15
1 Tọ dụ iya bụ; Ojejoje asụ mu: Ẹ to nwekwa m'o -ruhuru; Mósisu yẹle Sámẹlu abya evudo iya l'ifu; obu iya ta alakfubehekwa ndu-a. Chịfukpelekwaphu ẹphe achịfu l'ifu iya! Haa ẹphe t'ẹphe je!
2 Ọ bụru l'ẹphe jịru ngu ẹke ẹphe ala; nggu asụ: “Ọwaa iphe Ojejoje ekfu:
“Ndu kụru ọgu ọla
l'iphe-ememe.
Ndu kụru ọgu ọla l'ọgu.
Ndu kụru ọgu ọla l'ẹgu.
Ndu kụru ọgu l'aa-kpụ ẹphe lẹ ndzụ.
3 “Ọwaa iphe Ojejoje ekfu: Lẹ ya e-zi ụzi ndu mgbugbu-madzụ ẹno; t'ẹphe je emebyishia ẹphe. Ogu-mbeke a-nọdu egbu egbugbu; nkụta l'akpụ ẹphe wuruwuru; ụnwenu, ephe l'eli yẹle ụnwu anụmanu kẹ mgboko l'avụka anụ ẹphe; l'emebyishi ẹphe.
4 Ya e-me ẹphe t'ẹphe bụru ndu, alị-eze ụnwu eliphe l'ọ ha a-nọdu atsọ oyi. Iphe kparu iya nụ abụru iphe Manásẹ Hezekáya meru lẹ Jerúsalemu. Manásẹ teke ọ bụ eze ndu Júda.
5 “Unubẹ ndu Jerúsalemu;
?bụ onye a-yọru unu ọshi?
?Bụ onye a-kpa ishi k'ọgu aphụ ngu?
?Bụ onye a-haghe iphe
oome je ọkpa ishi ngu?”
6 Ọwaa iphe Ojejoje ekfu
ndọ-ọ:
“Unu gbadoru iya;
ghaaru iya azụ.
Ọo ya meru iphe ya seru ẹka;
woru unu mebyishia.
Ọphu ọ dụhedu iphe e-me
tẹ ya phụaru unu imiko ọdo.
7 Ya e-gude ajakpa phụchaa
ẹphe aphụcha l'iphe bụ
obu-edukfu mkpụkpu
ono l'ọ ha.
Ya e-gbu ẹphe mgbọnwu;
mbụ mee ndibe iya t'ẹphe
bụru kpurupyata.
Ishi iya abụru kẹ l'ẹphe
ta gbanwedu ụzo ẹphe.
8 Ụnwanyi unu, maa tụfuru;
bẹ ya e-me;
ẹphe aka ẹja, nọ l'eze ẹnyimu l'igwe.
Ẹnyanwu -gvuleruphu l'echi-ishi;
bẹ ya e-wota ndu
mgbugbu-madzụ tụaru
ụnwu-okorọbya ẹphe;
shi ẹge ono vee nne,
mụshiru ẹphe aphụ.
Ya e-mee tẹ meji gbabushihu
ẹphe l'ogburu-ọso;
ẹphe awata ọtsu egvu.
9 Nwanyi, mụtaru ụnwegirima
ẹsaa a-yọshihu; tụ-bua ume.
Ẹnyanwu nk'iya a-rịba
teke ọobukwadu eswe.
Ee-me iya iphe-iphere;
kpua ya ifu lẹ ntụ.
Nwa ndu phọduru nụ;
bẹ ya e-nwuru ye;
e gude ogu-mbeke gbushia
ẹphe l'ifu ndu ọhogu ẹphe.”
Ono iphe Ojejoje ekfu ndono.
10 Nshọo mu-a; nne mu; ?bụnua ngụnu meru iphe ị mụru mu; mu abụru onye yẹle onyemonye ese okfu; l'adzọ ẹnya. Mu te ejebua madzụ ụgwo; ọphu mu te ejitabua madzụ ụgwo; obekwanu l'onyemonye ebuleru mu phụ ọnu.
11 Ojejoje sụkwaru: “Iye; ya a-nafụta ngu t'ọ dụru ngu lẹ mma. Iye; ya e-me ndu ọhogu ngu t'ẹphe wata ngu ọro arọro; m'o rua oge teke eeje iphe-ẹhuka yẹle teke aa-kpa ndiphe ẹhu.
12 Madzụ; ?l'ọo-dụ ike gbajia ígwè; mbụ ígwè; m'ọ kwanụ ope, shi l'ụzo isheli.
13 “Ẹku ngu; mẹ iphe i nweru enweru bẹ ya e-nwuru ye t'e vua ya l'ọgu; k'ìphòró. Iphe kparu iya nụ abụru iphe dụ ẹji, iimeebe l'alị ngu mgburumgburu.
14 Ya e-me ngu t'ị bụru ohu l'ẹka ndu ọhogu ngu l'alị, ẹ-tị mahaadụa; kẹ l'ẹhu-eghughu iya e-nwuta ọku, e-ke ngu nụ.”
15 Nggụbe Ojejoje; ọ kwa nggu bụ onye maru nụ. Nyatanu mu! Nggu eletanu mu ẹnya! Gbanaaru mu ọdzori l'ẹka ndu akpa mu ẹhu. Keshinu ẹ tị bụdu onye obu-ọku; be wofushinu mu. Nyatanu ẹge mu jetaberu iphe-iphere l'okfu ẹhu ngu.
16 Mu nụru okfu ngu; bya eria ya eriri. Yo mee mu; ẹhu l'atsọ mu ẹna; tẹmanu b'ọ dụkwa mu phụ mma l'ọkpoma. Ishi iya abụru l'eeku mu ala l'ẹpha ngu; nggụbe Ojejoje, bụ Nchileke; bya abụru Ọkaribe-Kakọta-Ike.
17 Mu ta nọbukwaa l'ẹke ndu mgbọnu dọru; ọphu mu l'ẹphe ta anọbukwaa l'ete ẹswa. Mu anọdujeru onwomu; kẹ lẹ mu marua l'ẹka ngu nọ mu l'ẹhu; ẹhu l'eghushi mu eghughu ike.
18 ?Bụ ngụnu meru; ọphu iphe-a, l'eme mu ẹhuka-a 'emebuhudu mu emebuhu; ọnya, aba mu nụ adụ ẹjo ẹji; t'o kwe akpọhu. ?Iime t'ị bya adụru mu l'ọ bụ nggele, edeje madzụ edede; mbụ l'ọ bụ nggele, e jeru; mini ta nọ iya.
19 Ọwaa iphe Ojejoje ekfu. Ọ sụru: “L'ọ -bụru l'izimana laru mu azụ; ya edophu mu azụ l'ọnodu mu; k'ọphu mu a-wataru iya ojeru ozi. Ị -wata okfu okfu, nweru ishi; mbụ okfu, ẹ-ta bụdu mkpọkoro okfu; nggu abụru onye a-wataru iya ekfuchiru. Tẹ ndu-a lakfutanu ngu; ẹ tọ bụkwa tẹ nggụbedua lakfuta ẹphe.
20 Ya e-me ngu t'ị bụru ụpho-mkpuma, e gude ope kpụa nọduru ndu-a. Ẹphe e-tso ngu ọgu; ọle ẹphe tee mekpudadu ngu. Ishi iya abụru lẹ ya nọ swiru ngu eswiru; k'ọphu ya a-nafụtaje ngu; dzọo ngu.” Ono iphe Ojejoje ekfu ndono.
21 Ya a-dzọ ngu l'ẹka ndu iphe dụ ẹji; bya agbafụta ngu l'ẹka ndu ẹjo-ụdudu ono, swịkuru ngu aswịku ono.