107
1 Unu kele Ojejoje ekele;
kẹ l'ọ bụ onye, dụ mma.
N-yemobu nk'iya anọje jeye lẹ tutu yoyo.
2 Tẹ ndu Ojejoje gbafụtaru kfua ya;
mbụ ndu ọ gbataru l'ẹka ndu ẹphe dụ ashị;
3 ndu ono, o shi l'iphe bụ
mbakeshi chịkobe ono;
mbụ ndu ono, o jeru l'ụzo
ẹnyanwu-ahata; jee l'ụzo ẹnyanwu-arịba;
jee l'ụzo isheli; jee l'ụzo
ọhuda je erukobe ono.
4 O nweru ndu ọphu bụ
l'echi-ẹgu bẹ ẹphe tsoru l'aghaphe;
mbụ l'alị, daburu
swanmangu, ẹ ta dụdu iphe nọ iya nụ.
Ọphu ẹphe amadụ ụzo,
ẹphe e-shi jerua mkpụkpu, ẹphe e-buru.
5 Ẹgu gụru ẹphe; mini agụa ẹphe.
Ẹphe anọdu l'ẹke ono
leswee ẹnya lẹ ndzụ.
6 Tọ dụ iya bụ; ẹphe araku
Ojejoje teke ono, ẹphe nọ l'iphe-ẹhuka ono;
yọ bya anafụta ẹphe.
7 Yọ bya edua ẹphe shia ụzo,
vudo nhamụnha;
durua ẹphe mkpụkpu ẹke, ẹphe e-buru.
8 T'ẹphe kele Ojejoje ekele
l'o yenukaru ẹphe obu;
mẹ kẹ l'ọonoduje emeru
ụnwu eliphe iphe dụ biribiri;
9 kẹ l'onye mini agụ;
bẹ ọonuje mini t'ọ ngụa.
Yo gude iphe dụ mma
nụ-jia onye, ẹgu agụ ẹpho.
10 O nweru ndu ọphu shi nọdu
l'ẹke gbaru ọchi; ụzo echishihu ẹphe:
bụru ndu, nọ lẹ mkpọro;
l'eje iphe-ẹhuka l'ẹke e gude
mkpa kee ẹphe ẹgbu.
11 Ishi iya abụru l'ẹphe kwefuru íkè;
jịka ome okfu Nchileke.
Ẹphe eworu ẹgiri idzu,
Ọkaribe-Kakọta-Nụ chịru ẹphe fua l'alị.
12 Tọ dụ iya bụ;
yọ paru ẹphe haa;
ẹphe ejelahaa ozi mkpọnwehu.
Ẹphe ejee ya jeye;
ẹphe ebehuje ebehu daa.
Tọ dụ onye, gbaru ẹphe mkpu.
13 Tọ dụ iya bụ; ẹphe araku
Ojejoje teke ono, ẹphe nọ l'iphe-ẹhuka ono.
Yọ bya anafụta ẹphe.
14 Yọ bya edufuta ẹphe l'ẹke ono,
agba ọchi, ụzo chishihuru ẹphe ono;
bya agbabushia mkpa ono,
e shi gude kee ẹphe ẹgbu ono.
15 T'ẹphe kele Ojejoje ekele
l'o yenukaru ẹphe obu;
mẹ kẹ l'ọonoduje emeru
ndiphe iphe dụ biribiri;
16 kẹ l'ọonyakashije
ọgu-nggamgbo, a kparu l'ígwè;
bya egbubushia
mgbọro-ígwè,
e gude gbachishia ụzo.
17 O nweru ndu ọphu wataru ome eswe.
Mkpata iya abụru l'ẹphe
kwefuru Nchileke íkè.
E menwuwa ẹphe ẹhu;
okfu l'ẹphe meru iphe dụ ẹji.
18 Yọ kpọo ẹphe nri;
k'ọphu bụ l'ọ phọduwaru-a
nwinyi-nvọ; mẹ ẹphe anwụshihu.
19 Tọ dụ iya bụ; ẹphe araku
Ojejoje teke ono, ẹphe nọ l'iphe-ẹhuka ono.
Yọ bya anafụta ẹphe.
20 Yọ bụru okfu b'o kfuru
nwẹnkinyi;
ẹhu akọkota ẹphe mma;
shi ẹge ono dobe ẹphe ndzụ.
21 T'ẹphe kele Ojejoje ekele
l'o yenukaru ẹphe obu;
mẹ kẹ l'ọonoduje emeru
ụnwu eliphe iphe dụ biribiri;
22 T'ẹphe gwoo ngwẹja-ekele nụ iya.
Ẹphe agụa egvu ekele
gude mee t'a maru ẹge iphe oome habe.
23 O nweru ndu ọphu gude
ụgbo-mini tsoru
eze ẹnyimu; l'agba nghọ.
24 Ndu onanu phụru ozi, Ojejoje jeru;
ẹphe phụru ozi, dụ biribiri,
o jeru l'echi ebo mini;
25 kẹ l'ọ bụ-a okfu b'o kfuru l'ọnu;
oke phẹrephere awata ephephe.
Yo shi ẹge ono mee;
oke eyii awata atụtu.
26 Ụgbo-mini ẹphe ephelihuje
oreke-imeli;
yọ bya bya atsụa ọtsu l'echi ebo.
Oke iphe-ẹhuka ono,
ẹphe eje ono emee;
obu azashịhukota ẹphe.
27 Ẹphe angalahaa anganga;
l'akpọ garịgari l'ọ bụ ndu mẹe guderu.
Mmamiphe ẹphe l'ọ ha
abụru ẹphe ọ-la-l'iyi.
28 Ya ndono; ẹphe araku
Ojejoje teke ono, ẹphe nọ
l'iphe-ẹhuka ono;
yọ bya anafụta ẹphe.
29 O meru oke eyii mini ono; yọ dazita.
Yọ bya abaaru oke phẹrephere mba;
yọ daa shịkongu.
30 Ẹhu atsọlahaa ẹphe ẹna l'ọ dazitaru ono.
Yo dua ẹphe jeye ẹphe
ejerua ọdu ụgbo-mini l'ẹke ẹphe eje.
31 T'ẹphe kele Ojejoje ekele
l'o yenukaru ẹphe obu;
mẹ kẹ l'ọonoduje emeru
ụnwu eliphe iphe dụ biribiri;
32 T'ẹphe kutsee ya ekutsee l'edzudzu ọha.
Ẹphe etua ya ẹpha l'ẹke
ndu bụ ọgurenya dọru.
33 Ẹnyimu b'o meru;
yọ ghọo echi-ẹgu;
bya emee nggele;
yọ bụru alị, ọkponku.
34 O meru alị, bụ alị-ọtsu;
yọ bụru kpakịri kpakịri
alị-únú;
kẹle ndu shi buru iya nụ
menukaru ẹjo iphe.
35 Echi-ẹgu b'o meru;
yọ bụru okpuru, mini jiru ejiji;
bya emee alị ọkponku;
yọ ghọo ishi nggele.
36 Yọ bụru ẹke dụ ẹge ono;
b'o dutaru ndu ẹgu agụ
je edobe t'ẹphe buru.
Ẹphe anọdu l'ẹke ono;
bụru mkpụkpu nk'ẹphe.
37 Ẹphe abya akọo okfu;
bya akụshia akpụru vayịnu l'ẹke ono;
yọ mịa iphe dụ egvu.
38 Ọ gọru ẹphe ọnu-ọma;
ẹphe abya azụa zụ-jia ẹgu;
ọphu o kwedu tẹ elu ẹphe laa alị.
39 Ọle e mekochaaru;
Ojejoje egude mkpamẹhu;
mẹ iphe-ẹhuka yẹle aphụ lọ-zita ẹphe.
Ẹphe awata ọla alị.
40 Onye ono, ewodaje ndu
a maru ẹpha ẹphe alị ono;
emee ẹphe;
ẹphe aghaphelahaa l'alị,
daburu swanmangu,
ẹ ta dụdu ụzo, nọ iya nụ.
41 Obekwanu lẹ ndu ẹ-ta dụdu
ẹge ọ haru ẹphe;
b'o setaru l'ẹka;
sefuta l'iphe-ẹhuka, ẹphe eje.
Yọ bya emee; ndibe ẹphe;
ẹphe azụshilahaa l'ọ bụ atụru.
42 Ndu obu ẹphe gụru iphoro abụje;
ẹphe -phụa iphe ono;
ẹphe etee ẹswa.
Obenu lẹ ndu eme iphe ẹ-te
vudodu nhamụnha abụje;
ẹphe -phụa ya; yọ kpọo ẹphe okfu.
43 Tẹ ndu maru iphe wokwaru
iphe-a kwakọbe l'ime obu ẹphe.
Ẹphe arịje k'ẹge n-yemobu
Ojejoje hatabe nshinu!