101
Egvu-ọma, Dévidi deru
1 Mu a-gụ egvu kẹ n-yemobu ngu
yẹle ikpe ngu, vudo nhamụnha.
Mu a-gụ egvu gude jaaa
ngu ajaja; nggụbe Ojejoje.
2 Ndzụ mu; bẹ mu a-tọ nwẹhu
mee t'ẹ b'ọ dụ ẹka ụta a-dụ iya.
?Bụ teke ole bẹ ịi-kpakfuta mu?
Mu e-gude obu, ụta ẹ ta dụdu
buru lẹ nke mu.
3 Ẹ tọ dụdu iphe dụ ẹji,
mu ekwe t'o shita mu ifu.
Umere ndu ẹ te etsodu
ọkpobe okfu ono dụ mu ashị;
ọphu 'o nwedu iphe mu l'ẹphe emegba.
4 Ndu ụzo ẹphe gberu nggọ;
bẹ mu edobeje ote-ẹnya.
Ẹ t'ọ dụdu iphe mu l'ẹjo iphe gba.
5 Ndu anọduje ekfuru ibe ẹphe okfu-azụ;
bẹ mu e-me t'ẹphe yifu.
Ndu etu onwẹphe iphe igwe charu;
mẹ ndu eku onwẹphe ekuku;
bẹ mu ta atakwaru nshi.
6 Ndu, bụ o-me-g'o-kfuru
l'alị-a;
bẹ mu a-nọdu eleta ẹnya;
k'ọphu mu l'ẹphe
e-buwaruru jeye.
Onye ụta ẹ ta dụdu l'iphe
oome e-mekochaa l'ejeru mu ozi.
7 Ẹ tọ dụdu ndu ẹregede;
m'ọo onye lanụ, mu ekwe
t'o buru lẹ nke mu.
Ọphu ọ dụkwa ndu ntụmatu
m'ọo onye lanụ, mu ekwe
t'o vudo mu l'ifu.
8 Ụtsu mbọku-mbọku;
bẹ mu e-meje t'iphe bụ
ndu akirishi, nọ l'alị-a gvụ.
Mu a-tụko iphe bụ ndu ẹjo iphe
bufu lẹ mkpụkpu kẹ Ojejoje.