27
1 Ba asakwa nsasa l'ọwaa iphe ii-me echile;
kẹ l'ẹ tị madu iphe ụboku
a-bụru.
2 Haa t'onye ọdo jaa ngu ajaja;
be gudejeshi ọnu ngu;
jaa onwongu.
Haaru iya onye ọdo;
t'ẹ b'ọ bụshi nggụbedua l'onwongu.
3 Mkpuma anyịkwa ẹra;
ẹja abụru oke-ivu.
Obenu l'onye eswe
-kpatsua ngu iwe;
b'ọ kakwa iphe labụ ono ọnyi ẹra.
4 Iphe-eghughu emejekwa
iphe-ọnikiri;
ọvuma akabaaru ẹji nk'iya.
Obenu l'ijimẹnya kakọta ẹphe ẹbo ẹji.
5 Mba, a baru madzụ jakatangụ kakwa mma;
mẹ l'i yeru madzụ obu l'edomi.
6 Iphe ọnya ngu mekaru ngu kakwa mma;
mẹ l'akpa ụgho,
onye ọhogu ngu nmaru ngu.
7 Ọ bụ onye ẹpho jiru;
bẹ manụ-ẹngu adụje ẹji.
Obenu l'onye ẹgu agụ;
bẹ iphe atsọ ile anọdujeru atsọ iya ẹna.
8 Nwoke, bụ o-jeta-ọgharu-ufu
dụkwa l'ọ bụ nwẹnu,
phephuhuru l'ẹkfuna iya.
9 Ọ bụ ẹge manụ senti yẹle manụ,
eshi kwẹkwekwe emeje t'obu atsọ ẹna;
bụ ẹge ụzo, onye ọnya ngu kpọ-ziru ngu
emeje t'ẹhu kpọ-vohu ngu.
10 Ba ahakwa ọnya ngu;
ọphu iihakwa ọnya nna ngu;
ọphu ị gbakwaru laa kẹ
nwunne ngu teke ụmuruku mụru ngu;
kẹ l'obutobu, nọ ngu ntse
kakwa mma;
mẹ lẹ nwunne ngu, nọ ngu ote-ẹnya.
11 Maru iphe; nwa mu;
nggu emee t'obu tsọje mu ẹna;
k'ọphu mu a-maru iphe
mu a-nọdu ekfujeru ndu ta
dụdu iphe ẹphe gụberu mu.
12 Onye nweru egomunggo
abụje ọ -phụa iphe-emeka; yo zee ya.
Obenu l'ọma-ego adukpuje je ekulahu iya;
13 Madzụ -sụ lẹ ya a-nọduru
o-shi-awe-o-shi-awe l'itumo;
natakwa iya uwe iya.
Gude yẹbedua t'ọ nọdu lẹ
mkpalẹka m'ọ bụru onye
mba ọdo b'ọ nọduru l'itumo ọbu.
14 Madzụ lụfuta lẹ nchi-abọhu;
gọlaharu obutobu iya ọnu;
l'ara iya gbagbagba;
bẹ ọo-dụkwa l'ọ bụ iphu b'ọ phu iya.
15 Nwanyi okfu-ọnu dụkwa
l'ọ bụ tẹyiteyi mini mbọku mini achị.
16 Ahụta iya dụkwa l'ọ bụ
onwula phẹrephere azụ t'ẹ b'o phehe;
m'ọ bụ ogude ẹka lọ-gude
manụ, awụshi awụshi.
17 Ọ bụ ẹge e gudeje ígwè;
l'aba ígwè t'ọ tsụ nkọ;
bụkwaphu madzụ agbọ-lije madzụ ibe iya.
18 Onye kụru oshi-figu erijenu akpụru, ọ mịtaru.
Ẹge ono bẹ onye letaru nnajiufu iya ẹnya;
bẹ ọokwabeje ugvu.
19 Ọ bụ ẹge madzụ eleje ẹnya
lẹ mini;
phụ nwonyonyo iya;
bụ ẹge ọkpoma onye
ekoshije ẹge onye gbaru.
20 Ọ bụ ẹge ẹpho te jijedu ọnwu; too ji alị-maa;
bụ ẹge iphe agụebe madzụ;
te dzujedu iya edzudzu.
21 Mkpọla-ọcha bụ l'ite-igwe
b'e egheje iya; gude data iya.
Mkpọla-ododo abụru
l'ọku-ụzu b'e egheje iya; gude data iya.
Obenu lẹ madzụ bụ ajaja,
aaja iya b'e gudeje maru ẹge ọ gbaru.
22 Ẹ to nwekwa m'ị tsụru onye eswe l'ọtumu;
mbụ; m'i gude ọ́dzú tsua ya otsu ose;
ii-gbe tsufu iya ririri l'ẹhu.
23 Majẹkwaru ẹge atụru ngu eje iya.
Nggu akwabẹjekwaru eswi ngu ẹnya.
24 Kẹ l'iphe-enweru ta
aanọjekwa jeyewaru;
ọphu onye lanụ 'ekpujekwa
okpu-eze tsube l'ọgbo sweru ọgbo.
25 E -gbufu ẹwu; kẹ ọphungu eruchita.
E -je l'eli ugvu; e gbua ẹwu ọphungu.
26 Ụnwu atụru ngu bụ iya
e-webe ngu iphe.
Eghu bụ iya bẹ ịi-nọdu ere gude azụ alị.
27 Ii-nweru ẹra-eghu, ii-gude
azụ nggu lẹ ndibe ngu;
mẹ ụnwegirima ụnwanyi,
i gude egude.