21
1 Ọ bụ ẹge Ojejoje anọduje
atụzi ẹke nggele a-tsọ laa;
bụ ẹge ọonoduje atụzi ọkpoma onye eze.
2 Uche onye 'adụ iya njọ.
Obenu l'ọ bụ Ojejoje maru
iphe bụ uche onye.
3 Iphe dụ mma; daburu adaburu;
bẹ Ojejoje kakwa anata;
mẹ lẹ ngwẹja.
4 Ọ-ka-onwonye-mma-l'ẹnya;
mẹ ẹza, ndu ẹjo madzụ ese
tụkokwa bụru iphe dụ ẹji l'ifu Nchileke.
5 Iphe onye, nweru ọriri ziru
obu alị rịa; mee;
abụjekwaru iya uru.
Ẹge onokwaphụ;
bẹ ọchi iphe ọku; mee atụje madzụ ụkpa.
6 Ẹku, a dzụtaru l'ẹjo-ire
ephukashihujekwa l'ọ bụ udzu ite.
Ẹge onokwaphụ b'ọ bụ ọnya,
egbu madzụ l'ophọku.
7 Ọ bụ ẹhuka ẹhuka kẹ ndu ẹjo iya ono;
bụ iya bụ iphe e-kpofu ẹphe ekpofu;
kẹ l'ẹphe jịkaru ome iphe nhamụnha.
8 Ndu ẹjo iya ono; te mejekwa iphe nhamụnha.
Obenu l'iphe onye eme ọhuma;
bẹ iphe oome adụkotaje nhamụnha.
9 Ọ kakwa mma l'i bu l'azụ-ụtsulo;
mẹ lẹ nggu lẹ nwanyi okfu-ọnu bu.
10 Onye eme iphe dụ ẹji;
bẹ ome iphe dụ ẹji evuje evuvu;
Ọphu imiko madzụ ibe iya 'adụdu iya.
11 A -hụ̀a onye ụru-ọnu àhụ̀hù;
'o-nwe-egomunggo egude iya kwaa ẹnya;
A -kpọ-ziaru onye maru iphe ụzo;
yọ kabaa amama.
12 Onye doberu ẹka ndoo
atụfuje ẹnya ele iphe amụ
l'ụlo ndu eme iphe dụ ẹji;
Mbụ; kpurupyata, ndu ẹjo iya ono l'ẹphe ha.
13 Onye tsuchiru nchị t'ẹ b'ọ nụ
mkpu onye ụkpa echi;
bẹ e-chinua nk'iya ujiku lanụ;
ọphu ọdudu onye anụ iya nụ.
14 Iphe-ọma, e meru l'edomi
adanyijekwa ẹhu-eghughu.
Ẹka-azụ, a rẹru madzụ
l'uwe iya abyanyije oke ẹhu-eghughu.
15 E -kpee ikpe, dụ maa;
bẹ ndu doberu ẹka ndoo etejekwa ẹswa.
Obenu lẹ ndu ẹjo iya ono; bẹ ẹhu adaje kọo.
16 Onye lụfuru l'ọkpa egomunggo;
be tsokwaa lẹ ndu maa.
17 O-ri-l'agọ abụjeru onye ụkpa.
Ẹge ono bẹ onye yeru mẹe;
mẹ o-ri-l'ọnu obu;
te enwejedu iphe.
18 Ndu iphe dụ ẹji l'alajẹ l'ọchi
ndu doberu ẹka ndoo.
Ẹge ono bẹ ndu ẹ te gudedu
ire ẹphe ẹka ala lẹ kẹ ndu obu gụru iphoro.
19 Ọ kakwa mma t'ị kwata je eburu l'echi-ẹgu
mẹ l'ọlu nwanyi, nweru ẹjo ọkpoma;
bya aswọnuka ụswo.
20 Ụlo onye maru iphe;
bẹ nri, eeri eriri l'ụdu iya l'ụdu iya;
mẹ manụ akụjeru akụru.
Obenu l'onye eswe erigbuje iphe o nweru.
21 Onye achị nta
odobe-ẹka-ndoo
yẹle nta n-yemobu achịtaje ndzụ.
Onye ono; bẹ aa-nọdu
akwabẹ ugvu; ẹku abụru nk'iya.
22 Onye maru iphe;
bẹ etsogheje mkpụkpu
ndu ndaji-nggara ọgu;
nwukposhia
ọkpo-mgbinyiku ụpho-mkpuma
mkpụkpu ẹphe, ẹphe keru ike yeru.
23 Onye eche ọnu iya nche; bụru onye ata ire iya ẹra
bẹ ezejeru iphe-emeka.
24 Onye eku onwiya ekuku;
bụru
ọ-ka-onwiya-mma-l'ẹnya;
bẹ bụ ụru-ọnu bụ ẹpha iya.
Onye ono bụ ịnyangga kpụu.
25 Onye ẹnyiru bụ ẹkpiri egbuje iya;
kẹ l'ọ chịru ẹka wụshi;
jịka o je ozi.
26 Eswe l'ẹnyashi;
bẹ ọonoduje agụ iya
tẹ ya nweru ọwaa;
nweru ọwaa.
Obenu l'onye doberu ẹka
ndoo te elejedu ẹnya l'iphe ọonu madzụ.
27 Ngwẹja, ẹjo madzụ achị;
bụ akpamara l'ifu Nchileke;
ọphu ọ bụru k'onye gude
ẹjo oriri bya iya egwogwo.
28 Onye ẹjo ekebe;
bẹ ọnu a-bụru kpụrukudungu.
Obenu l'onye egejeodu nchị;
tẹmanu yo yede ọnu;
bẹ okfu, o kfuru a-nọ jeyewaru.
29 Ẹjo madzụ emeje t'a sụ.
Obenu l'onye obu gụru iphoro
arịje iphe oome arịri.
30 Ẹ to nwedu mmamiphe;
m'ọ bụ iphe-odo-ẹnya;
m'ọ kwanu idzu,
ee-gudeghe mebata Ojejoje.
31 Iphe e meru ịnya kwabẹru bụ kẹ ọgu.
Obenu l'ọ bụ Ojejoje emeje t'e mekputa l'ọgu.