9
1 Ọ dụ mu t'a sụ l'ishi mu bụ
nggele, mini shi atsọshi;
ẹnya mu abụru okpuru,
ẹnya-mini jiru ejiji;
k'ọphu mu ga anọdulephu
l'akwa ẹkwa: eswe l'ẹnyashi;
kẹ egbushi, eegbushi ndibe mu.
2 Ọ dụ mu t'a sụ lẹ mu nweru
ẹke ndu ije anọje l'echi-ẹgu;
mẹ mu ahalẹphu ndibe mu;
mbụ tụgbukpelephu lụfuru
ẹphe; kẹ l'ẹphe erikota ogori l'ẹphe ha;
ndu kụru l'ẹke ono
bụkota ndu ẹ te egudedu ire ẹphe ẹka.
3 “Ẹphe ekweje ire ẹphe l'ọ bụ
onye kweru akfụ gude
l'agba ẹjo-ire ọgba akfụ.
Ẹ tọ bụdu ire-lanụ;
bẹ ẹphe gude l'aba l'alị-a.
Ẹphe eshije l'ome iphe
dụ ẹji ọwaa baa l'ọdo;
ọphu ẹphe 'amadu onye ya bụ.”
Ono iphe Ojejoje ekfu ndono.
4 T'onyenọnu kwakwaaru ndu ọnya phẹ ẹnya;
ọphu unu 'akpọkwaru obu
yeru unwunne unu unwoke;
kẹ l'iphe bụ nwunne madzụ; ndu k'unwoke
agbakwaru iya ẹregede.
Iphe bụ onye unu l'iya
eshi ọnya abụru onye mgbamu.
5 Onyemonye ọbule l'agbaru ibe iya ẹregede;
ọphu ọ dụdu onye ekfuje ire-lanụ.
Ẹphe dzụtawaru ẹjo-ire jeye
yọ bụwaru ụra, rarụ ẹphe.
Ẹphe emetawa iphe dụ ẹji
jeye ike agwụshia ẹphe.
6 Ọ bụlephu l'unu mewaru
ẹregede; yọ bụru ufu unu.
Ẹphe egude ọgba ẹregede ono
jịka ọmaru onye ya bụ.
Ono iphe Ojejoje ekfu ndono.
7 Ọo ya kparu iphe Ojejoje,
bụ Ọkaribe-Kakọta-Ike ekfu; sụ:
“Lekwa; ya a-mịkwa ẹphe amịmi;
mbụ data ẹphe adata;
kẹ; ?bụnua ngụnu ọdo bẹ
ya e-mebaa lẹ kẹ iphe dụ ẹji, ndibe iya eme?
8 Ire ẹphe bụ akfụ, egbu egbugbu.
Ọonoduje ekfu okfu l'ẹregede.
Onyemonye egudeje
ire-ọma l'ekfu anụ madzụ ibe iya;
Obekwanu l'o gude obu iya l'agbaru iya ọnya.
9 ?Bụ tẹ ya ba ahụ̀shi ẹphe
àhụ̀hù iphe ono, ẹphe eme ono tọo?
?Bụ tẹ ya be emelatashị
ẹphe iphe ẹphe meru iya;
mbụ ndu alị-a tọo?”
Ono iphe Ojejoje ekfu ndono.
10 Ya a-kwa ẹkwa;
chia gbaru-ọso l'okfu-ẹhu ugvu ugvu;
ya a-gụa aphụ ẹke elu akpajẹ nri;
kẹ l'ọ kpọshihuwaru nkụ;
ọphu ọ dụdu ndu
eshijekwadu iya nụ;
ọphu ọ dụhedu onye anụje
ọra eswi l'ẹke ono.
Ụnwenu, ephe l'eli
phekashihuwaru;
ụnwu anụ agbakashịhu.
11 Jerúsalemu bẹ ya e-me t'ọ
bụru ikpọzu; nkụta-ọswa eburu iya.
Iphe, bụ mkpụkpu Júda l'ọ ha;
bẹ ya e-me t'ọ daburu
ochobo; k'ọphu ẹ-to nwedu
onye e-bu iya ebubu.
12 ?Nanụ onye bụ nwoke, maru iphe kẹ tẹ iphe-a doo ya ẹnya? ?Bụ onye bẹ Ojejoje ziru iphe; k'ọphu ọo-dụ ike kọo ya t'o doo ẹnya? ?Bụ ngụnu meru; e mebyishia alị-a woru iya tọgbo ophorokpo l'ọ bụ echi-ẹgu, ẹ-ta dụdu onye esweje iya esweswe?
13 Ojejoje sụru l'iphe kparu iya nụ bụ l'ẹphe gbadoru ome iphe ya tụru l'ekemu, bụ ọphu ya tụru dobe ẹphe l'ifu. Ẹphe te medu iphe ya sụru t'ẹphe meje; ọphu ẹphe 'angadu nchị l'ekemu iya.
14 Iphe ẹphe jechiaru je etsoru abụru ẹjo ọkpoma ẹphe. Ẹphe eje awata ọgwa Bálụ, bụ iphe ndiche ẹphe ziru ẹphe.
15 Ọo ya bụ; ọwaa kwa iphe Ojejoje, bụ Ọkaribe-Kakọta-Ike ekfu ndọ-ọ; mbụ Nchileke kẹ ndu Ízurẹlu: “Lekwa; ya e-me ndu-a t'ẹphe ria nri, atsọ ile. Ya emee ẹphe; t'ẹphe ngụa mini, e yeru iphe egbu madzụ.
16 Ya a-chịkashi ẹphe t'ẹphe dzuru ọhamoha, bụ ẹke ẹphe ta madụ; nna ẹphe ta ama iya. Ọdo bụ l'ọo ogu-mbeke bẹ ya e-gude chịa ẹphe jeye ya egbushigee ẹphe.”
17 Ọwaa iphe Ojejoje, bụ Ọkaribe-Kakọta-Ike kfuru
ndọ-ọ:
“Unu rịnua ya arịri nta-a!
Unu kunua ụnwanyi ono,
akwajẹ ẹkwa anwụhu ono t'ẹphe bya!
Unu zikwaaphu t'e kua ndu
ọphu katsụa ome nka ye iya!
18 T'ẹphe bya ẹgwegwa bya
araaru ayi ẹkwa jeye
t'ẹnya-mini wata ayi ọtsoshi l'ẹnya;
mbụ jeye teke ẹnya-mini
e-shi ayi l'ụgbo-ẹnya l'awụshi.”
19 Aanụkwa ụzu-ẹkwa lẹ
Záyọnu ẹke ẹphe nọ;
l'ara; sụ:
?Ọwaa ẹge e mebyishiru ayi!
?Ọwaa ẹge iphere ayi habe nshinu!
Ayi hafụtajekwa alị ayi-a;
kẹ l'ụlo ayi b'e mebyishiwaru.
20 Unubẹ ụnwanyi;
unu ngabekwa nchị l'iphe Ojejoje!
Unu saa nchị nụa okfu,
shi iya l'ọnu!
Unu zikwaa ụnwada unu
ẹge aatụje ụzu-ẹkwa!
T'onyenọnu zia ibe iya ẹge
eechije mkpu ẹkwa!
21 Anwụhu shiwa lẹ windo
ụlo ayi pyobata bya abahụ
l'ẹke ayi meru;
yọ bụru ụpho-mkpuma mgbochi ayi.
O bufuru ụnwegirima l'esu-ụzo;
bya emee ụnwu-okorọbya;
ẹphe te edzukojehe l'edukfu-ọha.
22 Kfua sụ: Ọwaa iphe Ojejoje ekfu:
“L'odzu ụnwu-eliphe l'a-kụru
l'ọ bụ nshị l'ime-ẹgbudu;
l'ọ bụ ẹke e gburu akpe;
ẹswa iya awụshiru;
ọphu ọ dụdu onye achịkobe iya nụ.”
23 Ọwaa iphe Ojejoje ekfu:
“T'onye maru iphe;
be gudekwa mmamiphe iya
kua onwiya ekuku;
ọphu onye ike nọ;
be egudekwa ike iya ono l'eku onwiya;
ọphu onye nweru iphe
'egudekwa iphe o nweru kua onwiya!
24 Ọwaa bụ-chia iphe onye eku
onwiya ekuku e-gude eku
onwiya ndọ-ọ:
lẹ mu doru iya ẹnya;
yọ maru mu ọhuma;
mbụ maru lẹ mu bụ Ojejoje;
lẹ mu emeje iphe-ọma;
l'ekpe ikpe, dụ maa;
bya ekoshi lẹ mu doberu ẹka ndoo.
Yọ bụru l'eliphe; bẹ mu emekota iphe ono;
kẹ l'ọ bụkota iphe ememe
iya adụje iya mma.”
Ono iphe Ojejoje ekfu ndono.
25 Ọwaa iphe Ojejoje ekfu: “T'e lekwa; l'oge abyaakwa teke ya a-nụ ẹphe aphụ; mbụ ndu, bụ l'eli ẹhu kpụu; bẹ ẹphe buru útsù;
26 mbụ ndu Íjiputu; ndu Júda; ndu Édọmu; ndu Amọnu; ndu Móabu; mẹ iphe bụ ndu bu l'echi-ẹgu, ẹke teru ẹnya. Kẹle iphe bụ mbakeshi l'ẹphe ha bụkwa ndu akpapyị; mbụ je akpaa lẹ ndu Ízurẹlu l'ẹphe ha, ẹ-te ebudu útsù l'ime obu ẹphe.”