116
1 Mu yeru Ojejoje obu;
kẹ l'ọ nụwaru olu mu.
Ọ nụru mkpu, mu chikuru iya;
sụ t'o meeru mu
eze-iphe-ọma.
2 Keshinu ọ ngabẹru mu nchị;
bẹ mu a-nọdujelephu
akpọ-ku iya jeye ẹge mu
a-nọ-bebe.
3 Anwụhu shiwa ye mu eri l'ẹkpiri.
Ẹkpa-oyi alị-maa
eshiwa anwụ mu ẹhu kpaa.
Iphe-ẹhuka; mẹ aphụ
shiwa nọ-phee mu
mgburumgburu.
4 Tọ dụ iya bụ; mu bya
araku Ojejoje; sụ iya:
“Nggụbe Ojejoje; dzọnua mu!”
5 Ojejoje bụ onye emeje
eze-iphe-ọma;
bụru onye doberu ẹka ndoo.
Nchileke ayi bụkwa
onye aphụje imiko.
6 Ndu ẹ te nwedu ẹge
ẹphe maru iya bụkwa
Ojejoje anọduje eleta ẹphe ẹnya.
Teke mu shi nọdu
l'oke mkpa bụ iya dzọfutaru mu.
7 Tẹ obu runua mu alị;
kẹle Ojejoje eletakpoo mu ẹnya.
8 Nggụbe Ojejoje nafụtawaru
mu l'ẹka anwụhu.
I fuchawaru mu ẹnya-mini;
bya egbochita mu
tẹ mu ba akpakota iphe daa;
9 k'ọphu mu a-nọdu ejephe
ẹge dụ mu mma l'ifu
Ojejoje l'alị ndu, nọ ndzụ.
10 Mu wolekwarua onwomu
ye Nchileke l'ẹka;
jeyekpo mẹ teke mu
sụru l'ishi ruakwaru mu alị.
11 Mu gude k'iphe byaru mu nụ; sụ:
“Lẹ ndiphe mgburumgburu
bụkota ndu ntuphu-ire.”
12 ?Nanụ ẹge mu e-shi kfụa
Ojejoje ụgwo iphe,
o mekotaru mu l'ọ ha?
13 Mu e-wota ngwẹja-mẹe;
bya anụ Ojejoje;
gude kua ya ẹpha
kẹ adzọdzo, ọ dzọru mu.
14 Iphe, bụ iphe mu riburu
lẹ mu e-meru Ojejoje;
bẹ mu a-nọdu l'ifu ndibe iya
l'ẹphe ha meeru iya.
15 Ojejoje bẹ anwụhu ndu
dụru iya nsọ erujekwa l'ẹhu nshinu;
16 Nggụbe Ojejoje;
mu bụkwa ọkpobe nwozi ngu.
Mu bụkwa nwozi ngu;
bya abụru nwatibe,
nwanyi ono, ejeru ngu ozi ono.
I tọfuwaru mu l'ẹgbu ono,
anwụhu shi kee mu ono.
17 Mu e-gworu ngu ngwẹja-ekele;
mu abyakwaphu bya
akpọ-kua ẹpha nggụbe Ojejoje.
18 Iphe, bụ iphe mu riburu;
lẹ mu e-meru Ojejoje;
bẹ mu a-nọdu l'ifu ndibe iya
l'ẹphe ha meeru iya.
19 Ẹke, mu a-nọdu mee ya;
bụ l'ọkpoku eze-ụlo Nchileke
l'ifu unubẹ ndu Jerúsalemu.
T'ajaja bụru kẹ Ojejoje.