30
Ụkwa lẹ ndu Ízurẹlu a-lata
1 Ojejoje; mbụ Nchileke kẹ ndu Ízurẹlu
2 asụ mu: “Tẹ mu tụko okfu-a, ya kfuru mu-a dekota l'ẹkwo.
3 Kẹ l'oge abyakwaa; teke ya e-duphuta ndu nk'iya, bụ ndu Ízurẹlu; ẹphe lẹ ndu Júda azụ; ya e-shi l'ẹke ono, a kpụru ẹphe lẹ ndzụ laa ono; bya edophu ẹphe azụ l'alị ono, ya nụru nna ẹphe oche ẹphe t'ọ bụru nk'ẹphe ono. Ono kwa iphe yẹbedua, bụ Ojejoje kfuru ndono.”
4 Ojejoje abya ekfua okfu ẹhu ndu Ízurẹlu; ẹphe lẹ ndu Júda; sụ:
5 Ya anụkwa mkpu ndu atsụ egvu.
Ọ bụ mkpu ndu atsụ egvu;
ẹ tọ bụkwa mkpu k'ẹhu agu.
6 Rịedunu iya arịri. Nwoke;
?ọopaje ẹpho-ime?
?Nanukwanu ẹge e meru;
ya aphụtsua unwoke;
ẹphe achịgbaaru ẹka
kwẹe l'ẹpho l'ọ bụ
nwanyi, ime eme;
onyenọnu echishihutsua echihu l'ẹnya.
7 Tụswekwa!
Mbọku ono a-dụkwa ẹjo
ẹji; k'ọphu bụ l'ẹ-tọ dụhedu
mbọku, a-dụbaa ẹji l'ọ bụ iya.
Teke ono bẹ ndu nk'iya
e-je iphe-ẹhuka;
obenu lẹ ee-kochaa
dzọta ẹphe l'ime iya.
8 Ojejoje, bụ Ọkaribe-Kakọta-Ike bẹ sụru: “L'o -rua mbọku ono: ‘Bẹ ya a-nyakwo odogoro ono, nọ ẹphe l'olu ono; ya abya atọshia ẹphe ẹgbu, e keru ẹphe; ọphu to nwehedu l'ẹphe abụru ndu ọhodo ohu ọdo.
9 Ẹphe a-nọdu ejeru Ojejoje, bụ Nchileke ẹphe ozi yẹle o-shi-l'eri Dévidi, bụ onye ya e-wofutaru ẹphe.
10 “ ‘Ọo ya bụ; ba atsụkwa egvu; nggụbe Jékọpu, bụ nwozi iya!
“ ‘Ọphu t'ẹ b'e yekwa ngu egvu;
nggụbe Ízurẹlu;
kẹle ya e-shikwa l'ẹke teru ẹnya dzọta ngu.
Ya a-dzọta ụnwu ngu l'alị
ẹke a kpụru ẹphe lẹ ndzụ laa.
Ọ bụ teke ono bẹ unu a-lata
azụ bya eburu l'ẹhu-agu;
ọphu 'onwehedu iphe
emekwadu unu ọdo;
ọphu 'onwehedu onye eyekwadu unu egvu ọdo.
11 Ya a-byakwa bya eswiru unu; dzọo unu!’
‘Ya a-byakwa bya atụko iphe bụ mbakeshi ono,
bụ ndu, ya shi woru unu ye
l'ẹka ono mebyishikota.
Obenu lẹ unubẹdua;
bẹ ya te emebyishikotadu kpakparakpa.
Ya ta ahakwanu unu tẹ ya
ba àhụ̀ unu àhụ̀hù lẹ phuu;
ọle ya -bya unu àhụ̀hù;
bẹ ya a-hụ̀ unu l'oruberu iya.’ ”
Ono kwa iphe yẹbe Ojejoje kfuru ndono.
12 Ọwaa iphe Ojejoje ekfu:
L'ọnya, aba ndibe iya kwa 'agwọta agwọta.
Iphe e mekaru unu abụru
'akpọhudu akpọhu.
13 Ẹ tọ dụdu onye a-gbaru unu mkpu;
ọphu ọ dụdu iphe ọdo,
ee-mebaa l'ọnya ọbu, aba unu ọbu;
ọphu 'onwedu l'unu byakwadu
bya aka mma ọdo.
14 Iphe bụ ndu nggu l'ẹphe
shi eshi ọnya zahakọtawaru ngu.
Ẹphe ta akpahẹdu ishi ngu lẹ phuu.
Iphe ya meru ngu dụkwa
l'ọ bụ iphe madzụ emeje ọhogu iya.
Àhụ̀hù, ya hụru ngu adụ
l'ọ bụ onye dụru madzụ ẹhuka ahụ̀je iya.
Ishi iya bụ l'i menukaru iphe dụ ẹji;
iphe dụ ẹji, i meshiru apaa l'igwe.
15 ?Nanụ ẹge e meru;
nggu ara ẹkwa iphe mekaru ngu nụ;
?a sụru ngu l'ọ byakwadụru
bya akpọhu akpọhu?
Unu menukawaru ẹjo iphe;
iphe dụ ẹji unu ahawa l'igwe
kparu iphe ya emee unu iphe ono l'ọ ha.
16 “Obenu l'iphe bụ ndu eripya
unu eripya bẹ ee-ripyakwaphu.
Iphe bụ ndu ọhogu unu;
bẹ aa-kpụ lẹ ndzụ.
Ndu kwaru iphe unu
l'ọkwata bẹ aa-kwakwaphu l'ọkwata.
Ndu keru iphe unu l'ọgu;
bẹ ee-kekwaphu iphe ẹphe l'ọgu.
17 Obenu lẹ ya e-me t'ẹhu dụ ngu mma ọdo;
mee tẹ ọnya, nọ ngu l'ẹhu kpọhu.
Ishi iya abụru l'e kuru ngu
onye a chịfuru achịfu;
lẹ Záyọnu ta dụhedu onye akpa ishi iya.”
Ono kwa iphe yẹbe Ojejoje kfuru ndono.
18 Ojejoje sụru:
Lẹ ọnu-ụlo Jékọpu ono,
e shi kpụa lẹ ndzụ ono
bẹ ya e-dophu azụ l'ọnodu iya.
Ya aphụru ẹke ẹphe bu imiko.
Mkpụkpu ono;
bẹ aa-kpụ-phu azụ l'ẹke ọonohawa;
ufu-eze ono abyakwa bya
anọ-chia ẹnya ẹke gbaru iya nụ.
19 Ndu bu l'ẹke ono a-wata
ọgu egvu-ekele; l'atụ ụzu ẹhu-ọtso-ẹna.
Ya e-me t'ẹphe kabaa l'igwe;
ọphu ẹphe 'abyadu bya alakwadụ alị alị.
Ya e-me t'ẹphe bụru ndu aakwabẹ ugvu;
ọphu ẹnya ta byadụ bya ala ẹphe alị.
20 Ụnwu ẹphe bụ ẹge ẹphe
shi shihu ike teke ndiche bụ ẹphe e-shihu.
Ndu alị-a a-nọdu l'ifu iya
gbabeshia ọkpa ike l'alị;
ndu akagbu ẹphe akpagbu; bẹ ya a-nụ nshị.
21 Onye ishi ẹphe a-bụru onye alị ẹphe;
onye achị ẹphe abụru onye nk'ẹphe.
Ya e-me t'ọ bya anọdu iya ntse;
ọ dụdu; ?bụ onye ha k'ọbya
iya l'ifu l'ẹ be eku iya ekuku?
Ono iphe yẹbe Ojejoje kfuru ndono.
22 “ ‘Ọo ya bụ l'unu a-bụru ndibe iya;
yẹbedua abụru Nchileke unu.’ ”
23 Unu lekwa! Ẹhu-eghughu Ojejoje dụakwa l'ọ bụ oke phẹrephere; mbụ ẹjo oke phẹrephere. Yọ bụru l'ishi ndu iphe dụ ẹji bẹ ọophu temutemu;
24 ọphu ẹhu 'eghubuhukwa Ojejoje gbururu jeye yo meebekota iphe nọ iya l'ọkpoma k'ememe. Ụboku abyaphụ teke iphe-a e-dokota unu ẹnya ọhuma.