3
Ikpe, ee-kpe iphe bụ mbakeshi
1 “O -rulephu mbọku ono,
mbụ teke yẹbe Ojejoje
e-dobephu ndu Júda;
mẹ ndu Jerúsalemu
azụ l'ọnodu ọma ẹphe;
2 bẹ ya a-chịta iphe bụ mbakeshi;
chịta ẹphe jeshia lẹ
Nsụda Jehoshafatu.
Ọ bụ l'ẹke ono;
bẹ ya a-nọdu kpee ẹphe ikpe;
kẹ ndu ono, bụ òkè-iphe iya ono;
mbụ ndibe iya, bụ ndu Ízurẹlu;
kẹ l'ẹphe chịkashiru ẹphe;
ẹphe edzuru iphe bụ mbakeshi;
bya eworu alị yẹbe Ojejoje kee.
3 Ẹphe tụru ẹnwa gude kee ndibe iya;
bya egude ụnwu-okoro
gbata ụnwanyi ọkpara;
bya ereshia ụnwu-mgbọko
gude gaa mẹe; t'ọ buru l'ẹphe angụa mẹe.
4 “?Bụ ngụnu; bẹ unu a-gụru nụ iya; unubẹ ndu Táya; mẹ Sayịdonu; mẹ iphe bụ unubẹ ndu ọnu-ogo Fílisutiya l'unu ha? ?Bụ iphe ya meru; bẹ unu akfụ iya ụgwo iya tọo? Ọ -bụru l'ọ bụ ụgwo; bẹ unu akfụ iya; bẹ ya e-kwo-o gburumu; mee ẹgwegwa bya eworu iphe unu metaru tukobe unu l'ishi;
5 kẹ l'unu wotaru mkpọla-ọcha; mẹ mkpọla-ododo yẹbe Ojejoje; bya egwoo ẹku iya ndu ọphu katsụa mma je akụbe l'ụlo nte unu.
6 Unu chịtaru ndu Júda; ẹphe lẹ ndu Jerúsalemu je eree ndu Girísu; k'ọphu ẹphe a-nọdu ote-ẹnya l'alị ẹphe.
7 “Ya e-je edulata ẹphe l'ẹke ono, unu chịru ẹphe je ereshia ono. Iphe ono, unu meru ẹphe ono; bẹ ya a-byabẹ unu l'ishi.
8 Ya a-chịta ụnwu unu: ndu k'unwoke; mẹ ndu k'ụnwanyi reshia ndu Júda; ẹphe achịta ẹphe ree ndu Sabiya, bụ ọha, kwata nọdu l'ẹke, teru ẹnya.” Ono iphe Ojejoje kfuru ndono.
9 Unu kfukwaaru iphe bụ
mbakeshi t'ẹphe
kwakọbekwa k'ọgu!
Unu mekwaa tẹ ndu ike
ọgu nọ wụ-lihu!
T'iphe bụ ndu ọgu
wụritakwa ntse bya ọgu!
10 Unu kpụkwaa ọgu unu t'ọ bụru ogu-mbeke!
Unu akpụa nkogo unu t'ọ bụru ara!
T'onye ike gvụru sụkwa:
“L'ike nọokwa iya nta-a!”
11 Unu dzukobekwa;
iphe bụ mbakeshi!
Unu shi l'ẹkemeke ọbule
bya edzua l'ẹke ono!
Nggụbe Ojejoje;
menua tẹ ndibe ngu,
bụ ndu ọgu
shi l'imigwe wụ-zita!
12 “T'iphe bụ mbakeshi delihu;
tsọru nyịku nyịku laa
Nsụda Jehoshafatu;
kẹ l'ọ bụ l'ẹke ono;
bẹ yẹbe Ojejoje a-nọdu
kpee iphe bụ mbakeshi, bupheru iya
mgburumgburu ikpe.
13 Unu chilishia mma unu;
kẹ l'iphe e meberu l'alị chaakwaru.
Unu bya adzọshia akpụru vayịnu ọbu;
kẹle nsụkutu, aadzọshije
mẹe vayịnu jiwaru;
ẹge iphe eeyeje mẹe jikwaruphu.
Ọ kwaphụ ẹge ono;
bẹ ẹjo iphe ẹphe jiru.”
14 Igwe-ọha; bẹ jiru
Nsụda O-bua-ikpe;
kẹ lẹ mbọku kẹ Ojejoje dụakwa ntse.
Yọ bụru lẹ
Nsụda O-bua-ikpe ono;
bẹ ọo-mụkota.
15 Ẹnyanwu yẹle ọnwa;
bẹ ee-me t'ọ gbaa ọchi;
mkpọ-kpodo ta afụ.
16 Ojejoje a-nọdu lẹ Záyọnu dee ekiri;
nọdukwaphu lẹ Jerúsalemu dee edede.
Mgboko mẹ akpamigwe
a-nmaa jijiji.
Obenu l'ọ bụ lẹ Ojejoje;
bẹ ndu nk'iya a-gbabeje;
zeeru ndzụ;
mbụ a -gbabe-a-dzụru k'ụnwu Ízurẹlu.
Ọnu-ọma Nchileke l'ẹke ndu nk'iya nọ
17 “Ono teke unu a-ma lẹ yẹbe Ojejoje,
bụ Nchileke unu; bu ebubu lẹ Ugvu Záyọnu;
mbụ ugvu ono, dụru iya nsọ ono.
Jerúsalemu a-dụ nsọ;
to nwehe lẹ ndu ọhodo abya alụa ya ọdo.
18 O -rulephu mbọku ono;
bẹ iphe bụ eze ugvu
a-nọdu atsọshi mẹe ọphungu;
nwugvu, nọnu nụ
l'atsọshi mini ẹra-eswi.
Iphe bụ nggele,
nọ l'alị
Júda a-nọdu atsọkota atsọtso.
Ọgba-mini agbafuhu
l'eze-ụlo Nchileke;
wata ọtso l'ọbu mini;
shi l'ẹke ono agba mini lẹ nsụda Sitimu.
19 Obenu lẹ Íjiputu;
bẹ ẹgbara a-kfụ.
Édọmu abụru echi-ẹgu, daburu ochobo.
Ishi iya abụru l'ẹphe meru
ndu Júda akpamara;
mbụ l'ẹphe gbushiru
ndu ẹ-ta adụdu iphe
ẹphe meru l'alị ono.
20 Alị Júda; bẹ ee-bu ebubu jeyewaru;
bukwaaphu lẹ Jerúsalemu
tsube l'ọgbo sweru l'ọgbo.
21 Ya a-gwata ẹphe ụgwo ọchi ndu ono,
ẹphe gbushiru ono.
Ya ta ahakwa ẹphe k'ikpe, nmaru ẹphe;
kẹle yẹbe Ojejoje bu lẹ Záyọnu.”