2
Uru, nọ lẹ Mmamiphe
1 Nwa mu; haa okfu,
shi mu l'ọnu;
mẹ iphe mu ezi ngu ezizi;
t'ọ gaaru ngu mkpa.
2 Wota nchị ngu pyoo l'ẹke mmamiphe nọ;
nggu ewota obu ngu zia l'ọmuta iphe.
3 Rọjee rọ-shia ike;
tẹ iphe doo ngu ẹnya;
obu erua ngu alị.
4 Lee ẹnya iya l'ọ bụ
onye ele ẹnya mkpọla-ọcha;
nggu achọo ya l'ọ bụ
onye achọ ẹku, e domiru edomi.
5 Ono bụ teke iphe bụ
ọtsu Ojejoje egvu
e-do ngu ẹnya;
nggu amakwarụphu Nchileke.
6 Kẹ l'ọ bụ Ojejoje anụje mmamiphe;
bụru iya emeje t'iphe doo
madzụ ẹnya; onye ọbu akwaa ẹnya.
7 Ndu obu gụru iphoro;
b'ọ kwakọberu mmamiphe;
l'egbochitaje ndu
ụta ẹ-ta dụdu lẹ ndzụ ẹphe.
8 Ndu doberu ẹka ndoo;
bẹ ọonoduje echekwa;
ọphu oowofujedu ẹnya
l'ẹke ndu o gude ire ẹphe ẹka.
9 Ọ bụ mmamiphe e-me t'ị
maru iphe bụ odobe ẹka ndoo;
maru iphe bụ ikpe, dụ maa;
maru iphe bụ ire-lanụ;
mẹ ụzo, dụ mma.
10 Ishi iya abụru lẹ mmamiphe
a-ba ngu l'obu;
l'iphe odo madzụ ẹnya
atsọlahaa ngu ẹna.
11 Okfu, vudo nhamụnha;
mẹ iphe-odo-ẹnya abụru
iya a-nọdu eche ngu ẹhu.
12 Mmamiphe bụ iya a-dzọ
ngu l'ọ̀kpà ndu ẹjo iya ono;
dzọo ngu l'ọ̀kpà ndu ntụmatu.
13 Mbụ ndu ahaje ụzo,
vudo nhamụnha;
shilahaa ụzo, gbaru ọchi;
14 ndu, bụ ẹjo iphe adụje ẹphe mma;
ụgho abụru ẹphe iphe ọtso ẹna.
15 Ẹphebedua l'onwẹphe
bụ ndu ẹregede.
Iphemiphe ọbule,
ẹphe eme abụru ẹregede.
16 Ọ bụ mmamiphe a-dzọ
ngu l'ẹka nwanyi, eri ogori;
mbụ l'ẹka nwanyi, pheru akoru;
bya egude ire mẹremere l'edeta madzụ.
17 Mbụ nwanyi, gbafụtaru lẹ kẹ nwoke,
kụru iya ákụku; wowaru ndzụ;
ẹphe gbaru l'ifu Nchileke fua l'alị.
18 Ụlo egbe nwanyi ono kwa alụfu-anwụhu;
ụzo iya abụru ụzo, e shi ala maa.
19 Ẹ to nwedu onye kparu l'ụlo
nwanyi ono, latajẹru nụ.
To nwe onye jejeru iya nụ,
phụru ọkpa, o gude lata.
20 Ọo ya bụ; t'i tsoru ọ̀kpà ndu eme ọhuma.
T'ọ bụru ụzo ndu, doberu
ẹka ndoo etso; bẹ ịi-nọdu etso.
21 Kẹ l'ọ kwa ndu obu gụru iphoro e-bu l'alị-a;
bụru ndu ụta ẹ-ta dụdu lẹ
ndzụ ẹphe e-bu iya.
22 Obenu lẹ ndu ẹjo iya ono;
bẹ ee-me t'ẹphe chịhu l'alị-a;
fefu ndu, ẹ te gudedu ire ẹphe ẹka efefu.