44
Ízurẹlu; ndu Nchileke fọtaru
1 “Obenu l'agha;
ngabẹ nchị nta-a;
nggụbe Jékọpu, bụ nwozi mu;
mbụ nggụbe Ízurẹlu ono,
mu gude ẹka mu fọta ono.”
2 Ọwaa iphe Ojejoje ekfu;
mbụ onye ono, meru ngu;
bụru iya moru ngu l'ẹpho;
bya abụru iya bụ onye
a-gbaru ngu mkpu:
Ba atsụkwa egvu;
nggụbe Jékọpu, bụ nwozi mu;
mbụ nggụbe Jeshurunu,
bụ onye bụ mu fọtaru ngu.
3 Mu a-gba mini l'alị, ẹgu mini agụ.
Mu emee; nggele anọdukota l'alị,
kpọhuru nkụ ono.
Mu e-woru Ume mu
ye ụnwu ngu l'ẹhu.
Mu abya ekebe awa ngu k'ọma.
4 Ẹphe a-wụ-lishihu l'ọ bụ
ẹgbudu, fushiru l'iku mini;
mbụ zee l'ọ bụ oshi wilo,
nọ l'iku nggele, atsọ atsọtso.
5 “O nweru onye a-sụ:
‘Mu bụkwa kẹ Ojejoje;’
nweru onye eku ẹpha iya laaru Jékọpu;
nwekwaruphu onye edee
l'oshi ẹka iya: ‘Lẹ ya bụkwa kẹ Ojejoje’;
ẹpha iya abụru Ízurẹlu.”
6 Ọwaa iphe Ojejoje ekfu:
mbụ onye ono, bụ eze ndu Ízurẹlu;
bya abụru onye gbafụtaru ẹphe ono;
mbụ Ojejoje,
bụ Ọkaribe-Kakọta-Ike:
“Ọ kwa mbẹdua bụ onye k'ọdungu;
bụru onye k'ikperazụ.
Ẹ tọ dụhekwa Nchileke ọdo,
nọnu; a gụfu mbẹdua.
7 ?O nweru onye aa-tụ yeru mu?
T'onye ọbu kfunua;
mbụ t'onye ono menua ya; tẹ mu maru.
T'onye ọbu dzeegheduru
mu iphe mekotahakporu nụ
keshinu ndu ndiche.
T'onye ọbu kfuedu
iphe e-mekochaa mee nụ;
mbụ ẹge-a; t'ọ kọnua
iphe abya ememe.
8 T'ẹhu ba anmakwa unu anmanma;
ọphu unu 'atsụkwa egvu!
?Mu te kfuhaadaru iya unu
keshinu teke teru etete;
mbụ kfua ya; raa ya arara?
Ọ kwa unu bụ ndu ekebe mu.
?O nweru Nchileke ọdo, nọnu,
a gụfu mbẹdua? Wawaa!
?O nweru ikelegvumu agwa ọdo, nọnu,
mu ta amadụ.”
Ndu eme kẹ ntẹkpe
9 Iphe bụ ndu eme kẹ ntẹkpe l'ẹphe ha bụkota ndu mmanu. Ẹge ono bẹ iphe ono, ẹphe sụru l'ọ bụ ẹphe ọkpobe iphe ono bụkwaphu iphe éswè. Ndu agbaru ẹphe ọdzori bụ ìshì bẹ ẹphe atsụ. Ẹ to nwedu iphe ẹphe maru; k'ọphu iphere e-je ẹphe adụdu.
10 ?Bụ onye pyịtaru ọgwu; bya akpụa ntẹkpe, bụkota iphe ta dụdu iphe ẹphe agaru iya mkpa iya?
11 Lekwa; iphe bụ ndu etso iya nụ; bẹ e-mekochaa bụru ndu iphere e-me. Ndu ono, akpụje iya nụ ono bụnu madzụ mmanu bẹ ẹphe bụ. T'ẹphe byanụ bya edzukobe; keeduru ọkpa; t'ẹphe phụ l'ee-ye ẹphe oke egvu meru iphere nụ l'ẹphe ha.
12 Ọ bụ onye ụzu ewotaje anma hụbe l'ọku icheku. Yọ bya egude ọngu tsua ya gude kpụta ntẹkpe. Yọ bụru ọkpu ẹka iya b'o gudeje eme iya. O -menyaa ya; ẹgu agụlahaa ya; ike agvụ iya. Teke ẹ tọ ngụdu mini bụ: aa-nọnyaa; ẹhu atsụa ya ụme.
13 Ndu kapyịnta bụ eri bẹ ẹphe egudeje atọ. Yọ bya egude iphe aakajẹ iphe kaa ya ẹge oo-me iya; bya egude nkọ pyịa ya. Yọ bya egude kọmupasu tọo ya ẹge ọo-gba. Yo mee ya; yọ dụlephu l'ọ bụ nwoke; mbụ dụkpo biribiri ẹge nwoke adụje. Yo woru iya je egvube l'ụlo nte.
14 Mbụ ẹge-a; yo gbutsua oshi sida; m'ọ bụ sipurẹsu; m'ọ bụkwanu achị, ọ haru yẹle oshi ọdo, nọtsua l'ọswa achịko vua. Ọphu bụ l'ọ dzaru oshi payịnu; igwe achịa mini mee ya; yo vua.
15 Oshi ọphu e mephodoru iphe abụjewaruru nkụ. Yọ haru hataje iya gude nyaa ọku. Yo gude iya mekwaa ọku; ghee buredi. Tẹmanu Yo gbutakwa iya phụ gude pyịta ọgwu balahaaru ẹja. Mbụ pyịa ntẹkpe dalahaaru iya pẹe.
16 Yọ bya ekee nkụ ọbu ẹbo chịta ye l'ọku; shia ya iphe. Yọ bya ahụa ya anụ taa; tajia ẹpho. Yọ gudekwa iya phụ nyaa ọku; yọ sụ: “Mhm! Nta-a bẹ ẹhu evuwa mu ọku. Mu phụwaru ọku nyaru.”
17 Yọ bya achịta ọphu phọdurunu gude pyịta ọgwu; mbụ mee ya ntẹkpe; dalahaaru iya pẹe; l'abaru iya ẹja. Yo bya agụlahaa anụ iya; sụ iya: “Dzọo mu; ọ kwa nggu bụ Nchileke mu.”
18 Ẹ to nwekwa iphe ẹphe maru. Iphe te edodu ẹphe ẹnya; kẹ l'e kwechiru ẹphe ẹnya; k'ọphu ẹphe ta aphụdu ụzo. Ẹge ono b'e mechiru ẹphe egomunggo; t'ẹ b'ọ dụ iphe e-doje ẹphe ẹnya.
19 Ọphu ọ dụdu onye ọphu asụje t'iya rịedu ọriri. Mbụ ọphu ọ dụdu onye ọphu maru iphe; mbụ iphe doru ẹnya kẹ t'ọ sụ: “Nta-a bụ iphe-a, mu hataru ye l'ọku-a; bya egude icheku iya ghee buredi-a; bya egude iya hụa anụ taa; ?bụ ọphu phọdurunu bẹ mu e-gude mee iphe dụ ẹji? mbụ ?Bụ kpukpurungu oshi bẹ mu a-wata ọdaru pẹe?”
20 Ọ kwa ntụ bẹ oori. Mbụ; ọ bụ mkpọkoro egomunggo iya dephuru iya. Mbu; ẹ tọ bụdu l'ọo-dụ-ghe ike adzọ onwiya. Ọphu ọosudu: “?Ọ kwa l'iphe-a, ya gude l'ẹka-ụtara-a ta dụdu iphe ọ bụ?”
Onye oke; l'onye ndzọta
21 “Nyatakwa iphe ndu-wa;
byiko Jékọpu; mbụ nggụbe Ízurẹlu;
kẹ l'ọ kwa nggu bụ nwozi mu.
Ọ kwa mu meru ngu nwozi mu.
Nggụbe Ízurẹlu; mu ta azahakwa ngu!
22 Mu mewaru emeswe,
i mesweru mu asakahụ l'ọ bụ urukpu.
Mu abya emee iphe dụ ẹji,
i meru mu emishihu l'ọ bụ iji ụtsu.
Lakfutanu mu;
kẹle mu dzọwaru ngu ndzụ.”
23 Nggụbe igwe;
gụa egvu ẹhu-ọtso-ẹna;
kẹ l'ọ kwa Ojejoje meru iphe-a!
Chishia mkpu ike nggụbe
eliphe nọ lẹ mkpuli igwe!
Unu byiswe egvu;
unubẹ eze ugvu, nọtsuanu;
mẹ unubẹ ọswa, nọtsua nụ;
mẹ iphe bụ oshi, nọ iya nụ!
Kẹle Ojejoje dzọwaru Jékọpu!
O gudewa Ízurẹlu koshi ọdu-biribiri iya.
24 Ọwaa iphe Ojejoje ekfu;
mbụ onye ono, gbafụtaru ngu ono,
bụkwaru iya phụ, bụ onye
kpụru ngu l'ẹpho.
Ọ sụru: “L'ọ kwa iya bụ Ojejoje;
onye bụ iya meru iphemiphe ọbule.
Yọ bụru mu tọsaru eligwe
nwẹnkinyi mu;
yọ daburu phorokotongu;
bya abụkwaruphu mu
tọsaru mgboko nwẹka-mu.
25 Ọ kwa mu emeje t'iphe ndu
ekfuchiru Nchileke l'ụgho kfuru
haa ome ẹge ẹphe kfuru mee ẹge ọdo;
mbụ mu eme ndu aphụ àphụ̀ eswe.
Mu ekfujekwaphu
mmamiphe ndu maru iphe ifu;
mee ya; yọ bụru iphe éswè.
26 Okfu, onye ejeru mu ozi
kfuru bẹ mu emeje;
yọ dụ ẹge o kfuru iya;
ẹge ono bẹ teke ndu mu
ezije ozi kfukwaruphu iphe;
mu emee ya ẹge ẹphe kfuru iya;
mbụ ndu sụru kẹ Jerúsalemu;
sụ l'ee-mekochakwa buru iya eburu ọdo;
bya asụkwaphu kẹ
mkpụkpu, nọtsua lẹ Júda;
sụ l'ee-mekochaa kpụa ya; mbụ l'ẹke
ọ dakpọshihukotaru;
bẹ e-mekochaa mekwazikota.
27 Ọo mu sụru ebo: ‘Tashịhu!
Mu e-me tẹ mini, nọtsua
l'ẹnyimu ngu tashịhukota.’
28 Ọo mu kfuru okfu kẹ
Sáyịrosu; sụ:
ọ bụ onye echeru mu atụru mu.
Oo-mekota iphe dụ mu t'o mee.
Oo-kfu kẹ Jerúsalemu; sụ:
T'a kpụ-kwazi iya.
Ọo-byakwaphu ekfua
k'eze-ụlo Nchileke;
sụ t'a tọkota ntọ-l'alị iya.”