11
1 Oye ẹregede l'igwe,
eegude atụ iphe kwa
akpamara l'ẹke Ojejoje nọ.
Obenu l'ogude ọkpobe iphe,
eegude atụ iphe tụa ya adụje iya mma.
2 Ekuku -vuta ụzo; iphere etso iya.
Obenu l'ọdu-agu -vuta ụzo;
mmamiphe etso iya.
3 Iphe anọduje edu ndu
obu gụru iphoro bụ ire-lanụ.
Obenu l'iphe egbuje ndu
ẹ te gudedu ire ẹphe ẹka
bụ ntuphu-ire.
4 Mbọku, Nchileke e-koshi
ẹhu-eghughu iya;
bẹ ẹku, madzụ kpataru
te eyekwaru onye ọbu ẹka.
Obenu l'iphe adzọfutaje
madzụ l'ọnwu
kwa odobe-ẹka-ndoo.
5 Iphe abọjeru onye ụta
ẹ-ta dụdu lẹ ndzụ iya ụzo
kwa odobe-ẹka-ndoo.
Obenu l'ẹjo madzụ bụ
ẹjo iphe iya ono emeje t'ọ daa.
6 Iphe adzọje ndu ire-lanụ bụ
odobe-ẹka-ndoo.
Obenu lẹ ndu ẹ te gudedu
ire ẹphe ẹka bụ ẹjo iphe ẹphe
ahataje ẹphe l'ọnya.
7 Ẹjo madzụ -nwụhu;
iphe oole ẹnya iya anashịhu iya.
Iphe o shi gbaa ego
lẹ ya e-gude ike iya mee
abụru kẹ mmanu.
8 Onye doberu ẹka ndoo;
bẹ aadzọfuje l'iphe-ẹhuka;
iphe-ẹhuka ọbu alaaru ẹjo madzụ.
9 Onye ẹ-te emedu ele Nchileke;
bụ iphe shi iya l'ọnu;
bẹ oogudeje emebyishi
ibe iya.
Obenu l'onye doberu ẹka ndoo
bụ mmamiphe bẹ adzọje iya nụ.
10 Iphe ọma -gbaaru onye
doberu ẹka ndoo;
ndu bu lẹ mkpụkpu ono etee ẹswa.
Ẹjo madzụ -nwụhu;
ndiphe etee ẹswa.
11 Ọnu, onye obu gụru iphoro
gọru akwọ-lije mkpụkpu.
Obenu l'ọnu, ẹjo-madzụ
emebyije iya emebyi.
12 Onye ẹ-te nwedu egomunggo
akpọje ibe iya
ẹbo-ẹbo-l'afụ.
Obenu l'onye nweru egomunggo
atajẹ ire iya ẹra.
13 Onye sụruku-sụku
ekfukashije iphe e domiru edomi.
Obenu l'onye e gude
ire iya ẹka edomije iphe dụ kẹ edomi.
14 Ọha, ẹ-te nwedu onye
akpọ-ziru ẹphe ụzo adajẹkwa.
Obenu lẹ mkpụkpu,
aadụ l'igwe akpọ-ziru ụzo b'a dzọje.
15 Onye naru onye ẹ tọ madụ
mkpalẹka bụkwa okfu;
bẹ ookotaru onwiya.
Obenu l'onye ẹ-ta nadụ madzụ mkpalẹka;
bẹ nchị a-dụ ndo.
16 Ọkpobe nwanyi;
bẹ nweru ùgvù.
Ẹku abụru kẹ ẹjo nwoke.
17 Onye, aphụru madzụ imiko bụ onwiya;
bẹ oomeru ọhuma.
Obenu l'ẹjo madzụ bụ
iphe-ẹhuka bẹ ọokpataru onwiya.
18 Ẹku, ẹjo madzụ akpa
bụ iyi b'ọ bụru iya.
Obenu l'onye doberu ẹka ndoo;
bẹ obunggo iya anọje jeye.
19 Onye odomu edotaje iya ndzụ.
Obenu l'onye achị nta
ẹjo iphe bụ ọnwu iya b'ọ chọ.
20 Ndu ẹjo ọkpoma adụje
Ojejoje ẹkpanashi.
Obenu lẹ ndu ụta,
ẹ-ta nọdu l'ẹhu adụje iya mma.
21 Maru amaru lẹ ndu
ẹjo-madzụ b'ẹ ta hadu kẹ manụ.
Obenu lẹ ndu doberu ẹka
ndoo ta dụdu iphe e-me ẹphe.
22 Nwanyi, ama mma;
t'ọ ma oye ọnu l'okfu
dụ l'ọ bụ echi
mkpọla-ododo, eeyeru ezi l'ọnu-imi.
23 Iphe agụ onye doberu ẹka
ndoo bụ l'ọma bẹ ọosubeje ishi.
Obenu l'iphe ẹjo madzụ
ele ẹnya iya bụ l'ẹke
ọosubeje ishi bụ
l'oke ẹhu-eghughu,
Nchileke a-byabẹ iya.
24 Onye asa ẹka asasa anọduje aba ababa eje.
Obenu l'onye ụkparaswi
emekochajee bụru onye ụkpa.
25 O-me-l'uko abajẹ ụba;
onye emeje t'ẹhu gua ibe iya egugu;
bẹ ee-mekwaphu t'ẹhu gua yẹbedua egugu.
26 Onye domiru nri;
t'o gude kpọ-lia aswa iya;
bẹ ndiphe ebujeru ọnu.
Obenu l'onye reru nk'iya
l'ògè iya bẹ aajajẹ ajaja.
27 Onye achọ t'iphe dụ mma;
bẹ ọma etsoje.
Obenu l'onye achọ ẹji;
bẹ ẹji etsoje.
28 Onye kpọru obu yeru ẹku a-dakwa.
Obenu l'onye doberu ẹka ndoo;
a-nọdu aja pulapula l'ọ bụ
mkpẹkwo onyingu.
29 Onye, akparu ndibe iya okfu;
te nwekwa iphe oo-keta.
Onye eswe abụru iya
e-mekochaa jeeru onye maru iphe ozi.
30 Nebyi, onye doberu ẹka ndoo amịje;
bụ oshi, anụ ndzụ.
Onye adụje ike kfuta madzụ
abụru onye maru iphe b'ọ bụ.
31 Ọ -bụru lẹ ndu doberu ẹka
ndoo bẹ eebuje nggo lẹ mgboko-a;
bụnu iya bụ lẹ ndu ẹ-te
emedu ele Nchileke;
mẹ ndu ẹjo iya ono
aa-natakwaphụ ụgwo iya nk'ẹphe.