20
Jeremáya yẹle Pashọ
1 Pashọ Ima bụ onye achịjeru Nchileke ẹja bya abụru onye ishi ndu ishi eze-ụlo Nchileke. Teke ọ nụru iphe ono, Jeremáya ekfushi ono;
2 yo zi; e chia Jeremáya, bụ onye nkfuchiru ono ẹchachi; woru iya tụ-chia l'ụlo-mkpọro, nọ l'iku ọnu eze-ụlo Nchileke ọphu aza Ọnu-abata Bénjaminu k'eli.
3 Yo be lẹ nchi-ta-abọhu iya; Pashọ atụfuta iya l'ụlo-mkpọro ono. Jeremáya asụ iya: “Iphe Ojejoje gụru ngu ta bụhekwa Pashọ. Iphe ọ gụru ngu kwa ‘Égvù l'ẹkemeke’;
4 kẹ l'ọwaa kwa iphe Ojejoje ekfu: Lẹ ya e-me ngu t'ị tsụlahaa onwongu egvu; ndu yeru ngu obu l'ẹphe ha a-tụko atsụ ngu egvu. Ii-gude ẹnya ngu gẹdegede phụ teke ndu ọhogu ẹphe e-gude ogu mbeke l'egbushi ẹphe. Ndu Júda mgburumgburu bẹ ya e-woru ye l'ẹka eze ndu Bábyilọnu, bụ onye a-kpụ ẹphe lẹ ndzụ lashia Bábyilọnu; gude ogu-mbeke gbushia ẹphe.
5 Iphe bụ ẹku ndu mkpụkpu-a; bẹ ya e-woru yekota l'ẹka ndu ọhogu ẹphe; mbụ iphe bụkotakpo iphe ẹphe setaru l'akanya iya; mẹkpo iphe bụ iphe vu oke aswa, nọkota l'ime iya; mẹkpo iphe bụ ẹku, eze ndu Júda kpataru. Iphemiphe ono bẹ ẹphe e-vukota l'ọgu lashia Bábyilọnu.
6 Nggụbedua, bụ Pashọ yẹle iphe bụ ndu bukota lẹ nke ngu bẹ aa-kpụkota lẹ ndzụ laa Bábyilọnu. Yọ bụru l'ẹke ono; bẹ ịi-nọdu nwụhu; e lia ngu l'ẹke ono; nggụbedua; mẹ ndu ono, yeru ngu obu, ị kfuru iphe Nchileke ẹ-te kfudu ono.”
Aphụ, Jeremáya agụ
7 Nggụbe Ojejoje;
i dusweru mu ụzo;
mu abụru onye e dusweru ụzo.
I mekputawaru mu;
yọ bụru nggụbedua; bẹ eriri laru.
Mu bụwa onye eegude eme
iphe-ọchi mkpụrumkpuru.
Onyemonye anọduje aja mu ewena.
8 Tekenteke, mu ekfu okfu;
bẹ mu anọduje ara iya arara
lẹ kpurupyata abyakwa; ọ-la-l'iyi etso iya.
Ozi, Ojejoje ezi mu;
mewaru; mu abụru onye aakpọfu akpọfu;
bụru onye eegude atụ mgbọnu.
9 Mu -sụ lẹ mu te ekubahedua
ya ẹpha; ọphu mu
'egudebahedua ẹpha iya l'ekfu okfu;
bẹ okfu iya anọduje mu
l'ọkpoma enwu mu
phophopho l'ọ bụ ọku;
mbụ ọku, rakụru mu arakụru l'ọkpu.
Ike alọ-gude iya gvụwaru mu.
Ike gvụakwaru mu.
10 Mu anụkwa taphu-taphu,
ẹphe adzụgbaaru ibe ẹphe:
“L'égvù dụkwa l'ẹkemeke!”
Ẹphe tụko ekfu:
“Unu je edoo iphe ono,
ookfu ono!
Unu t'ayi je edoo iphe oome!”
Iphe bụ ndu ọ̀nyà mu
elekotalephu ẹnya t'ẹphe
maru teke ẹturu a-lọ mu.
Ẹphe atụko l'ekfu:
“T'e duswenua ya ụzo.
Ọ bụ teke ono bẹ ẹka nk'ayi a-kongo;
ayi e-melata iya iphe-a, oome nta-a.”
11 Obenu lẹ Ojejoje nọ swiru
mu eswiru l'ọ bụ onye eze, sọja swiru.
Ọo ya bụ lẹ ndu ono,
achị mu nụ ono;
bẹ ụkfu a-dụ.
Ẹphe te emekputadu;
ọphu 'o reduru ẹphe ẹge ẹphe tụberu.
Ọo-bụru ẹphe iphe-iphere;
ẹnya ẹphe alaa;
t'o nwe l'a azahaa ya azaha.
12 Nggụbe Ojejoje,
bụ Ọkaribe-Kakọta-Ike;
nggụbe onye ono,
enyochaje ndu doberu ẹka
ndoo enyocha; nggụbe onye
avọje obu yẹle ọriri iya avọvo;
melatanụ ẹphe;
kẹ l'ọo nggu bẹ mu yeru ikpe ẹhu mu l'ẹka.
13 Unu gụa egvu nụ Ojejoje!
Unu jaa Ojejoje ajaja!
Kẹ l'ọ dzọfutaru ndzụ
onye ẹ-ta dụdu ẹge ọ dụ
iya l'ẹka ndu ẹjo iphe.
14 Tẹ mbọku, a mụru mu
bụkwaru eswe, a tụru ọnu!
T'eswe mbọku ono,
nne mu mụru mu ono;
ba abụkwa mbọku,
a gọru ọnu-ọma nụ!
15 T'onye byaru bya ezia ya
nna mu bụkwaru onye a tụru ọnu;
mbụ onye byaru bya asụ iya:
“L'a mụkwaru iya nwata; nwata nwoke!”
Ozi ono abụru ozi, ọ nụru; ẹhu atsọo ya ẹna.
16 Tẹ nwoke ono dụkwa l'ọ
bụ mkpụkpu, Ojejoje mebyishiru;
tọ phụru iya imiko.
T'ọ bụkwaru iphe ọo-nọdu
anụ l'ụtsu bụ ụzu-ẹkwa.
O -be l'eswe; yọ nụlahaa mkpu ọgu.
17 Kẹ l'ọ tọ pyị-gbudu mu teke mu nọ l'ẹpho;
tẹ nne mu bụru ili mu.
Ẹpho ahawa iya rụ
kpagụngu jeyewaru.
18 ?Bụnua ngụnu meru
iphe mu lụfutaru alụfuta l'ẹpho;
tẹ mu bya bya aphụ
iphe-ẹhuka yẹle nrimaphụ;
yẹle tẹ mu bya akpọ-chia
ishi ndzụ mu l'iphe-iphere?