -nyata ekemu ngu ono,
shiru teke ndiche ono;
yo mee tẹ obu shihu mu ike.
53 Iphe eghuje mu eghughu;
ọlobu bụ ndu akirishi akpajẹ iya;
mbụ ndu ono, jịkaru odobe ekemu ngu ono.
54 Iphe ị tọru ọkpa iya; sụ t'e
tsoje abụjeru ishi égvú mu
l'iphe bụ ụlo, ẹke mu
dobewaru ishi l'ije mu-a.
55 L'ẹnyashi; bẹ mu anyatajẹ
ẹpha; nggụbe Ojejoje.
Yo mee mu tẹ mu dobe ekemu ngu.
56 Ọ bụwa ụra, raru mu nụ;
tẹ mu meje iphe ị sụru t'e mee.
57 Ọ bụ nggu bụ òkè-iphe mu; nggụbe Ojejoje.
Mu kwewaru ngu ụkwa
lẹ mu a-nọdu eme okfu ngu.
58 Mu gudewa obu mu l'ọ ha chọo ifu ngu.
Menuaru mu eze-iphe-ọma,
bụ iphe i kweru ụkwa iya.
59 Mu lewaru ụzo mu ẹnya
l'uswe; lee ya l'ogologo;
bya eshiwa iya lụfuta;
wata ome iphe ị tụru l'ekemu.
60 Mu e-me ẹgwegwa;
mu ta akpọdu ụkfu ome ekemu ngu.
61 Ẹ to nwedu m'o -ruhuru;
ndu akirishi kee mu ẹgbu;
mu ta azaha ekemu ngu azaha.
62 Ọobuje; o -be l'echi-abalị;
mu egbeshi kele ngu ekele
k'ekemu ngu ono, vudo nhamụnha ono.
63 Iphe bụ ndu atsụ ngu egvu;
bẹ mu l'ẹphe eshikota ọnya l'ẹphe ha;
mbụ ndu ono, tụkoru iphe
ị sụru t'e meje l'ọ ha l'eme ono.
64 Mgboko gbaa mgburumgburu;
bẹ nggụbe Ojejoje yekotaru obu.
Byiko; zinua mu iphe ono,
ị tọru ọkpa iya; sụ t'e tsoje ono.
65 Nggụbe Ojejoje;
i mewaru mụbe nwozi ngu iphe-ọma,
bụ iya bụ ẹge ono, i kfuru ono.
66 Zinua mu mmamiphe;
nggu ezia mu ẹge eeshije
ekpe ikpe nhamụnha;
kẹle mu kwewaru ome iphe ekemu ngu kfuru.
67 Tẹmanu nggu alọde mu ẹka
lẹ nchị bẹ mu phụhawaru ụzo.
Obenu lẹ nta-a; bẹ mu
kwewaru ome okfu ngu.
68 Ị dụ mma; l'emejekwaphu iphe dụ mma.
Zinua mu ome iphe ị tọru
ọkpa iya; sụ t'e tsoje.
69 A makwaru-a lẹ ndu eku
onwẹphe anọduje adzụshi
ẹjo-ire ekpu mu.
Obenu lẹ mu gudelephu
obu mu l'ọ ha emekota iphe ị sụru t'e meje.
70 Ndu ono bẹ imiko madzụ ta adụjedu.
Obenu lẹ mbẹdua bẹ
ọoduje mma ome iphe ekemu ngu kfuru.
71 Ọ dụkwa mma; mbụ ẹka ono,
a lọru mu lẹ nchị ono;
k'ọphu mu a-mụta otso
iphe ị tọru ọkpa iya.
72 Ekemu, shi ngu l'ọnu;
bẹ mu kakwa ọgube iphe
mẹ l'ụnubuku mkpọla-ọcha;
mẹ mkpọla-ododo.
73 Ọ bụ ẹka ngu b'i gude kpụa mu;
mee mu ẹge mu a-gba.
Menua t'iphe doje mu ẹnya;
k'ọphu mu a-mụta iphe bụ
ekemu ngu; meje iya.
74 Tẹ ndu atsụ ngu egvu
tekwaa ẹswa mẹ ẹphe phụa mu;
kẹ l'iphe mu chịru ẹnya
tukobe bụ okfu nke ngu.
75 Nggụbe Ojejoje;
mu makwaru-a l'ikpe ngu vudo nhamụnha.
I gudewa kẹ l'ị
bụ o-me-g'o-kfuru lọo mu ẹka lẹ nchi.
76 Tẹ n-yemobu ngu bụnuru
iphe a-nọduje adụ mụbe nwozi ngu ike;
keshinu ọ bụ iphe i kweru mu ụkwa iya.
77 Phụnuaru mu imiko;
k'ọphu mu a-nọdu ndzụ;
kẹ l'iphe adụje mu mma bụ ekemu nke ngu.
78 T'e menuru iphere kpua ndu
eku onwẹphe ekuku;
kẹ l'ẹphe mesweru mu;
l'ẹ b'ọ dụ iphe mu meru ẹphe.
Obenu lẹ mbẹdua
anọdujelephu l'arị k'ekemu ngu arịri.
79 Tẹ ndu atsụ ngu egvu
byakfutajekwa mu;
mbụ ndu, iphe ị tụru
l'ekemu doru ẹnya.
80 T'ẹ b'ọ dụkwa ẹke ụta
a-dụ mu l'ẹhu lẹ k'ekemu ngu;
k'ọphu ẹ te shidu ẹge ono
mee mu iphe-iphere.
81 Ike agvụakwa mu l'ẹke mu
eche t'ị dzọfuta mu.
Obenu l'ẹke obu mu nọ bụ l'okfu ngu.
82 Mu lenyaakwaru ẹnya;
mu ta amahẹ iphe mu ele;
l'ẹke mu ele ẹnya teke ii-me
iphe i kweru ụkwa iya.
Mu ajịje; sụ: “?Bụ teke ole bẹ
ịi-dụ mu ike ọbu?”
83 A makwaru-a lẹ mu dụ l'ọ bụ akpọ,
a mịberu l'ẹnwuru-ọku;
mbụ akpọ, eeyeje mẹe.
Obenu lẹ mu ta azahajẹkwa
iphe ị tọru ọkpa iya sụ t'e tsoje.
84 ?Bụ teke ole; bẹ mụbe nwozi
ngu a-tabebe nshi?
?Bụ teke ole; bẹ ịi-hụ̀ ndu
akpa mu ẹhu àhụ̀hù?
85 Ndu, eku onwẹphe ekuku
egvuje nsụ doberu mu tẹ mu dalahụ;
mbụ iphe ono, ị tụru ekemu
t'ẹ b'e emejeshi ono.
86 Iphe, bụ iphe, ị sụru t'e meje;
bẹ dabukwaru adaburu.
Yenuru mu ẹka;
kẹ lẹ ndu mgboko akpa mu
ẹhu l'ẹ b'ọ dụ iphe mu meru ẹphe.
87 Ọ phọduaru-a nwanshị;
mẹ ẹphe emee tẹ mu chịhu le mgboko-a.
Obenu lẹ mu ta hakwanu
ome iphe ị sụru t'e meje.
88 Gudenu kẹ n-yemobu ngu;
mee tẹ ndzụ dzua mu;
k'ọphu mu e-meje ekemu ono,
i gude ọnu ngu tụa ono.
89 Okfu nggụbe Ojejoje
l'a-nọ jeye lẹ tutu yoyo.
Ẹ tọ mịngadu amịnga l'imigwe.
90 Ịinoduje bụru
o-me-g'o-kfuru;
tsube l'ọgbo sweru ọgbo.
I meru mgboko dobe;
yọ dụ ẹge i doberu iya.
91 Iphe bụ iphe i kfuru l'ọ ha;
bẹ dụkota ẹge i kfuru iya jeye ntanụ-a;
kẹ l'iphemiphe ọbule l'ejeru ngu ozi.
92 Ndẹge ekemu ngu te shiru
l'ọdungu dụ mu mma;
mẹ mu alakwa l'iyi teke ono,
mu shi eje iphe-ẹhuka ono.
93 Ẹ to nwedu lẹ mu azahaa
ome iphe ị sụru t'e meje;
kẹ l'ọ bụ iya b'i gude dobe mu ndzụ.
94 Dzọnua mu; kẹ lẹ mu bụ nke ngu;
bya akpakọwa iphe ị sụru
t'e meje l'ọ ha makọtaru.
95 Ndu akirishi kwagebewaru
akwagebe t'ẹphe mebyishia mu.
Ọle mu a-tụko iphe ị tụru
l'ekemu kwakọbe l'ime obu mu;
l'arị iya arịri.
96 Iphe bụ iphe a sụru l'ọ
dụ-geru mma;
bẹ mu phụkwaru l'o
nwetsuaru ẹke ọ phọduru.
Obenu l'ekemu ngu te
nwedu ẹke ọ ghọduru iya.
97 Ekemu ngu bẹ mu yekwaru obu nshinu.
Mu evujeru iya l'obu mkpụrumkpuru.
98 Ekemu ngu emeje tẹ mu ka
ndu ọhogu mu ọmaru iphe;
kẹ l'ooswijeru mu eswiru mkpụrumkpuru.
99 Ẹnya gbe kakwa mu oru l'iphe;
malẹ ndu ezi mu iphe;
kẹle kẹ ekemu ngu anọduje
mu l'obu tekenteke.
100 Mu ka ndu bụ ọgurenya ọmaru iphe;
kẹle mu anọduje eme ekemu ngu.
101 Mu wofukotaru ẹka l'iphe bụ iphe dụ ẹji;
k'ọphu mu e-meje okfu ngu.
102 Mu ta gbadobukwaa
ekemu ngu; kẹ l'ọ bụ
nggụbedua l'onwongu
ziru mu iya.
103 Ẹge okfu atsọ-bekwanụ mu ẹna!
Ọ kakwa mu manụ-ẹngu ọtso ẹna.
104 Uru, mu eritajẹ l'ome
ekemu ngu bụ l'oomeje tẹ mu kwaa ẹnya.
Ọo ya meru iphe ụgho dụ
mu ashị; m'o -ruhuru;
ọ dụ ịdagha.
105 Okfu ngu bụ urọku, mu gude
aphụ ẹke mu a-dzọ ọkpa;
bya abụru iphoro, nọru mu l'ụzo.
106 Mu riwaru angụ; kpebua ya l'obu mu;
lẹ mu a-nọdu eme iphe ekemu ngu ono,
vudo nhamụnha ono kfuru.
107 Mu jenụkawaru iphe-ẹhuka.
Gudenu kẹ okfu ono,
shi ngu l'ọnu ono; mee
tẹ ndzụ dzua mu; nggụbe Ojejoje.
108 Nggụbe Ojejoje;
natanu ajaja-wa, mu gude
obu mu aja ngu-wa.
Nggu ezikwaa mu phụ ẹge ekemu ngu gbaru.
109 A makwaru-a lẹ mu
achịjeru ndzụ mu l'ẹka tekenteke;
obenu l'ẹ t'o nwedu lẹ mu
azahaa ekemu ngu.
110 Ndu akirishi gbaaru mu ọnya.
Obenu lẹ mu te eshibua
l'ekemu ngu yeswee ọkpa.
111 Ekemu ngu bụ òkè-iphe mu jeye lẹ tutu yoyo.
Ọ bụ iya emeje tẹ ẹhu atsọ mu ẹna.
112 Iphe mu kpeburu l'obu mu
bụ tẹ mu meje iphe ekemu ngu kfuru
jeye teke mu a-nọ-bebe.
113 Ẹphe adụje mu ashị;
mbụ ndu, anọduje abọ obu ẹbo.
Obenu l'ekemu ngu; bẹ mu yekwaru obu.
114 Ọ bụ nggu bụ ẹke mu
edomije onwomu;
bya abụru ụlo ndzụ mu.
Ọ bụ l'okfu ngu;
bẹ ayi chịru ụkfu kwẹe.
115 Unu pakwaru mu haa;
unubẹ ndu iphe dụ ẹji;
k'ọphu mu a-nọdu eme
ekemu kẹ Nchileke mu.
116 Gudeshia mu ike ẹge
i kweru mu ụkwa iya;
k'ọphu mu a-nọdu ndzụ.
Be ekwekwa tẹ iphe ono,
mu ele ẹnya iya ono bụru mu kẹ mmanu.
117 Gudeshinua mu ike;
k'ọphu aa-dzọfuta mu.
Tekenteke kpọ;
bẹ mu a-nọdu akwabẹ
ekemu ngu ono ugvu.
118 Ịijikaje ndu, haru ekemu ngu;
wata ome iphe ọdo;
kẹ l'ẹregede, ẹphe agba
te enweduru ẹphe ishi.
119 Iphe bụ ndu akirishi,
nọ lẹ mgboko; bẹ iikpofuje l'ọ bụ ntụ.
Ọo ya meru iphe mu yeru ẹhu l'ekemu ngu.
120 Ẹhu amakọta mu jijiji l'ẹke mu atsụ ngu egvu.
Mu atsụkwaphu ekemu ngu egvu.
121 Mu mewaru iphe gbaru nụ;
bụru iphe vudo nhamụnha.
Byiko; ba apakwaru mu
haaru ndu akpa mu ẹhu.
122 Byiko; kwenua nwozi ngu
ụkwa l'ịi-nọdu eleta mu ẹnya.
Be ekwekwa tẹ ndu eku
onwẹphe ekeku kpaa mu ẹhu.
123 Mu lenyaakwaru ẹnya;
mu ta amahẹ iphe mu ele;
l'ẹke mu ele ẹnya t'ị bya adzọfuta mu;
bụ iya bụ iphe nggụbe
onye doberu ẹka ndoo
kweru mu ụkwa iya.
124 Menuru yeru mubẹ nwozi
ngu l'ẹge n-yemobu ngu dụ;
nggu ezia mu iphe ị tọru
ọkpa iya sụ t'e tsoje.
125 Mbẹdua bụ nwozi ngu;
byiko menua t'iphe dojee mu ẹnya;
k'ọphu iphe ị tụru l'ekemu e-do mu ẹnya.
126 Nggụbe Ojejoje;
ọ gbaakwaru teke ii-me ire;
kẹ l'ekemu, ị tụru b'ẹ tee tsohekwa.
127 Ọ bụ okfu lẹ mu yeru ekemu ngu obu
karia ẹge mu yeru iya
ọkpobe mkpọla-ododo;
128 bụru okfu lẹ mu kwetaru
l'ekemu ngu ono vudo nhamụnha;
meru iphe iphe bụ ụgho dụ mu ashị.
129 Iphe ị tụru l'ekemu dụ biribiri;
Ọ bụ iya meru iphe mu
gude obu mu l'ọ ha
l'etso iya l'o ruberu iya.
130 Teke a kọwaru iphe okfu
ngu bụ b'ọ nụje iphoro;
l'emeje tẹ ndu eswe maru iphe.
131 Mu ghecharu ọnu l'atụ hẹnguhengu;
l'ẹke ọogu mu tẹ mu meje
iphe ị tụru l'ekemu ngu.
132 Lenua ẹnya l'ẹke mu nọ;
meeru mu eze-iphe-ọma;
bụ iya bụ ẹge iimejeru
ndu yeru ngu obu.
133 Gude nụ okfu ngu duzije mu ụzo;
k'ọphu iphe dụ ẹji ta
abyadụ bya abụru eze lẹ ndzụ mu.
134 Gbafụta mu l'ẹka ndu l'akpa mu ẹhu;
k'ọphu mu a-nọdu edobe ekemu ngu.
135 Mụaru mụbe nwozi ngu ọnu-ọchi;
nggu ezia mu iphe nọ l'ekemu ngu.
136 Ẹnya-mini awụshi mu l'ẹnya;
kẹle ndiphe te etsodu ekemu ngu.
137 Ị bụ onye doberu ẹka ndoo nggụbe Ojejoje;
ikpe ngu vudo nhamụnha.
138 Iphe ị tụshiru l'ekemu dobe
vudokota nhamụnha;
bụkotaru ire-lanụ.
139 Obu, mu yeru ngu rimiwaru mu ishi;
kẹle ndu ọhogu mu ta
gụbedu okfu ngu iphe.
140 Ụkwa, i kweshiru b'a
tọwaru nwẹhu datakọta.
Mụbe nwozi ngu b'ọ dụ mma ntụmatu.
141 A marua lẹ mu bụ iphe-mmanu;
t'ọ dụ iphe a gụberu mu.
Obenu lẹ mu ta azahadụ
ome iphe ekemu ngu kfu ru.
142 Odobe-ẹka-ndoo nke ngu;
bẹ a-nọ jeye lẹ tutu yoyo;
ekemu ngu abụru ire-lanụ.
143 Iphe-ẹhuka byawaru mu; aphụ abyaru mu.
Obenu l'ekemu ngu ehele mu-a uhere.
144 Iphe ị tụru l'ekemu dobe;
bẹ vudo nhamụnha jeye lẹ tutu yoyo.
Menua t'iphe doje mu ẹnya;
k'ọphu mu a-nọdu ndzụ.
145 Mu gude obu mu l'ọ ha
l'eku ngu; zanụa mu oku nggụbe Ojejoje;
k'ọphu mu a-nọdu eme
iphe ị tụru l'ekemu.
146 Ọ bụ nggụbedua bẹ mu
eku; dzọnua mu;
k'ọphu mu a-nọdu eme iphe ị tụru l'ekemu.
147 Mu egbeshije tẹmanu nchi abọhu;
wata ochi mkpu t'e yeru mu ẹka;
ẹke ẹnya mu nọ abụru l'okfu ngu.
148 Ẹnya ebuje mu sasarasangu
ẹnyashi mgburumgburu;
k'ọphu mu a-tọ nwẹhu
rịa ọriri l'ụkwa i kweshiru.
149 Gudenu kẹ n-yemobu ngu nụa olu mu.
Gudenu kẹ ikpe ngu,
vudo nhamụnha;
mee tẹ ndzụ dzua mu; nggụbe Ojejoje.
150 Ndu anọduje achị ẹjo idzu nọokwa ntse.
Obenu l'ẹphe te emejedu
iphe ekemu ngu kfuru.
151 Ịinokwa ntse;
nggụbe Ojejoje;
ekemu ngu l'ọ ha tụkokwa bụru ire-lanụ.
152 Teke, tehakpowaru etete;
bẹ mu shi l'ekemu ngu maru
l'ị tụru iya dobe tọ nọo jeye lẹ tutu yoyo.
153 Lenua ẹnya l'iphe-ẹhuka, mu eje; dzọo mu;
kẹle mu ta gbadobukwaa ekemu ngu ono.
154 Hanuaru mu enge; gbafụta mu;
Gudenu kẹ ụkwa,
bụ nggụbedua kweru iya;
mee tẹ ndzụ dzua mu.
155 Ndzọfuta nọ ndu akirishi ụzenya;
kẹ l'ẹphe te esejedu ẹge
ẹphe e-me maru iphe
ị tọru ọkpa iya sụ t'e tsoje.
156 Obu-imiko nke ngu;
nggụbe Ojejoje paru apaa.
Gudenu kẹ ikpe ngu,
vudo nhamụnha; mee tẹ ndzụ dzua mu.
157 Ndu, bụ ndu ọhogu mu,
l'akpa mu ẹhu hakwa l'igwe.
Ọle ẹ to nwedu ẹge ọo-dụ;
tẹ mu gbe bya agbado ekemu ngu.
158 Ndu ẹ -te gudedu ire ẹphe
ẹka bẹ agbaruje mu meji
teke mu phụru ẹphe;
kẹ l'ẹphe te emejedu iphe okfu ngu kfuru.
159 Phụwaru ẹge mu yeberu
obu l'eme iphe ị tụru l'ekemu.
Gudenu kẹ n-yemobu ngu;
mee tẹ ndzụ dzua mu; nggụbe Ojejoje.
160 Okfu ngu l'ọ ha bụ
ọkpobe okfu;
ikpe ngu ono,
vudo nhamụnha ono abụru ojejoje.
161 Ndu ishi anọduje akpa mu ẹhu;
l'ẹ b'ọ dụ iphe mu meru ẹphe.
Obenu l'okfu ngu anọdje
anma mu ẹhu anmanma.
162 Okfu ngu emeje t'ẹhu tsọ mu
l'ọ bụ onye lụtaru iphe ha nshinu l'ọgu
163 Ụgho dụ mu ashị;
mu akpọ-yijeru iya ukuvu.
Obenu l'ọphu bụ ekemu ngu;
bẹ mu yekwanuru obu.
164 Ugbo ẹsaa l'ụboku;
bẹ mu ajajẹ ngu ajaja
k'ikpe ono, iikpeje nhamụnha ono.
165 Ndu yeru obu l'ekemu ngu;
bẹ ẹhu adụje agu nshinu;
t'ọ bụ l'o nweru iphe bya
a-bụru ụkfu kpọ ẹphe.
166 Mu nọ ngabẹru nggụbe Ojejoje
t'ị bya adzọfuta mu.
Ọ bụ iphe bụ ekemu ngu;
bẹ mu anọduje etso.
167 Mu emeje iphe ị tụru l'ekemu;
kẹle mu yeru iya obu yeshia ya ike.
168 Mu anọduje eme iphe bụ
iphe ị tụru l'ekemu;
kẹ l'iphemiphe ọbule,
mu eme b'ị makọtaru.
169 Tẹ mkpu, mu echi runua ngu nchị;
nggụbe Ojejoje.
Menua tẹ iphe doje mu
ẹnya, bụ iya bụ iphe
i kweru ụkwa iya.
170 Byiko tẹ arọro, mu arọ ngu runua ngu nchị.
Nafụtanu mu ẹge ono,
i kweru ụkwa iya ono.
171 Mu a-nọduje aja ngu ajaja tekenteke;
kẹ l'i ziru mu iphe ị tọru
ọkpa iya; sụ t'e tsoje.
172 Mu e-gude ọnu mu gụa okfu ngu l'egvu;
kẹ l'ekemu ngu l'ọ ha
vudokota nhamụnha.
173 Kwagebejenu akwagebe; oyeru mu ẹka;
kẹle mu hataru otso ekemu ngu.
174 Iphe agụ mu nụ bụ t'ị
dzọfuta mu;
nggụbe Ojejoje.
Ekemu ngu anọduje ehe mu uhere.
175 Hanụa mu tẹ mu nọdu ndzụ;
k'ọphu mu a-jajẹ ngu ajaja.
Menua tẹ ekemu ngu ono
gudeshia ndzụ mu.
176 Mu kpaphuhuwaru l'ọ bụ
atụru, tufahuru etufahu.
Byiko; chọnua mụbe nwozi ngu;
kẹle mu ta agbadokwa ekemu ngu ono.