33
1 “Nta-a; Jobu;
ngabẹru mu nchị;
nggu atọnwube nchị
l'iphemiphe ọbule,
mu ekfu!
2 Mu abyawa tẹ mu
kpuhaa ọnu; kfua okfu.
Iphe mu e-kfu jikwaru mu ọnu.
3 Obu gụkwaru mu iphoro
l'okfu, mu abya ekfukfu.
Iphe, mu abya ekfukfu abụru ezi-okfu.
4 Ọ kwa Ume Nchileke;
bẹ metaru mu nụ;
bụru Ume
Ọkaribe-Kakọta-Ike;
bẹ mu gude nọdu ndzụ.
5 Yeeru mu ọnu;
m'ọ -bụru l'ịi-dụ ike.
Rụkota ẹhu tẹ mu lẹ nggu kpọgba iya.
6 Ọ kwa ẹge ị dụ;
bẹ mbẹdua dụ l'ifu Nchileke;
bụru ẹge e gude ẹja kee ngu;
b'e gudekwaphu ẹja kee mbẹdua.
7 Ọo ya bụ t'ẹ b'ị
tsụshi mu egvu;
kẹ l'ẹ to nwedu iphe,
mu eme ngu.
8 I kfuru iya; mu anụa ya;
teke ị sụru:
9 ‘L'ị dụebe mma;
l'ẹ tọ dụdu iphe, dụ ẹji, i mejeru.
10 Lẹ Nchileke anọduje avọcha ngu;
k'ọphu oo-bobe ngu ibo;
gbe gụkobewa ngu nụ
lẹ ndu ọhogu iya.
11 L'o yewaru ngu
mkpọro l'ọkpa;
l'ele t'ọ maru ẹge ịiha ọkpa.’
12 Ọle; mu eme t'ị maru
l'iswi ta dụkwa ngu mma;
kẹle Nchileke bẹ kakwa madzụ nshinu.
13 ?Bụ ngụnu kparu iphe, ịita-tso iya okfu
sụ l'ẹ too yejedu ọnu
lẹ mkpu, iichi l'echiku iya?
14 Kẹle Nchileke abụje;
o -kfua okfu;
yo kfukwazi iya ọdo; kfukwazi iya ọdo.
Ọbule ẹ to dojedu madzụ ẹnya.
15 Ooshije lẹ nrọ;
mẹ l'àphụ̀ kfua okfu
l'ẹnyashi teke mgbẹnya
tsụshiru madzụ;
ẹphe azẹshiwa azẹe.
16 Ọ bụ teke ono;
bẹ ookfuje okfu ye ẹphe lẹ nchị;
nmaaru ẹphe ọkwa,
e-ye ẹphe egvu;
17 t'e shi ẹge ono tẹ madzụ
haa ome ẹji;
mẹ tẹ madzụ be ekushi onwiya ekuku;
18 t'e shi ẹge ono dzọfuta
iya t'ẹ b'ọ dalahụ l'iduma;
dzọkwaa ya phụ l'ẹka anwụhu.
19 Nchileke ahajẹru gude
iphe-ememe hụ̀a madzụ àhụ̀hù;
paru iya chee l'ụlo;
l'amịpyashi iya ọkpu;
20 k'ọphu bụ lẹ nri a-bya adụ iya ashị.
Nri, katsụa ọtso ẹna ahụlahaa ya ẹgbo.
21 Yọ laa ẹhu; bụru ọkpu.
Ọkpu iya, e te shi
aphụjedu abya epheshia.
22 Yọo kpọ gẹgege akpọ l'ala l'iduma.
Ndzụ iya akpọ l'alakfu
ndu ejeru anwụhu ozi.
23 Ndẹge o nweru
onye k'ẹto, nọ lẹ
mkpakụ madzụ lẹ Nchileke;
mbụ onye lanụ l'ụkporo
ụnwu-ojozi Nchileke,
a-byanụ bya ekfuaru
madzụ iphe, gbaru iya l'ememe;
24 t'o meeru iya
eze-iphe-ọma; sụ:
‘T'a dzọo ya rụ
t'ẹ b'ọ dalahụ l'iduma;
lẹ ya phụwaru onye
e-gude gbata iya.’
25 Teke ono bẹ
oo-gbuchafu;
bya adụ l'ọ bụ nwata nshịi.
Yọ laphu azụ;
bya adụ l'ọ bụ nwokorọbya.
26 Ọ bụ teke ono bụ:
madzụ -kfuru nụ Nchileke;
yọ nụa ya.
Teke ono;
yọ phụ ifu Nchileke;
ẹhu atsọo ya ẹna.
Nchileke abya edophu
iya azụ l'ọnodu iya;
bụ iya bụ ọnodu onye doberu ẹka ndoo.
27 Ọ bụ teke ono;
bẹ oo-vudo
l'edzudzu ọha kfua ya hoo-haa:
‘Lẹ ya mesweekwaru;
ye ẹka l'iphe,
ẹ te vudodu nhamụnha;
ọbule Nchileke gụwaru iya nvụ.
28 Ọ dzọwaru iya ndzụ;
tẹ ya ba adalahu l'iduma.
Nta-a bẹ ya a-nọ ndzụ phụ iphoro.’
29 Ono iphe, Nchileke
emejeru madzụ ndono.
O -metsua;
yo mee ya ọdo;
30 ẹge ee-shi t'ọ dzọo ya
ndzụ t'ẹ b'ọ dalahụ l'iduma;
k'ọphu ndzụ e-dzu iya.
31 Jobu; dakwaa ashị;
ngabẹru mu nchị.
Nọdukwa nwandoo;
tẹ mu kfu iphe, mu ekfu.
32 Ọ -bụru l'o nweru ọnu,
ii-ye; nggu eyee ya;
kfua iphe, dụ ngu
k'ekfukfu;
kẹ l'ọ dụ mu t'a sụ l'e kpefuru ngu.
33 Teke ẹ tọ dụdu;
ngabẹkwaru mu nchị.
Nọdu kwa nwandoo;
tẹ mu zia ngu mmamiphe!”