105
1 Unu kele Ojejoje ekele;
unu akpọ-kua ẹpha iya.
Unu mee t'iphe bụ
mbakeshi maru iphe o meshiru.
2 Unu guku iya l'egvu.
Unu gụa egvu
gude jaa ya ajaja.
Unu kfukashia k'iphe
bụ iphe dụ biribiri, ọonoduje eme.
3 Unu gude ẹpha iya,
dụ nsọ ngaa ụnga.
T'iphe bụ ndu achọ
Ojejoje tee ẹswa.
4 Unu wojeru ẹnya dabẹ lẹ
Ojejoje yẹle agburu-ẹhu iya!
Unu achọje ifu iya
mkpụrumkpuru!
5 Unu nyatakwa iphe biribiri;
mẹ iphe-ọphulenya,
o meshiru;
yeru ikpe, o kpeshiru;
6 unubẹ eri nwozi iya,
bụ Ébirihamu;
unubẹ ụnwu Jékọpu,
bụ ndu o gude ẹka iya fọta.
7 Ọ kwa iya bụ Ojejoje;
bụru Nchileke ayi.
Ikpe iya chịko mgboko
vọo kfurukfuru.
8 Ndzụ ono, ọ gbaru ono;
bẹ oodobeje jeye lẹ tutu yoyo.
Iphe o kweru ụkwa iya;
bẹ oomeje shi l'ọgbo sweru ọgbo.
9 Ndzụ ono yẹle Ébirihamu
gbaru ono; mẹ angụ ono,
o rifuru Áyizaku ono
10 b'o meru; yọ bụru ekemu l'ẹhu Jékọpu;
bụru ọgba-ndzụ, a-dụru
ndu Ízurẹlu jeye lẹ tutu yoyo.
11 Ọ sụru ẹphe: “L'ọo ẹphe;
bẹ ya a-nụ alị Kénanu
t'ọ bụru òkè-iphe ẹphe ketaru.”
12 ?Ẹphe shi dụ ole teke ono.
Ẹphe shi habe ahabe;
bya abụru ndu
mbyamụmbya l'alị ono.
13 Ẹphe shi etsojeru iphe bụ
mbakeshi aghaphe.
Ẹphe -shi l'alị-eze ọwaa;
ẹphe akfụfu lashia alị-eze ọdo.
14 Ọphu ọ dụdu onye
o kweru t'ọ kpaa ẹphe ẹhu.
Ọ bụ okfu ẹhu ẹphe;
b'o shi egudeje baaru ndu eze mba;
15 sụ ẹphe t'ẹphe be
edenyikwa ndibe iya ono,
ya fọtaru afọta ono ẹka;
t'ẹ b'ọ dụkwa iphe ẹphe
e-me ndu ekfuchiru iya nụ.
16 O mebyishikotaru iphe
bụ nri, ẹphe nweru enweru;
shi ẹge ono mee t'ẹjo-ẹgu bya l'eliphe.
17 Yọ bya eye nwoke lanụ
t'o vuru ẹphe ụzo.
Nwoke ono bụ Jósẹfu;
mbụ onye ono,
e reru l'ọ bụ ohu ono.
18 Ẹphe tụru iya mkpọro l'ọkpa;
fubashia ya ọnya l'ọkpa;
bya eworu ajaba ígwè tụa ya l'olu;
19 gbururu jeye teke okfu iya vụru.
Okfu, Ojejoje kfuru emee
t'a maru l'ọ bụ onye
ire-lanụ.
20 Ya ndono; eze ezia t'e je atọfu iya.
Onye bụ ishi ọha atọfu iya; yo nweru onwiya.
21 Yo woru iya mee onye ishi l'ufu iya:
t'o letajeru iya ẹnya l'ẹku iya l'ọ ha;
22 sụ iya t'ọ hụ̀je ndu ishi
àhụ̀hù teke dụ iya mma.
Yo zije ndu bụ ọgurenya
l'alị-eze iya mmamiphe.
23 Tọ dụ iya bụ; ndu Ízurẹlu alashia Íjiputu.
Ndibe Jékọpu ejenu je
abụru ndu, laru alala l'alị Hamu.
24 Ojejoje abya emee ndibe iya;
ẹphe azụ̀a azụ̀zù; ha l'igwe;
shi ẹge ono kapyabẹ ndu ọhogu ẹphe.
25 Yọ bya emee ndu Íjiputu;
ẹphe abya akpọo ndu Ízurẹlu ashị;
chịlahaaru ẹphe ẹjo idzu.
26 Yọ bya ezi nwozi;
mbụ Mósisu; mẹ Érọnu,
bụ onye ọ fọtaru;
27 ẹphe eje emeshia
iphe-ọphulenya nk'iya l'ẹke ẹphe nọ;
bya ekoshigbaa ẹphe iphe
dụ biribiri kẹ Ojejoje lẹ Hamu.
28 O meru t'ọchi je gbaa l'alị
ono mgburumgburu;
kẹle ndu Íjiputu kwefuru okfu Nchileke íkè.
29 Yọ bya emee mini, nọ l'alị ẹphe;
yọ ghọkota mee.
Ẹma, nọ iya nụ anwụshihukota.
30 Mbara abya eji alị ẹphe;
mbụ bya akwọtsua nkwọ;
bahụtsua l'ẹke ndu ishi ẹphe azẹje.
31 Ọ bụa okfu b'o kfuru;
ijiji etsulahaa gbigbigbi;
mkpụrúmkpu abya atụko alị ono tụa.
32 Yo wota mini, ọoga anọdu
achịru ẹphe l'alị ono mee;
yọ ghọo aka-mini; mẹ egbe-igwe;
33 tụpyashia vayịnu ẹphe;
mẹ oshi figu ẹphe;
mebyishikota iphe bụ oshi, nọ l'alị ono l'ọ ha.
34 Yo gbeshikwa ọdo bya
ekfua okfu; igube awata ephephe.
Ogu, etsu gbigbigbi abụru 'agụta agụta;
35 bya atụko iphe bụ iphe nọ
ndzụ, nweru ẹkwo l'alị ẹphe tagbua;
mbụ tụko iphe ẹphe
meberu l'alị l'ọ ha tapyashịa.
36 Yọ bya teke ono bya atụko
iphe bụ ụnwu ẹphe; ndu ọphu,
bụ ẹphe ime-ọdungu l'alị ono gwepyaa;
mbụ tụko ụnwu ẹphe ndu
ọphu, bụ ọkpara gbugee.
37 Yọ bya edufuta ndu Ízurẹlu;
kpota mkpọla-ọcha
yẹle mkpọla-ododo kpojia ẹphe ẹka.
T'o nwe ụnwu kẹ ndu
Ízurẹlu; m'ọo onye lanụ,
a chọru achọcho.
38 Ẹhu atsọo ndu Íjiputu
ntụmatu lẹ ndu Ízurẹlu tụgbutsuaru;
kẹ l'ẹphe shiwa atsụ ndu Ízurẹlu ono egvu.
39 Yọ bya egesaaru ẹphe
urukpu gude kpuchita ẹphe;
bya edoberu ẹphe ọku
t'ẹphe gude phụ iphoro l'ẹnyashi.
40 Ẹphe sụru t'a nụ ẹphe nri;
Ojejoje abya achịru ọ̀kwà nụ ẹphe;
gude nri, shi l'igwe nụ-jia ẹphe ẹpho.
41 Yo kpuhaa oke mkpuma;
mini eshi iya tsọshihu;
l'atsọ l'ọ bụ nggele l'echi-ẹgu ono;
42 kẹ l'ọ nyataru ụkwa iphe dụ nsọ,
o kweru nwozi iya, bụ Ébirihamu.
43 Yo dufuta ndibe iya;
ẹhu atsọo ẹphe ẹna;
mbụ ndu ono, ọ fọtaru ono.
44 Yo woru alị ndu ọhodo woru nụ ẹphe.
Yọ bụru ẹke ndu ọdo
riru aphụ iya; bẹ ẹphe wotaru;
yọ bụru òkè-iphe ẹphe;
45 k'ọphu ẹphe a-wata ome
ome-l'alị Ojejoje;
dobelahaa ekemu, shi iya l'ẹka.
T'ajaja bụru kẹ Ojejoje.