46
Ozi ẹhu ndu Íjiputu
1 Ọwaa bụ iphe Ojejoje ziru onye nkfuchiru Nchileke, bụ Jeremáya l'okfu ẹhu mbakeshi.
2 Okfu ẹhu ndu Íjiputu: Ndu eezi ozi ọwaa bụ ndu sọja Fero Neko, bụ eze ndu Íjiputu, bụ onye e mekputaru lẹ mgboro mkpụkpu Kakemishi, nọ l'iku Ẹnyimu Yufurétusu. Onye ono, mekputaru ẹphe ono bụ Nebukadineza, bụ eze ndu Bábyilọnu; l'afa, kwe Jehoyakimu Josáya afa ẹno, ọ wataru ọchi ndu Júda.
3 “Unu dozikwaa iphe unu
egudeje egbochi onwunu l'ọgu;
unu ezefuta jeshia ọgu!
4 Unu kwakọbe ịnya unu k'ọgu;
Unu awụ-koru iya; unubẹ ndu agbajẹ ịnya.
T'onyenọnu vudokwa l'ẹke gbaru iya nụ!
Unu kpugbakwaaru
okpu-igwe unu!
Unu bashịa arwa unu ababa!
Unu atụko uwe-ọgu unu l'ọha yee onwunu!
5 ?Bụ ngụnu bẹ ya ele ẹnya?
Egvu gudeekwaru ẹphe.
Ẹphe agbaakwa ọso.
Ndu sọja ẹphe b'e mekputawaru.
Ẹphe eye ọkpa l'ọso; gbalaa;
l'ẹbe 'agha ẹnya l'azụ.
Ẹphe agba l'achịka ẹnya.”
Ono iphe Ojejoje ekfu ndono.
6 “Ndu ọkpa-ẹgwa ta anahughekwa.
Ọphu onye ike dụ l'ọgu ta agbalaghekwa.
Ọ kwa l'ụzo isheli;
l'ụzo Ẹnyimu Yufurétusu
bẹ ẹphe vukotaru iphe; dashịa.
7 ?Bụ ndu ole ndọ-ọ,
l'abya kulakula l'ọ bụ Ẹnyimu Náyịlu;
mbụ l'ọ bụ ẹnyimu,
jiru ejiji; l'abya utso?
8 Ọ kwa ndu Íjiputu abya
kulakula l'ọ bụ Ẹnyimu Náyịlu ono;
mbụ l'ọ bụ ẹnyimu, jiru ejiji l'abya utso ono.
Ẹphe ekfu sụ l'ẹphe
e-tsulihu tụko mgboko
kpamukpamu tsọpyabe;
L'ẹphe e-mebyishi mkpụkpu
lẹ mkpụkpu yẹle ndu bu iya nụ.
9 Raaru ịnya ono ọra; t'ẹphe gbachịa!
Kfuru ndu agba ụgbo-ịnya; l'ọ sụru!
Tẹ ndu ike dụ l'ọgu gbeshikwa t'e je:
mbụ unubẹ ndu Kúshi;
mẹ ndu Putu, bụ ndu
chịgbaa iphe eegudeje ezeru onwonye l'ọgu;
mẹ unubẹ ndu Líbiya,
ẹnya ka l'iphe laru l'akfụ!
10 Obenu lẹ mbọku ono bụkwa eswe Nnajiufu;
mbụ Ojejoje,
bụ Ọkaribe-Kakọta-Ike.
Ọ kwa eswe ọgwata ụgwo
iphe; mbụ l'ọo ntanụ;
bẹ ọo-gwata ndu ọhogu iya ụgwo.
Ọo nkogo a-sụ madzụ
pyaapyaa jeye;
yo ji iya ẹpho;
mbụ jeye teke ọo-ngu mee ngụ-jia ẹpho;
kẹ l'ọo Nnajiufu;
mbụ Ojejoje,
bụ Ọkaribe-Kakọta-Ike
gude ndu ọhogu iya l'achị ẹja
l'alị ndu isheli; l'iku Ẹnyimu Yufurétusu.
11 Unubẹ ndu Íjiputu;
unu jee Gíledu je emeta manụ banụ.
Obenu l'ọgvu ono,
unu emebe ono te emekwa t'unu ka mma.
Ẹ too mekwa t'unu ka mma.
12 Iphe bụ mbakeshi nụwaru
iphere ono, e meru kpua unu ono.
Ẹkwa unu atụkowa
mgboko l'ọ ha ngaa.
Ndu sọja unu dabutsuwaru l'eli ibe ẹphe.
Ẹphe tụkowa daa ndatẹwo.”
13 Ọwaa ozi, Ojejoje ziru onye nkfuchiru iya; mbụ Jeremáya lẹ k'ẹhu Nebukadineza, bụ eze ndu Bábyilọnu, abya otso ndu Íjiputu ọgu.
14 “Raa iphe-a arara l'alị Íjiputu!
“Nggu echia ya ochi mkpu lẹ Migidọlu!
Chikwaa ya phụ ochi mkpu
lẹ Mẹ́mufisu yẹle Tapénesu:
‘T'onyenọnu vudokwa l'ẹke
gbaru iya nụ kwakọbe;
kẹ l'iphe bụ iphe unu
nweru bẹ ọgu abyaakwa emebyishi.’
15 ?Nanụ ẹge e meru bẹ agwa unu;
mbụ Apisu ta dụdu ike vudo?
Iphe kparu iya nụ bụ lẹ
Ojejoje nwutsuru iya.
16 Ndibe unu ndu ọphu
ụkfu dụru dụ l'igwe;
ẹphe adashịa.
‘Unu gbeshi t'ayi laphu
azụ lakfu ndu alị ayi;
l'alị ẹke a mụru ayi.
T'ayi gbalaaru ogu-mbeke
ndu emegbu ayi emegbu!’
17 Unu gụkwazi Fero,
bụ eze ndu Íjiputu ẹpha; kuje iya:
‘O-kfu-ekfu-'eme-eme.
Teke ọ ga eme iphe
b'ọ paru haa; yọ laa kẹ mmanu.’
18 Ọwaa iphe Eze ono ekfu ndọ-ọ;
mbụ onye ono, ẹpha iya bụ Ojejoje,
bụ Ọkaribe-Kakọta-Ike ono:
Ọ -bụru-a lẹ ya nọ ndzụ
ẹge ya nọ iya-a
b'o nweru onye a-bya nụ.
Onye ono a-dụ l'ọ bụ
Ugvu Tábọ, kakọta ugvu ndu ọdo;
mbụ l'ọ bụ ugvu Kamẹlu,
ha l'eli karia eze ẹnyimu.
19 Unubẹ ndu Íjiputu;
unu kwakọkwaa iphe
unu e-gude laa alị ọdo.
Ishi iya abụru lẹ Mẹ́mufisu
e-mekochaa bụru ochobo;
ee-me iya; tọ dụ onye ebu iya ebubu.
20 Íjiputu dụ l'ọ bụ nwada eswi, ama ntụmatu.
Obenu l'òdzù, shi l'ụzo
isheli e-je anọdu etso iya tekenteke.
21 Ndu ẹphe butaru ebuta
t'ẹphe bya alụaru ẹphe ọgu
bẹ dụ l'ọ bụ oke-eswi,
daru ọkporokpo.
Ẹphebedua aghakọbe gbalashịa.
Ẹphe ta dụdu ike vudo;
kẹle mbọku, ẹphe a-la l'iyi dakfutawaru ẹphe;
mbụ teke aa-nụ ẹphe aphụ.
22 Ndu Íjiputu a-da ashị l'ọ bụ agwọ, agba ọso;
kẹle ndu ọhogu ẹphe
a-nọdu abyakfuta ẹphe ọgu kẹ nyịbe-nyịbe;
mbụ gude ogbu-nkụ egbu
ẹphe l'ọ bụ onye egbu oshi.
23 Ọswa ẹphe l'ọ ha bẹ ẹphe
a-sụpyashikota;
m'o -ruhuru; o rutabe
iru-a.”
Ono iphe Ojejoje ekfu ndono;
“Kẹ l'ẹphe ka igube l'igwe;
ọphu 'agụtadu ẹphe l'ọgu.
24 Ndu Íjiputu bẹ ee-me iphe-iphere;
kpụru ẹphe ye ndu isheli l'ẹka.”
25 Ojejoje, bụ Ọkaribe-Kakọta-Ike, bụ Nchileke kẹ ndu Ízurẹlu sụru: “Lẹ ya abyakwa ọnu Amọnu, bụ agwa ndu Tebẹsu aphụ. Ya a-nụkwaphu Fero aphụ; mẹ ndu Íjiputu; mẹ agwa ẹphe; mẹkpo ndu eze ẹphe; mẹ iphe bụ ndu tụru obu yeeru Fero.
26 Ya e-woru ẹphe ye l'ẹka ndu achọ ndzụ ẹphe; mbụ l'ẹka Nebukadineza, bụ eze ndu Bábyilọnu; mẹ lẹ ndu ozi iya ẹphe. Ọle; teke ee-metsuaru bẹ ee-bukwaru-a lẹ Íjiputu ẹge e shi buhawaru iya.” Ono iphe Ojejoje ekfu ndono.
27 “Unubẹ ndibe Jékọpu,
bụ ndu ozi iya;
unu ba atsụkwa egvu;
ọphu obu 'awakwa unu awawa;
unubẹ ndu Ízurẹlu!
Ya a-dzọtakwa unu
l'alị ẹke, teru ẹnya;
dzọtakwaphu ndu
awa unu phẹ l'alị ẹke,
a kpụru ẹphe lẹ ndzụ laa.
Unu e-mekochakwaa lata
bya eburu lẹ nchị-odoo;
unu ta achịhe obu l'ẹka;
to nwe onye abyakwadu
unu oye egvu ọdo.
28 Unubẹ ndibe Jékọpu,
bụ ndu ozi iya; unu ba tsụkwa egvu;
kẹle ya nọkwa swiru unu eswiru.”
Ono iphe Ojejoje ekfu ndono.
“Ya e-mebyishikota iphe bụ mbakeshi ono,
ya chịru unu tụkashia ono.
Obenu lẹ ya te emebyishidu unubẹdua.
Ọo àhụ̀hù bẹ ya a-hụ̀ unu;
t'unu shi iya maru iphe.
Ya ta ahakwanụ unu
kẹ ba àhụ̀ unu àhụ̀hù lẹ phuu.”