4
Ẹhu-agu ojejoje
(Azá 2:2-4)
1 O -rua l'oge ikpazụ
bẹ ee-me tẹ ugvu ono,
a kpụru eze-ụlo Nchileke ono nọshia ike;
mee ya t'ọ bụru eze l'iphe
bụ ugvu ọdo, nọgbaa nụ.
Ee-me iya t'ọ kakọta iphe bụ ugvu ọdo l'eli.
Ono teke ndiphe a-nọdu awụ awukfu iya.
2 Igweligwe ndu ọhodo a-bya bya asụ:
“Unu bya t'ayi je l'eli ugvu
kẹ Ojejoje!
Unu t'ayi je l'ụlo Nchileke kẹ Jékọpu;
k'ọphu oo-koshi ayi ụzo iya;
t'ayi wata otso ụzo, ọ tọru.”
Ishi iya abụru l'ekemu e-shi lẹ Záyọnu bya;
okfu Ojejoje eshi lẹ Jerúsalemu.
3 Ọ bụ iya e-doshi okfu,
nọ nụ l'iphe bụ mbakeshi;
bụru iya e-doshiru mba ndu k'ike;
ndu ọphu bugbaa ote-ẹnya,
okfu, adaru ẹphe l'ibe ẹphe.
Ẹphe akpụkwashia
ngwa-ọgu ẹphe;
yọ ghọo ọgu, eegude akọ iphe;
akfụ ẹphe aghọo nwa mma, eegude apyị iphe.
Teke ono b'ẹ to nwedu mba,
ahalikwaduru ibe iya ẹka k'ọgu;
ẹphe ta amụhe ẹge e shi alụ ọgu ọdo.
4 Onyemonye ọbule a-nọduje
lẹ mkpuli vayịnu iya;
mẹkwaphu lẹ mkpuli oshi figu iya;
to nwehe onye eye ẹphe egvu;
kẹ l'ọ kwa Ojejoje,
bụ Ọkaribe-Kakọta-Ike ekfu iya.
5 Iphe bụ mba, nọnu bụ ọmarali nk'ẹphe; bẹ ẹphe gude eje. Ayịbedua bụ Ojejoje, bụ Nchileke ayi; bẹ ayi e-gude ẹpha iya l'eje gbururu jeye lẹ tutu yoyo.
Iphe Ojejoje chiru k'ememe
6 Ojejoje sụru: “L'o -rua mbọku ono; bẹ ya a-chịkobe ndu ngvụru; chịkobe ndu a chịfuru l'alị ẹphe yẹle ndu ya meru, ejee iphe-ẹhuka.
7 Ndu ngvụru; bẹ ya e-me t'ẹphe bụru ndu waru nụ. Ya emee ndu a chịfuru l'alị ẹphe t'ẹphe bụru ọha, ike nọ. Yọ bụru Ojejoje a-bụru eze, achị ẹphe lẹ Ugvu Záyọnu tsube lẹ mbọku ono gbururu jeyewaru.
8 “A -bya lẹ nggụbe nwada Záyọnu, bụ ẹke aanọ; l'eche ndu Ízurẹlu l'ọ bụ onye eche atụru-a; bya abụru ẹke ndu Ízurẹlu agbabajẹ je ezeeru ndzụ; ii-mekochaa bụru ishi ẹge i shi bụru teke ndiche. Ọ bụru eze e-mekochaa rube nggụbe nwada Jerúsalemu ẹke ọdo.”
9 ?Bụ ngụnu meru iphe ịira ẹkwa? ?Ti nwehedu onye eze tọo? Onye akpọ-jeziru ngu ụzo; ?tọo nọhedu tọo; meru iphe iphe-ẹhuka byaru bya azụ ngu l'ọ bụ nwanyi, ime eme-wa?
10 Nggụbe nwada Záyọnu; nọdunu ghaa gbụrugburu l'ọ bụ nwanyi, ime eme; kẹle nta-a; bẹ ịibyakwa ọha mkpụkpu-a je anọdu l'echi-ẹgu. Ii-je alị ndu Bábyilọnu. Yọ bụru l'ẹke ono; bẹ aa-nafụta ngu. Ọo l'ẹka ono; bẹ Ojejoje a-gbata ngu l'ẹka ndu ọhogu ngu.
11 Nta-a; bẹ igweligwe mba chịkobewaru onwẹphe t'ẹphe tso ngu ọgu. Ẹphe asụ: “T'e merua ya! T'ayi chịru ẹnya yeru Záyọnu!”
12 Obenu l'ẹphe ta madu iphe bụ iphe Ojejoje arị. Iphe ọ chịru idzu k'ememe te dodu ẹphe ẹnya; mbụ onye ono, chịkoberu ẹphe l'ọ bụ onye, chịkoberu witu, ooje etsutsu ono.
13 “Nggụbe nwada Záyọnu; gbeshi chia ya gbiigbii l'ọ bụ onye l'echi ereshi; kẹle mu e-me t'i fua mpo-ígwè. Ichirukfu-ọkpa ngu abụru ope. Nggu egude iya gwee igweligwe mba tọlitoli; wota uru ono, ẹphe ritaru l'ẹregede ono nụ Ojejoje; mbụ woru ẹku ẹphe ono nụ Nnajiufu ono, nwe mgboko l'ophu ono.”