12
Ajị, Jeremáya ajị
1 Nggụbe Ojejoje; ị bụ onye doberu ẹka ndo;
jeye teke mu echi ngu okfu.
Ọle; mu e-kfukwaru ngu
phụ kẹ ikpe, dụ maa, iikpeje.
?Bụ ngụnu kparu iphe
iphe ekwejeru ndu ẹjo-madzụ?
?Bụ ngụnu kparu iphe
ẹhu adụje ndu ẹ te egudedu
ire ẹphe ẹka agu?
2 Ọ bụ nggu dzaru ẹphe;
ẹphe agbaa ọ́gbaragba;
bya evua; mịlahaa amịmi.
Ẹphe akpụjeru ngu l'ọnu tekenteke.
Obenu l'ẹ too rujedu ẹphe l'obu.
3 Obenu lẹ mbẹdua;
bẹ nggụbe Ojejoje maru.
Ịiphuje mu; l'adataje ọriri,
mu arịru ngu adata.
Kpụtanu ẹphe kpụfu
l'ọ bụ atụru, a kpụ eje egbugbu.
Wonuru ẹphe dobe iche
kwabẹru mbọku, ee-gbu ẹphe.
4 ?Bụ jeye teke ole;
bẹ alị-a a-gụ aphụ gụ-bebe;
mbụ ẹswa, nọgbaa
l'alị akpọshihukota nkụ?
Iphe kparu iya nụ
abụru lẹ ndu bu iya nụ
bụ ndu eme ẹjo ọkpoma;
yo mee ụnwu anụmanu;
mẹ ụnwenu; ẹphe alakọta l'iyi;
Ọphu kanụ abụru lẹ
ndu ono bẹ iphe ẹphe ekfu bụ:
“Ẹ tọo phụkwa iphe eme ayi.”
Ọnu, Nchileke eyeru Jeremáya
5 Ọ -bụru lẹ nggu lẹ ndu
gude ọkpa gbaru ọso;
ẹphe alọo ngu phelephele;
bụ-chia ndu ọphu
gude ịnya; bẹ ịi-gbabẹru?
Ọdo abụru;
ọ -bụru ụkfu dụru ngu l'alị,
daburu adaburu;
?nanụ ẹge ii-shi mekota iya
l'ọswa Ẹnyimu Jọ́danu?
6 Unwunne ngu nwoke;
ndu nggu l'ẹphe shi l'ufu lanụ;
bụ ẹphebedua deru ngu ye t'e gbua.
Ẹphe woliru olu;
t'e mee ngu iphe a-tsụru ngu nụ.
E guderu l'ẹphe a-nọdu
ekfuru ngu okfu ọma;
ba adakobekwa ẹphe.
7 Ya gbadowaru ndu ọnu-ụlo iya.
“Ya gwọbewaru ndu ono,
bụ òkè-iphe iya ono.
Ndu ono, nọ iya l'obu ono;
bẹ ya yehaakwaru l'ẹka
ndu ọhogu ẹphe.
8 Òkè-iphe yẹbe Nchileke ono
byaakwaru bya adụ iya
l'ọ bụ agụ, bu l'ọswa.
Ọonoduje agbọru iya ọgbo.
Yọ bụru iphe ono kparu
iphe ya kpọru iya ashị.
9 Ndu ono, bụ òkè-iphe iya ono;
dụwa iya l'ọ bụ ụnwenu, avọtsua avọvo;
mbụ l'ọ bụ ụnwu ivu,
ụnwu egbe-nwọku,
nọ-pheru mgburumgburu
l'abya iya etso ọgu.
Je atụko iphe bụ anụ,
bu l'ẹgbudu rukoo
t'ẹphe bya avụa anụ iya kpatakpata!
10 Igweligwe ndu eche atụru
mebyishiwaru okfu vayịnu iya.
Ẹphe gudewa ọkpa dzọo
okfu iya pyakapyaka.
Ẹgiri okfu iya ono;
bẹ ẹphe mewaru;
yọ bụru echi-ẹgu,
daburu kẹ mmanu.
11 E meru iya; yọ bụru okoroba ẹgu.
Keshinu ọ bụ okoroba ẹgu;
yọ gụlahaa aphụ rakulahaa ya.
Mbụ l'alị ono l'ọ ha;
b'e meru;
yọ bụru okoroba ẹgu;
ọphu ọ dụdu onye akpa iya ishi.
12 Ndu mgbugbu-madzụ ezeru
gbigbigbi bya anọ-jia eli-alị,
nọ l'echi-ẹgu.
Kẹ l'ogu-mbeke Ojejoje
asụ madzụ pyaapyaa
e-shi l'ishi alị-a ishi lanụ
jeye l'ishi iya ọphu;
ọphu ọ dụdu m'ọo
onye lanụ, ẹhu adụ agu.
13 Ẹphe kụru witu;
ọle; iphe ẹphe a-kpata bụ ogvu.
Ẹphe e-segbu onwẹphe l'akanya;
ọle; ẹ tọ dụdu iphe ẹphe e-seta.
Iphere iphe ẹphe kpataru
l'okfu ẹphe dụwa ẹphe;
kẹ l'ẹhu eghushi Ojejoje eghughu ike.”
14 Ọwaa iphe Ojejoje ekfu: “L'ọ -bụru kẹ ndu iwe ono, bụ obutobu iya ono l'ẹphe ha; mbụ ndu ono, denyiru ẹka lẹ òkè-iphe ya nụru ndibe iya, bụ ndu Ízurẹlu t'ọ bụru òkè-iphe ẹphe ono; lekwa lẹ ndu ono bẹ ya e-fefu l'alị ẹphe. Ya efefu ndu Júda t'ẹphe ba nọhe l'ẹke ono.
15 Ya -fefutsulephu ẹphe; ya abya aphụaru ẹphe imiko; duphuta ẹphe azụ l'òkè-iphe ẹphe ono l'ẹphe ha nanụ nanụ; mbụ ẹphe alaphuta azụ l'alị ẹke ẹphe shi.
16 Ọ -bụru l'ẹphe yeru ẹhu; mụta oshi ụzo kẹ ndibe iya; gude ẹpha iya rilahaa: ‘Kamẹnu’; ẹge ono ẹphe shiwa zia ndibe iya; ẹphe egude Bálụ l'eri angụ ono; bẹ ẹphe a-byakwa bya agbabe ọkpa; shihu ike l'ẹke ndibe iya nọ.
17 Ọ -bụkwanuru l'o nweru ọha, ẹ-te kwedu ngabẹ nchị bẹ ya e-fefulekwaphu ọha ọphu efefu; woru iya mebyishia.” Ono iphe Ojejoje ekfu ndono.