14
1 Nwanyi, maru iphe
ajịkobeje ụlo iya ajịkobe.
Obenu lẹ nwanyi ọphu bụ
onye eswe egudeje ẹka iya
l'akpaka ụlo iya akpaka.
2 Onye obu gụru iphoro
anọduje atsụ Ojejoje egvu.
Obenu l'onye ụzo iya
dụ nggọdogo-nggọdogo
ta dụdu iphe ọogubeje Ojejoje.
3 Onye eswe ekfutaje iphe
ochi-ẹchachi kpube onwiya.
Obenu l'ọnu ndu maru iphe
anọduje eche ẹphe.
4 Eswi, e gudeje akọ iphe
'anọdu; ụko nri adụ.
Obenu l'eswi -jeshia ozi ike; nri atụa ẹgu.
5 Onye ekebe, e gude
ire iya ẹka; ta adzụjekwa ẹjo-ire.
Obenu l'onye ẹjo ekebe;
bụ ẹjo-ire anọduje afụshi iya l'ọnu.
6 Onye ụru-ọnu achọje
mmamiphe; tọo phụ iya.
Obenu l'onye nweru
egomunggo;
bẹ ọmaru iphe adụje ntse.
7 Bujekwaru ụba yeru onye eswe;
kẹ l'ẹ tọ dụdu iphe ii-shi iya l'ẹka amụta.
8 Iphe ekoshije l'onye nweru
egomunggo maru iphe bụ
l'ụzo iya edoje iya ẹnya.
Obenu l'iphe ekoshije l'onye eswe
ta madu iphe bụ l'ọo ụgho;
bẹ oogudje eme iphe.
9 Onye eswe egudeje ẹjo iphe atụ mgbọnu.
Obenu l'onye obu gụru iphoro
anọje Ojejoje l'obu.
10 Onyenọnu amajẹru iphe atsụ iya l'ẹhu;
To nwe onye yẹle ibe iya
gba l'ẹhu-ọtso-ẹna ya.
11 Ufu ẹjo madzụ;
bẹ ee-chikpo.
Obenu l'ụlo onye doberu ẹka
ndoo a-nọdu ájá ájaájá eje.
12 O nweru ụzo, abụje;
madzụ eshi iya;
yọ dụ iya l'ọ bụ ọkpobe ụzo.
Obenu l'ẹke ọ sụberu ishi bụ anwụhu.
13 Iwe tso ọchi;
nggumaphụ etsoru
ẹhu-ọtso-ẹna.
14 Ndu ẹ te gudedu ire ẹphe ẹka
a-nata ụgwo iphe ẹphe meru.
E bua ndu eme ọhuma
nggo iphe ẹphe meru.
15 Onye mapeteru iphe
ekwetaje iphemiphe ọbule.
Obenu l'onye nweru egomunggo
arịje-odu ọriri; maru ẹke oo-ye ọkpa.
16 Onye maru iphe atsụhuje Ojejoje
egvu haa ome ẹjo iphe.
Obenu l'onye eswe emeje lọkaralokara
tubesu l'ọo iphe gbarụnu;
bẹ ya eme.
17 Onye ọkpoma-ọku emeje eswe-eswe;
ọphu bụ onye ẹnya ruru alị atajị nshi.
18 Ome-eswe edujeru madzụ ye l'ome-ririri.
Obenu l'onye obu ruru alị
ekpujeru mmamiphe l'ọ bụ okpu-eze.
19 Ndu ẹjo iya ono e-byiru
ndu ọphu eme ọhuma ikpere;
Ndu akirishi abya arọ
l'ọnu-ụzo ndu doberu ẹka ndoo.
20 Ufu onye ẹjo-ẹka teru ẹnya;
mbụ tee ya jeye lẹ ndu obutobu iya.
Obenu l'oke amadụ enweje ndu ọ̀nyà l'igwe.
21 Onye ẹ-ta gụbedu obutobu iya iphe;
kwa ẹjo madzụ b'ọ bụ.
Obenu l'ọnu-ọma bụ
k'onye, emejeru ndu ụkpa iphe-ọma.
22 Ndu anọduje t'ọ tsụru ibe ẹphe;
?tọ bụdu ẹji, ẹphe eme iya tọo?
Obenu lẹ ndu anọduje t'ọ
dụru madzụ lẹ mma;
bẹ eeyejeru obu;
l'emeru ẹphe ire-lanụ.
23 Iphe bụ akanya, madzụ ese; bẹ uru anọjekwa.
Obenu l'onye bụlephu ọnu
b'ọ phọduru iya; bẹ ụkpa kwa nk'iya.
24 Ẹku bụ nggo, eebuje onye maru iphe.
Obenu l'onye eswe
bụlephu eswe iya ono;
b'e gudeje maru iya.
25 Onye gude ire-lanụ
l'agba ekebe adzọkwa ndzụ.
Obenu l'onye gude ụgho
l'agba ekebe bụ
o-deru-oye; b'ọ bụ.
26 Onye atsụ Ojejoje egvu;
bụ onye dakoberu
agbụru-anyị.
Ẹke ono abụru ụnwu iya
a-gbabẹ-a-dzụru.
27 Ọtsu Ojejoje egvu;
bụ ishi nggele, ndzụ shi atsọshi.
Ọ bụ iya emeje tẹ madzụ
ba adalahu l'ọnya, anwụhu gbaru.
28 Ọ bụ gidigidi bụ ugvu eze.
Obenu l'onye ishi ẹ-te nwedu madzụ;
bẹ yifuakwaru nụ.
29 Ọ kwa ọta-nshi emeje tẹ
iphe doo madzụ ẹnya.
Obenu l'onye ọkpoma-ọku
eme tẹ ndiphe maru ẹge eswe iya hatabe.
30 Obu-odoo emeje t'ẹhu dụ madzụ npho.
Obenu l'ijimẹnya atsụje ọkpu ụme.
31 Onye akpa onye ụkpa ẹhu;
bụkwa Nchileke, meru iya nụ;
b'o me iphe-iphere.
Obenu l'onye emeru onye,
ẹ-tọ dụdu ẹge ọ haru iya ọhuma;
kwa Nchileke b'ọ kwabẹ ugvu.
32 Iphe alọ-tsuje ẹjo madzụ;
bụ ẹjo iphe oome.
Obenu l'onye doberu ẹka ndoo
nweru ẹke ọo-nọdu;
zeeru ndzụ;
m'o -ruhuru ọ nwụhu anwụhu.
33 Mmamiphe anọje l'obu ndu
iphe doru ẹnya.
Obenu lẹ ndu eswe ta madụ kẹ mmamiphe.
34 Odobe-ẹka-ndoo emelije mba emeli.
Obenu l'ẹjo iphe bụ iphe-iphere
nọduru iphe, bụ ọha, nọnu.
35 Nwozi, maru iphe;
bẹ eze enweje ifu-ọma
l'ẹke ọ nọ.
Obenu lẹ nwozi,
emechishi eze ifu;
b'ọ tụ-koshije ẹhu-eghughu iya.