51
Aadụ Záyọnu ike
1 “Unu ngabẹru mu nchị;
unubẹ ndu eme t'unu bụru
ndu doberu ẹka ndoo;
mbụ unubẹ ndu achọ Ojejoje.
T'ẹnya unu nọdukwa
l'ikelegvu ono, bụ ẹka
a kụkpotaru unu ono;
mbụ l'ẹke ono, e gvutaru unu ono!
2 Unu nyatakwa nna unu oche, bụ Ébirihamu!
Unu anyata Séra, bụ iya parụ ẹpho-ime unu!
Teke mu kuru iya b'o shi dụ nanụ.
Obenu lẹ mu gọru iya ọnu;
mee ya; yọ bya adụ l'igwe.
3 Ojejoje a-dụ Záyọnu ike;
bya aphụaru iya imiko l'iyi, yiru iya.
Alị iya ono, shi bụwaru
echi-ẹgu ono;
bẹ oo-me t'ọ dụ l'ọ bụ Ídẹnu.
Kpọkpokirikpo alị iya ono
aghọo; bụru mgbabu Ojejoje.
Ọ bụ teke ono bẹ ọo-wata ote ẹswa;
ẹhu atsọlahaa ya;
yo kelelahaa ekele;
gụlahaa egvu.
4 Ndibe mu; unu ngabekwaru mu nchị!
Ọha mu; unu nụkwaa iphe mu ekfu!
Mu a-tụru unu ekemu;
mbụ l'ikpe nhamụnha ono,
mu ekpeje ono a-bụkwaru
iphoro dụru iphe bụ mbakeshi.
5 Mu a-dzọ unu ẹgwegwa.
Adzọdzo unu nọokwa ntse.
Ọ bụ mbẹdua e-kpe iphe
bụ mbakeshi ikpe.
Ndu bunyabe eze ẹnyimu
ele ẹnya mu.
Ẹphe chịru ẹnya dobe
l'ele tẹ mu bya adzọo ẹphe.
6 Unu palia ẹnya; lee l'imeli!
Unu elee ẹnya lẹ
mgboko-a!
Igwe e-mekochaa
phukashihu l'ọ bụ
ẹnwuru-ọku;
mgboko akahụ l'ọ bụ uwe.
Ndu bu iya nụ anwụshihu l'ọ bụ ijiji.
Obenu l'adzọdzo, mu a-dzọ
ẹphe a-nọ gburu jeye lẹ gbururu.
Mu ta bụ-buhudu onye
edobe ẹka ndoo abụ-buhu.
7 Unu nụkpoduduphu iphe
mu ekfu; unubẹ ndu maru vudo nhamụnha;
mbụ unubẹ ndu ekemu mu nọ l'obu!
Unu ba tsụjekwa egvu
l'ọnu, madzụ akọ unu;
ọphu ọ dụjekwa unu
biribiri teke eeme unu iphe-iphere;
8 kẹ l'ọ bụ mkpu a-ta ẹphe l'ọ bụ uwe;
ǹrà eria ẹphe l'ọ bụ ukpo.
Obenu lẹ mu a-bụru onye
doberu ẹka ndoo
gbururu jeye lẹ gbururu.
Mu anọdu adzọkota madzụ
l'iphe bụ ọgbo sweru esweswe.”
9 Tehu etehu!
Tehu yee ike l'ọ bụ uwe;
nggụbe agburu-ẹhu Ojejoje!
Tehu ẹge i shi tehu l'ọhazu;
mbụ l'ọ bụ ẹge i shi tehu
l'ọgbo, swetsuarunu teke ndiche.
?Tọ bụdunua nggu bụ
onye buru Réhabu kpụrukpuru;
mbụ sụru ẹjo anụ ono
iphe yo phe ya l'azụ iya ọphu?
10 ?Tọ bụdunua nggu bụ onye
ono, meru eze ẹnyimu;
yọ tahụ;
mbụ mee; mini, nọ l'ẹbo atashịhu;
mbụ nggụbe onye meru
ụzo adaburu pongu l'ime eze ẹnyimu
k'ọphu ndu ono,
a dzọwaru ndzụ ono wụ-swetaru?
11 Ọo ya bụ ẹge ndu ono,
a dzọwaru ono a-lata.
Ẹphe a-nọdu azụ egvu abahụ Záyọnu.
Ote-ẹswa abụru okpu,
ẹphe e-kpu gbururu jeye.
Ẹhu-ọtso-ẹna; mẹ ẹswa e-ji ẹphe ẹhu;
aphụ yẹle ude a-gba mgbalanụ.
12 “Ọ kwa mbẹdua;
mbụ mbẹdua gẹdegede
bụ onye bụ ọkpu-ikike unu.
?Bụkwanu ngụnu bụ
kẹ t'unu atsụ madzụ mmanu egvu;
mbụ ụnwu madzụ,
bụ iphe ẹphe bụ bụ ẹswa;
13 kẹ t'unu zahaa Ojejoje, bụ onye meru unu;
mbụ onye bụ sụsaru igwe;
bya abụru iya tọru ntọ-l'alị mgboko;
mbụ kẹ tẹ ntsụmu-egvu
ripyabe unu tekenteke ẹge ono;
l'okfu ẹhu, eghu onye
akpa unu ẹhu damụdamu;
mbụ onye bụ iphe
o fuberu ifu bụ t'o gbushia unu?
Kẹ l'ẹge-a ẹhu,
eghu onye akpa unu ẹhu
damụdamu ta dụdu iphe ome unu;
14 Ndu ono, a tụru mkpọro ono;
bẹ a-tụfu ẹgwegwa
t'ẹphe nweru onwẹphe;
k'ọphu ẹphe ta nwụshihudu
l'ọka-mkpọro; ọphu ẹgu nri; te me ẹphe.
15 Kẹ l'ọ kwa mbẹdua bụ Ojejoje;
bya abụru Nchileke unu;
mụbe onye akpalije mini
l'eze ẹnyimu; akpara iya
atụa daa oke ọda.
Ojejoje, bụ
Ọkaribe-Kakọta-Ike bụ ẹpha mu.
16 Mu wowaru okfu mu ye unu l'ọnu;
bya egude ọbechere-ẹka mu kpuchia unu.
Mbụ mụbe onye ono,
bụ mu dobekotaru igwe l'ọru iya;
bya abụru mu tọkotaru
ntọ-l'alị mgboko;
tẹmanu yọ bụru mu
sụru ndu Záyọnu:
‘Unu bụakwa ndibe mu.’ ”
Aanmaru ndu Jerúsalemu ọkwa
17 Tehu! Tehu etehu!
Tehu; gbeshi nggụbe Jerúsalemu;
mbụ nggụbe onye ono,
shi l'ẹka Ojejoje nata okoro
oke iphe-eghughu iya ngụa;
mbụ nggụbe onye ngụfuru
ipoti iphe ono, emeje
madzụ akpọ kulakula;
mbụ ngụa ngụa ụrukutu iya.
18 Ụnwegirima iya ono l'ẹpha ha,
bụ yẹbedua, mụshiru ẹphe
ono ta dụdu m'ọo onye lanụ,
akpọ-ziru iya ụzo.
To nwe ụnwegirima ono;
m'ọ bụ onye lanụ esekputajiya l'ẹka.
19 Ndakfu-a dakfuwaru
ngu ugbo labụ-a;
?bụ onye a-sụ ngu gberuma;
eyifu; kpurupyata;
ẹjo ẹgu; mẹ ọgu a-fụru ngu;
mbụ; ?bụkpo onye a-sụje ngu ka?
20 Ụnwu ngu bẹ meji tọfukotawaru;
ẹphe awụshiru l'iku esu-ụzo
l'ọ bụ ele, daru l'ọnya.
Ọ bụ oke ẹhu-eghughu
Ojejoje bẹ phụpyaberu ẹphe;
mba, ọobaru ẹphe angawa ẹphe ẹhu.
21 Ọo ya bụ ẹge-a;
nụkpoduduphu iphe-a
nggụbe onye ono,
eemekaru iphe;
mbụ nggụbe onye e meru;
nggu akpọ karịkari l'ẹ ba
bụ l'ọ bụ mẹe b'ị ngụru;
22 Ọwaa iphe Nnajiufu, bụ Ojejoje ekfu;
mbụ Nchileke ngu,
bụ onye ono, agbajẹru
ndibe iya ọdzori ono.
Ọ sụru: “Tii phụdu;
mu nafụakwaru unu
okoro ono meru;
unu akpọ galagala ono l'ẹka.
Ipoti oke ẹhu-eghughu mu ono;
bẹ unu ta angụhedu ọdo.
23 Mu a-paru iya pẹe ndu ono,
anụ unu aphụ ono;
mbụ ndu ono, sụru unu:
‘T'ii daburu; kpube ifu l'alị;
t'ẹphe bya enyia ngu
gòdógòdó!’
Nggu eworu
okpurukpu-azụ ngu mee alị;
t'ọ bụru woroworo, madzụ eshi.”