23
1 Nggu l'oke amadụ l'eri nri;
tọkwaa ẹhu; maru egbe onye ọbu.
2 Nggu akpade onwongu;
m'ọ -bụru l'ị bụ onye
oke-ẹpho.
3 T'ẹhu-anmanma nri ọbu;
be egudekwa ngu;
kẹ l'ọ kwa nri,
e gude eme t'a hata ngu l'ọnya.
4 Be esegbushikwa onwongu l'akanya.
Kwakwaa ẹnya;
nggu ejetaje ghaa ẹnya;
5 kẹ l'ẹku abụjekwa:
a -bya ajị ẹnya;
b'ọ bụwa phuchangu;
fua ẹ́bà l'ọ bụ ugo; phekashihu.
6 Onye ụkparaswi -kua ngu lẹ nri; be ejekwa;
ọphu nri, o shiru 'agụjekwa ngu;
7 kẹ l'egbe onye ono;
bẹ iphe ọorije bụ l'ị byaru iya erigbu.
Ọo-nọdu ekfukwaru ngu-a t'i rifua;
obenu lẹ nri, ooseru ngu te shidu iya l'obu.
8 Nwa iya ọphu bahụru ngu l'ọnu;
bẹ ịi-gbọkwa.
Ẹpha, i turu iya abụru ngu kẹ mmanu.
9 Be ekfujekwa okfu yeru onye eswe;
kẹ l'oo-wotakwa okfu mmamiphe ono,
i kfuru iya ono wụa lẹ ntụ.
10 Ba afọfukwa ékpè, e gude
kpaa oke-alị l'oge ndiche;
ọphu ịi-bajẹkwa l'alị ndu a tọru ogbe;
11 kẹle Ojejoje, bụ ike kpụu
a-byakwaru ẹphe ọdzori.
Ọo-gbakwaru ẹphe ọdzori;
gbagude ngu.
12 Yejekwaru ẹhu l'iphe eezi ngu;
nggu angabẹje nchị l'okfu, ezi mmamiphe.
13 Ba apajẹkwa nwata
mini-ishi-ọba.
Chije iya iphe; l'ẹ-tọ nwụhukwa.
14 I -gude ẹchachi hụ̀a ya àhụ̀hù;
nggu adzọo ya ndzụ.
15 Nwa mu; iphe e-me t'ẹhu tsọo mu ẹna;
kwa l'ị bụ onye maru iphe.
16 Mbụ l'obu a-nọdu atsọ mu ẹna;
m'ọ -bụru l'okfu, shi ngu
l'ọnu adabujeru adaburu.
17 Be ejijekwaru ndu ẹjo madzụ ijimẹnya.
Tẹ iphe ii-mejechia bụru
t'ị tsụje Ojejoje egvu.
18 Ono iphe e-me t'ụzo ifu ngu dụru ngu lẹ mma;
ọphu iphe ono, iile ẹnya iya
ono 'aladụ kẹ mmanu.
19 Ngabẹ nchị nwa mu; maru iphe;
tẹ obu ngu nọdujekwa l'egbe ndzụ, iibu.
20 Be etsokwa ndu angụruma;
ọphu i tsokwa ndu ẹkpiri anụ;
21 kẹle ndu angụruma;
mẹ ndu ẹkpiri akpajẹkwa ụkpa.
Onye azẹ-phe ngwọrinaka
abụru nkaraba ẹkwa;
bẹ oo-mekochaa wee.
22 Nụjekwaru nna, mụru ngu nụ okfu;
ọphu ịikpojekwa nne ngu ẹbo-ẹbo-l'afụ;
okfu l'ọ kahụwaru.
23 Zụta ire-lanụ;
nggu azụta mmamiphe!
Be erekwa iya erere!
Bụru onye hụ̀rù onwiya àhụ̀hù;
nggu enweru egomunggo.
24 Nna onye doberu-ẹka ndoo;
bẹ ẹhu atsọje ẹna nshinu.
Nwa, maru iphe;
abụru ugvu nụ nna iya.
25 Mejekwa t'ẹhu tsọ nna lẹ nne ngu ẹna.
Nggu emee tẹ nne,
mụru ngu nụ
teje ẹswa l'okfu-ẹhu ngu!
26 Nwa mu; tẹ obu ngu nọdu l'ẹke mu nọ.
Ẹnya erua ngu alị l'umere mu;
27 kẹle nwanyi ọkpara bụkwa iduma.
Nwanyi, eme ẹji abụru
wẹlu, dụ kpagụngu.
28 Ọ bụ ẹge abalị-d'egvu anọduje l'ẹgbudu;
kwabẹru madzụ; bụ ẹge ọ nọduje.
Iphe ọ nọ l'ọzo iya abụru
t'ọ rata unwoke ndu achị
nwanyi t'ẹphe ka l'igwe.
29 ?Bụ onye bụ onye a tụru ọnu?
?Bụ onye bẹ aphụ jiru ọkpoma?
?Bụ onye bụ onye nseku?
?Bụ onye bụ onye edo?
?Bụ onye bụ onye ụkparehu?
?Bụ onye bẹ ẹnya eke mee mee?
30 Ọ bụ ndu t'ẹ b'ọ phọdu l'ite;
ndu etsojeru l'achọ mẹe,
a gwaru agwagwa.
31 Wofu ẹnya lẹ mẹe teke ọotsu vaa vaa;
l'atsụtsu atsụtsu l'okoro;
mẹ teke o deru ederu.
32 E -megee; bẹ ọotajekwa l'ọ bụ agwọ;
ẹhuka iya adụ l'ọ bụ ẹra ogiji.
33 Teke ono; nggu awata ọphu
iphe ẹ tịi phujehadua;
wata ọri iphe gbachiru ẹnya.
34 Teke ono; yọ dụ ngu l'ọ bụ
onye zẹ l'echi eze ẹnyimu;
mbụ l'ọ bụ onye degeru
l'iphe e gvuberu l'eli
ụgbo-mini.
35 Nggu awata ọra:
“L'e tsuru ngu iphe!
Ọ bụ l'ẹphe te mekakwa mu iphe.
Ẹphe tsuru ngu iphe;
ọ bụ l'ẹ to rudu ngu l'ẹhu.
?Bụ teke ole bẹ ii-tehu;
je ọcho mẹe ọdo.”