23
Ọnu k'ẹto, Jobu eyeru Elifazu.
1 Tọ dụ iya bụ; Jobu abya eyee ọnu; sụ:
2 “Mbụ jeyekwa ntanụ ọwaa;
bẹ mu agụkwa aphụ l'agụshi iya ike;
lẹ Nchileke te mekwa mu ẹge eemeje madzụ.
3 Ndẹge mu maru ẹke mu
a-chọ-vu Nchileke;
ndẹge mu maru ẹge mu
e-me jerua ẹke o bu;
4 mẹ mu evudo iya l'ifu;
kfuaru iya ẹge obu du mu;
mbụ mẹ mu l'iya atụa ya
jeye teke mu e-kfu ẹge ọnu ha mu.
5 Ọ bụ teke ono bẹ mu
g'a-ma iphe, ọ g'e-kfu;
maru ọnu, ọ g'e-yeru mu.
6 Nchileke; ?oo-gude
ọkpehu iya bya mu l'ẹhu tọo?
Wawakwa; ọ bụ nchị
b'ọ g'e-geberu mu.
7 Ọ bụ l'ẹke ono; bẹ mubẹ
onye doberu ẹka ndoo
g'a-nọdu kọoru Nchileke
iphe, atsụ mu l'ẹhu;
mẹ onye ikpe mu
ebua ikpe mu;
sụ tẹ mu la;
l'ikpe ta nmadụ mu
gburu jeye lẹ gbururu.
8 Obenu; l'ọobuje;
mu -chọo ya shịa ụzo
ẹnyanwu-ahata;
tọo nọdu iya.
Mu -chọo ya shia ụzo
ẹnyanwu-arịba;
mu ta aphụdu iya.
9 Ọ -nọdu mu l'ụzo isheli
l'eje ozi iya;
bẹ mu ta aphụdu iya.
Ọ -nọdu l'ụzo ọhuda;
mgbẹ mu ta aphụdu iya.
10 Obenu lẹ yẹbedua
makọtaru ẹke mu dzọru ọkpa.
Ọo ya bụ lẹ teke
ọ datagetsuaru mu;
mu abya achafu dụ l'ọ bụ mkpọla-ododo.
11 Ọ kwa ẹke o yeru ọkpa;
bẹ mu eyeje nke mu;
bụru ụzo, ọ tọru mu;
bẹ me etsoje.
Mu ta ahabụkwaa ya shilahaa ụzo ọdo.
12 Mu ta ahabụkwaa iphe o kfuru;
wata ome iphe ọdo.
Okfu, shi iya l'ọnu;
bẹ mu akajẹkwa ọgube iphe
malẹ nri, mu erije mbọku-mbọku.
13 Obenu lẹ yẹbedua bụ
'enwuribe enwuribe.
?Bụ onye a-dụ ike
kpọshia ya ome iphe
ọ tụberu k'ememe.
Ọ bụ iphe, dụ iya mma;
bẹ oomeje.
14 Ọ bụ iphe, ọ tụ-buru;
bẹ oo-me l'ẹhu mu.
Idzu, dụ ẹge ono;
b'ọ chịwaru kwakọbe.
15 Ọ bụ iya meru iphe ọobuje:
mu -nọdu iya l'ifu;
egvu eria mu ẹhu.
Mu -rịtalephu iphe ono;
mu atsụlahaa ya egvu.
16 Nchileke mewaru tẹ meji tọfu mu.
Ọkaribe-Kakọta-Ike
mewaru egvu ye mu l'ẹhu.
17 Ọ bụ Nchileke bụ onye
meru t'ọchi gbaa mu l'ifu;
ọle ẹ tọo nakwa nụ mu ire.